काठमाडौं- शेयर बजार सुधारसँगै घाटामा रहेका म्युचुअल फण्ड नाफामा देखिन थालेका छन्। नाफामा आएको सुधारसँगै न्याभ भ्यालु पनि बढ्न थालेको हो।
एनआइबिएल एस क्यापिटलले सञ्चाल गरेका तीनवटै फण्डले माघ महिनामा नाफा सुधार गरेका हुन्। एनआइबिएल समृद्धि फण्ड एकले एक महिनाकै अवधिमा १४० प्रतिशतले नाफा सुधार गरेको छ। फण्डले माघ महिनामा मात्रै १२ करोड ५९ लाख रुपैयाँ नाफा आर्जन गरेको थियो। गत पुसमा फण्डले ५ करोड २४ लाख रुपैयाँ नाफा गरेको हो।
नाफामा सुधारसँगै फण्डको न्याभ भ्यालु पनि ११ रुपैयाँ ३० पैसा पुगेको छ। एक महिना अगाडि १० रुपैयाँ ५७ पैसा थियो। सूचीकृत शेयरको मूल्यमा सुधारसँगै फण्डको लगानी एक अर्ब नाघेको छ। जसमध्ये सूचीकृत शेयरमा मात्रै ७७ अर्ब ३७ करोड रुपैयाँ लगानी छ। ५ करोड रुपैयाँ ऋणपत्रमा लगानी गरेको फण्डको तरल पैसा भने २१ करोड ५ लाख रुपैयाँ छ।
एनआइबिएल प्रगति फण्ड
एनआइबिएल प्रगति फण्डको नाफा एक महिनाकै अवधिमा १६२ प्रतिशतले सुधार भएको छ। माघ महिनाको न्याभ रिपोर्टअनुसार फण्डको नाफा १० करोड रुपैयाँ छ। पुस महिनामा फण्डको नाफा तीन करोड ८४ लाख रुपैयाँ थियो। यो नाफा फण्डले खरिद गरेको शेयरको मूल्यमा भएको सुधारले वृद्धि भएको हो।
नाफामा सुधारसँगै न्याभ भ्यालु ८ रुपैयाँ ७९ पैसाबाट ९ रुपैयाँ ६३ पैसा पुगेको छ। फण्डले जम्मा लगानी ६४ करोड ७६ लाख रुपैयाँ छ। जस मध्ये सूचीकृत कम्पनीको शेयरमा ५२ करोड ४९ लाख रुपैयाँ लगानी छ।
एनआइबिएल सहभागिता फण्ड
एनआइबिएल सहभागिता फण्डले एक महिनाको अवधिमा ४१ प्रतिशतले नाफा सुधार गरेको छ। फण्डले माघ महिनामा एक करोड ३० लाख रुपैयाँ नाफा गरेको छ।
पुसमा फण्डको नाफा ९२ लाख १२ करोड रुपैयाँ थियो। एकमात्रै खुला मुखी म्युचुअल फण्ड एनआइबिएल सहभागिता पनि विस्तारै नाफामा देखिन थालेको हो। यस फण्डले जहिले पनि आफ्नो इकाई बिक्री गर्न सक्छ। बजार सुधार हुन थाले सँगै यस्ता फण्डमा लगानी गर्ने लगानीकर्ता धेरै हुन्छ।
यसको कारोबार दोस्रो बजारमा हुँदैन। कारोबारका लागि फण्ड आफैले व्यवस्था गरेको हुन्छ। तोकिएका स्थानबाट खरिद बिक्री गर्न मिल्ने व्यवस्था गरिएको हुन्छ। यस फण्डको आकार जम्मा २० करोड २५ लाख रुपैयाँ मात्रै छ।
नाफामा सुधारसँगै फण्डको न्याभ भ्यालु सुधार भइ १० रुपैयाँ ६१ पैसा पुगेको छ। फण्डले सूचिकृत कम्पनीहरुमा मात्रै ८ करोड तीन लाख रुपैयाँ लगानी गरेको छ भने मुद्दती निक्षेपमा दुई करोड लगानी गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।