काठमाडौं- डेरी उद्योगीहरुले सरकारले प्रतिबन्ध लगाएको धुलो दूध आयात प्रतिबन्ध फुकुवा गर्न माग गरेका छन्।
नेपाल डेरी उद्योग संघको ११ औं वार्षिक साधारण सभामा आयोजित कार्यक्रममा बोल्दै डेरी उद्योगीहरुले धुलो दूध आयात प्रतिबन्ध फुकुवा गर्नुपर्ने माग राखेका हुन्।
नेपालमा उत्पादित दूधले नेपाल आत्मनिर्भर बनिनसकेकाले धुलो दूध आयातमा प्रतिबन्ध गर्न नहुने उनीहरुको भनाइ छ।
कार्यक्रममा बोल्दै नेपाल डेरी उद्योग संघका अध्यक्ष अरनिकोराज भण्डारीले सरकारले डेरी उद्योगीहरुलाई प्रोत्साहन गर्न नसकेको बताए।
‘अहिले नेपालमा किसानले मिल्क होलिडे मनाउनुपर्ने अवस्था छैन, सिजनमा बढि उत्पादन भएको दूधबाट धुलो बनाउन सुरु भइसकेको छ, जसले गर्दा सरकारले धुलो दूध आयातमा सँधै प्रतिबन्ध लगाइराख्नुपर्ने अवस्था छैन‚’ उनले भने।
हिउँदको समयमा नेपालमा दूध तथा दूधजन्य पदार्थको अभाव सिर्जना हुने हुँदा डेरीमा प्रयोग हुने धुलो दूध आयातमा प्रतिबन्ध लगाउन नहुने उनीहरुले बताएका हुन्।
कार्यक्रममा बोल्दै नेपाल डेरी एशोसियसनका अध्यक्ष राधाकृष्ण सापकोटाले सरकारले धुलो दूध आयातमा प्रतिबन्ध लगाएपछि उद्योगीहरु करोडौंको घाटामा गएको बताए।
‘दूध सँधै एकनासले उत्पादन हुँदैन। कम उत्पादन हुने सिजनमा धुलो दूध आयात गर्न खुल्ला गरिनुपर्दछ।’ एशोसिएशनका अध्यक्ष सापकोटाले भने।
‘उद्योग एशोसिएसनले नेपालमा अब मिल्क होलिडे हुन दिँदैन, सरकारले जसरी पनि धुलो दूध आयात प्रतिबन्ध फुकुवा गर्नुपर्दछ‚’ अध्यक्ष सापकोटाले थपे। डेरी उद्योगमा नीजि क्षेत्रको लगानीमा सरकारले बेवास्ता गरेको उनको भनाइ छ।
डेरी उद्योगमा करीब ५ लाख मानिसहरु प्रत्यक्ष वा अप्रत्यक्ष रुपमा संलग्न रहेको डेरी उद्योग संघले जनाएको छ। दुग्ध व्यवसायले युवा पलायन रोक्न ठूलो भूमिका खेलिरहेको तर सरकारले यसमा बेवास्ता गरेको उद्योगीहरुको आरोप छ।
धुलो दूध आयात प्रतिबन्ध फुकुवा नगरियोस् : केन्द्रीय दुग्ध सहकारी संघ
केन्द्रीय दुग्ध सहकारी संघले भने विदेशबाट धुलो दूध आयात गरे किसान मारमा पर्ने जनाएको छ।
‘पटक पटक किसानलाई मारमा पार्ने काम नगरियोस् धुलो दूध आयात प्रतिबन्ध कायम राख्नुपर्छ। धुलो दूध आयात प्रतिबन्ध फुकुवा गरियो भने फेरि किसानले मिल्क होलिडे मनाउनुपर्ने दिन आउँछ। फेरि किसानले दूध सडकमा पोखेको रमिता हेर्नुपर्ने दिन नआओस्‚’ केन्द्रीय दुग्ध सहकारी संघका अध्यक्ष नारायण देवकोटाले भने।
सहकारीले हरेक दिन ८ देखि ९ लाख लिटरको हाराहारीमा दूध संकलन गरिरहेको जनाएको छ।
‘हामी दैनिक ४ करोडदेखि ५ करोड सहरबाट संकलन गरेर गाउँका किसानसम्म पुर्याइरहेका छौं, नेपालमा दूध उत्पादनको अवस्था बिस्तारै आत्मनिर्भरतर्फ अग्रसर भइरहेको छ। बरु केही समय दूध कम खाउँ तर परनिर्भरभन्दा आत्मनिर्भरतर्फ लागौं।’ उनले थपे।
सिजनमा धेरै दूध उत्पादन भएको अवस्थामा त्यसलाई प्रशोधन गरेर नेपालमै धुलो दूध उत्पादन गर्न सकिने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768212196.png)
-1768207138.png)
-1764146706.png)
