सरोकारवालाका कुरा सुन्ने फुर्सद छैन मन्त्री यादवलाई

कृषि

निर्मला घिमिरे बिहीबार, फागुन २९, २०७६ १८:५६

काठमाडौं- श्रम, रोजगार तथा सामाजिक सुरक्षामन्त्री रामेश्वर राय यादवले बिहीबार दिउँसो ३ बजे मन्त्रालयको सभाहलमा पत्रकार सम्मेलन डाके। सम्मेलनमा विभिन्न सञ्चारमाध्यमसम्बद्ध पत्रकारहरुको बाक्लै उपस्थिति थियो ।

मन्त्रालयका कर्मचारीहरु, राष्ट्रिय योजना आयोगका पदाधिकारी, म्यानपावर व्यवसायीलगायत स्वदेशी तथा विदेशी सरोकारवालाहरुको उपस्थितिले सभाहल भरिभराउ थियो। कुनै भव्य समारोहको झल्को मेटिइरहेको थियो।

सम्मेलन गर्नुको उद्देश्य थियो, नेपाल श्रम, आप्रवासनका विषयमा सरकारले तयार पारेको ‘नेपाल श्रम आप्रवासन प्रतिवेदन २०२०’ को विमोचन गर्नु। त्यसैबीच मन्त्री यादवले प्रतिवेदनको विमोचन गरे।

प्रतिवेदनको तारिफ गर्दै मन्त्री यादवले भने, ‘मेरो लागि यो प्रतिवेदन निकै महत्वपूर्ण हो। प्रतिवेदनमा धेरै कुराहरु समेटिएका छन्, नेपाल सरकारका नीतिहरु, आगामी दिनका चुनौतीसहित समग्र विषय एकै ठाउँमा समेटिनु आफैँमा गौरवको विषय पनि हो।’

हतारहतारमै मन्त्री यादवले पुरानै भाषण दोहोर्‍याउँदै भने, ‘म मन्त्री हुँदाको पहिलो दिनको पत्रकार सम्मेलनमा मैले जुन कुरा भनेको थिएँ त्यही कुरा भन्न मन लाग्छ। यो आप्रवासन प्रतिवेदन २०२० ले समेटेको विषय कुरा पनि त्यही हो। आन्तरिक श्रम बजारमा वार्षिक रुपमा आउने ५ लाख जनशक्तिलाई नेपालभित्र व्यवस्थापन गर्नुपर्छ भन्ने कुराको म पक्षधर हो।’

बेलाबखत पुरानै भाषण दोहोर्‍याई/तेहेर्‍याई सुनाइरहने मन्त्री यादवसँग पत्रकारका कुरा सुन्ने फुर्सद चाहीँ निस्किएन। हतारमा प्रतिवेदन सार्वजनिक गरेर मन्त्री यादव उच्चस्तरीय छलफलका लागि भन्दै निस्किए।

श्रम आप्रवासनजस्तो संवेदनशील विषयमा हतारमा पत्रकार डाकेर प्रतिवेदनमात्र सुनाउनुको तुक के? मन्त्री यादवसँग समय नै नभएको हो वा पत्रकारको प्रश्न सामना गर्ने ल्याकत? खुलदुलीका पोका मनभित्रै राखेर पत्रकारहरु फर्किनुको विकल्प रहेन।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।