काठमाडौं-पार्टीभित्रको वैचारिक समूहका रुपमा परिभाषित गर्दै आएको नेपाली कांग्रेसको तेस्रो धारले आफ्नो शक्ति कमजोर नभएको सन्देश दिने प्रयास गरेको छ।
सोमबार पार्टी नेता कृष्णप्रसाद सिटौला समूहका नेताहरु एक स्थानमा भेला भएर अबको महाधिवेशनमा सिटौलाकै नेतृत्वमा अघि बढ्ने प्रतिबद्धतासमेत जनाए।
१३ औं महाधिवेशनको उम्मेदवार घोषणासभा भएकै स्थानमा उभिएर सो पक्षले आफूहरु महाधिवेशन केन्द्रित भएको सन्देशसमेत दिएको छ।
बत्तिसपुतलीस्थित एक पार्टी प्यालेसमा आफ्नो समूहका नेताहरुलाई दायाँबायाँ राखेर नेता कार्यकर्तालाई जिल्ला जानसमेत सिटौलाले निर्देशन दिए।
पार्टी संरचनाको समायोजन सकिएका जिल्लाहरुमा फागुन १६ बाट क्रियाशील सदस्यताको वितरण प्रारम्भ भइसकेको छ।
महाधिवेशनको आधार क्रियाशील सदस्य भएको बताउँदै नेता सिटौलाले कार्यकर्तालाई भने, ‘तपाईंहरु जिल्ला जानुस्। संघीय, समावेशी र संख्या बढ्ने गरी संरचना बनेका छन्। क्रियाशील सदस्यता वितरणको काममा लाग्नुस्।’
१४ औं महाधिवेशन २०७७ फागुनबाट पर सार्ने प्रयास भए आफ्नो समूहले त्यसलाई स्विकार्नै नसक्ने सिटौलाले स्पष्ट पारे। उनले भने, ‘तोकिएको समयमै महाधिवेशन गराउन सभापति र महामन्त्रीलाई सबै प्रकारको सहयोग गर्न तयार छौं। कुनै पनि बहानामा महाधिवेशन सारे हामीलाई मान्य हुँदैन।’
आफ्नो समूहका नेतालाई समेत विभागमा अवसर दिलाएका नेता सिटौलाले सभापति शेरबहादुर देउवाले विभाग गठन गरेकोमा आपत्ति जनाए। चार वर्षे नियमित कार्यकाल सकिएपछि विभाग गठन गर्नुको औचित्य नहुने उनको भनाइ थियो।
विधान अनुरुप पार्टी सञ्चालन नहुँदा कांग्रेस कमजोर रहेको औंल्याउँदै उनले भने, ‘कार्यतालिका प्रभावित भइसकेको छ। क्रियाशील सदस्यता वितरण सुरु हुन सकेको छैन।’
कार्यतालिका र कार्यविधि संस्थापन पक्षले एकपक्षीय ढंगले सार्वजनिक गर्दा अस्वस्थ खेल सुरु भइसकेको बताए।
अनुशासन समितिमा रहेका सिटौला पक्षका नेता उमाकान्त चौधरीले दिएको राजीनामा फिर्ता भएको उनले जानकारी गराए। ‘अनुशासन समितिमा रहेर काम गर्दा उहाँका केही कठिनाइ थिए। तपाईं बस्दा ठीक हुन्छ भनी सल्लाह दिएपछि राजीनामा फिर्ता गर्नुभएको छ’, उनले भने।
चौधरी कार्यक्रममा उपस्थित हुन नसकेको जनाउँदै उनले भने, ‘सञ्चारमाध्यमप्रति मेरो गुनासो छ। तथ्य बुझेर लेखिदिनु होला। उहाँ हामीसँगै हुनुहुन्छ।’
नेता सिटौलाले आफ्नो समूह महाधिवेशनसम्म पुग्दा अझै विस्तारित हुने दाबी गरे।
महाधिवेशन गतिविधि सुरु भएसँगै नेता गगन थापाले समूह परिवर्तन गरे भनी समाचारहरु समेत बाहिरिएका थिए। बाहिरी प्रचारको निवारण गर्ने थापाको प्रयास थियो। नेता थापाले विचार समूहका नेता सिटौला नै अघि लगाएर आफ्नो समूह महाधिवेशनमा जाने बताए।
‘नेता सिटौलाको नेतृत्वमा एक ठाउँ उभिएर महाधिवेशनमा जान्छौं। हामी अलमलिएका छैनौं। महाधिवेशनका लागि हाम्रो शक्ति समुच्च रुपमा प्रयोग गर्छौं’, थापाले भने।
सभापति देउवा र महामन्त्री डा शशांक कोइरालाले आफ्नो पदीय भूमिका अनुसार काम नगरेको भन्दै थापाले आपत्ति जनाए। तल्लो तहको संगठन समायोजन समयमा नसकिनुमा सभापति र महामन्त्री दोषी रहेको उनले दाबी थियो। उनले भने, ‘कुन कुन जिल्लामा किन सकिएन, नामावली नआएका जिल्लामा ताकेता गर्ने काम महामन्त्रीको होइन?’
यो समूहले महाधिवेशन समयमा गराउन दबाबसमेत बढाउने भएको छ। महाधिवेशन गराउन सबै प्रकारको सहयोग आफ्नो समूहबाट हुने प्रतिबद्धता जनाउँदै नेता थापाले भने, ‘अन्य दलबाट आएकालाई समायोजन गर्ने नाममा महाधिवेशनको मिति सार्न पाइँदैन।’
सजिलोका लागि विधान मिच्दा पार्टी कमजोर भएको उल्लेख गर्दै नेता थापाले विधानको पालना मूल नेतृत्वबाटै नभएको आरोप लगाए।
सिटौलाका सारथी रहेका अर्का युवा नेता प्रदीप पौडेलले तेश्रो धारका नेता एक स्थानमा नभएको भ्रम नपाल्न आग्रह गरे। ‘दिग्भ्रमित हुनु जरुरी छैन। हामी जहाँ थियौं, त्यहीँ छौं।’
पार्टीकै भविष्यका लागि बेला बेलामा अन्य समूहसँग सहकार्य हुँदैमा विचार समूहका नेताहरुले आफ्नो स्थान छोडेको भन्न नहुने उनको तर्क थियो।
पार्टी मूल नेतृत्वले कांग्रेस र देशको भन्दा बढी गुटको महत्त्व दिएको भन्दै असन्तुष्टि पोखे। पार्टीमा भएको क्षति वर्तमान नेतृत्वले पूरा गर्नै नसक्ने ठोकुवा समेत उनले गरे। समयमा महाधिवेशन नहुने आशंका उनले समेत राखे।
‘जिल्लाहरुमा संगठन संरचना बन्न सकेको छैन। महाधिवेशन कार्यतालिका अवरुद्ध हुन पुगेको छ’, उनले भने।
संख्यामा कमजोर भए पनि तेश्रो धार विचारमा प्रधान भएको पौडेलको दाबी थियो। सिटौलाकै नेतृत्वमा वैचारिक बहस सञ्चालन गर्ने बताउँदै उनले महाधिवेशन समयमा गराउन आफ्नो समूहले दबाब बढाउने बताए।
नेपाल विद्यार्थी संघमा आफ्नो तर्फबाट महामन्त्री बनेका बलदेव तिमल्सिना र युवराज पाण्डेयले बैठकको संयोजन गरेका गरेका थिए। भेलामा सिटौला निकटका नेता कार्यकर्ता भरिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
