काठमाडौं- चालु आर्थिक वर्ष २०७६/७७ को पहिलो ७ महिना अवधिमा मुलुकले ७ खर्ब ३८ अर्ब ६३ करोड १५ लाख रुपैयाँ बराबरको व्यापार घाटा व्यहोरेको छ।
भन्सार विभागको तथ्यांकअनुसार व्यापार घाटा अघिल्लो आर्थिक वर्षको सोही अवधिको तुलनामा ५ दशमलव ३३ प्रतिशतले घटेको छ। गत आर्थिक वर्ष २०७५/७६ को माघ मसान्त सम्ममा नेपालले गरेका कुल वैदेशिक व्यापारमा ७ खर्ब ८० अर्ब रुपैयाँ बराबरको व्यापार घाटा व्यहोरेको थियो।
चालु आर्थिक वर्षको माघ मसान्त सम्ममा कुल ८ खर्ब ३ अर्ब ६० करोड २८ लाख रुपैयाँ बराबरको आयात र ६४ अर्ब ९७ करोड १२ लाख रुपैयाँ बराबरको निर्यात भएको छ। चालु आर्थिक वर्षको यो अवधिमा मुलुकले गरेको कुल आयात गत आर्थिक वर्षको सोही अवधिको तुलनामा ३ दशमलव ५६ प्रतिशतले कम हो भने निर्यात २२ दशमलव ४१ प्रतिशतले बढी हो।
गत आर्थिक वर्षको पहिलो ७ महिना अवधिमा मुलुकले ८ खर्ब ३३ अर्ब २६ करोड ८५ लाख रुपैयाँ बराबरको आयात गर्दा ५३ अर्ब ७ करोड ८७ लाख रुपैयाँ बराबरको निर्यात गरेको भन्सार विभागको तथ्यांकले देखाउँछ।
गत आर्थिक वर्षको तुलनामा चालु आर्थिक वर्षको ७ महिना अवधिमा नेपालले गर्ने कुल वैदेशिक व्यापार पनि घटेको देखिएको छ। गत आर्थिक वर्षको माघ महिनासम्म नेपालले कुल ८ खर्ब ८६ अर्ब ३४ करोड ७१ लाख रुपैयाँ बराबरको वैदेशिक व्यापार गरेकोमा चालु आर्थिक वर्षको सोही अवधिमा ८ खर्ब ६८ अर्ब ५७ करोड ४० लाख रुपैयाँ बराबरको वैदेशिक व्यापार भएको छ।
पाम आयल बन्देजपछि माघमा ७ अर्ब ७० करोड रुपैयाँ बराबरमात्रै निर्यात
भारत सरकारले पाम आयलको आयातमा प्रतिबन्ध लगाएपछि त्यसको असर नेपालको निर्यातमा देखिएको छ। भारतको बन्देजपछि माघ महिनामा नेपालबाट हुने पाम आयल निर्यात ठप्प भएको थियो।
चालु आर्थिक वर्षको पहिलो ६ महिना अर्थात् पुस मसान्तसम्ममा २६ दशमलव १३ प्रतिशत बराबर देखिएको निर्यात वृद्धिदर माघ मसान्तसम्म घटेर २२ दशमलव ४१ प्रतिशतमा कायम भएको छ।
माघ महिनामा ७ अर्ब ७० करोड रुपैयाँ बराबरमात्रै निर्यात देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771329290.png)
-1764146706.png)
