काठमाडौं- शेयर बजार सुधार हुन थालेसँगै अनलाइन प्रणालीबाट कारोबार गर्नेको संख्या बढ्न थालेको छ। दोस्रो बजारमा ४० प्रतिशत कारोबार लगानीकर्ता आफैंले अनलाइन प्रणालीमार्फत गरेका छन्।
नेपाल स्टक एक्सचेन्जका अनुसार आइतबार भएको कारोबारमा लगानीकर्ता आफैंले अनलाइन प्रणालीबाट एक अर्ब ५९ करोड रुपैयाँको कारोबार गरेका छन्।
आइतबार ३० हजार ४ सय ५७ वटा कारोबार हुँदा इतिहासकै सबैभन्दा धेरै कारोबार भएको थियो। जसमा १२ हजार २ सय ९५ जना लगानीकर्ताले शेयर खरिद बिक्री गरेका थिए। जसमध्ये तीन हजार १ सय ८८ जनाले आफ्नै युजरनेमबाट कारोबार गरेका हुन्।
उनीहरुले १५ हजार २ सय ९५ वटा कारोबार गरेका छन्। हिजो भएको कारोबारमा ३८ लाख ४० हजार कित्ताको शेयर खरिद बिक्री भएको थियो। नेप्सेले गत वर्षको कात्तिकमा अनलाइन प्रणालीको सुरुवात गरेको थियो।
अनलाइन प्रणाली सुरु गरेको केही समय समस्या देखिदा लगानीकर्ताहरुले आन्दोलन नै गरेका थिए। अनलाइन प्रणालीमा लगभग समस्या हट्दै गए पनि लगानीकर्ताहरु अनलाइन प्रयोग गरिरहेका थिएनन्।
दोस्रो बजार सुधार हुन थालेसँगै लगानीकर्ताहरु आफैंले शेयर खरिद बिक्रीका लागि आदेश दिन थालेका हुन्। अधिकांश लगानीकर्ताहरु ब्रोकर कार्यालयमै जाने र ब्रोकरहरुकै सल्लाहमा उनीहरुलाई नै शेयर खरिद बिक्री गराउँदै आएका थिए।
लगानीकर्ताले नै अर्डर गर्दा ब्रोकर हैरानमा
सर्वसाधारण लगानीकर्ता आफैंले कारोबार गर्दा ब्रोकरहरु हैरानमा पर्न थालेका छन्। हरेक कारोबारलाई नजिकबाट नियाल्ने ब्रोकरहरु पछिल्लो समय आफूले कारोबार गर्नेभन्दा पनि अरुले गरेको कारोबारको सुक्ष्म अध्ययनमा व्यस्त छन्।
ब्रोकरको हातबाट कारोबार हुँदा उनीहरुलाई कसले कसरी कारोबार गरिरहेको छ भन्ने थाहा हुन्छ। तर अहिले लगानीकर्ता आफैंले कारोबार गर्न पाउछन्।
लगानीकर्ताले आफूखुसी गरेको कारोबारको सूचना ब्रोकरहरुले प्राप्त गर्न सक्दैनन्। त्यसैले ठूला लगानीकर्ताहरुको रणनीतिलाई उनीहरुले नजिकबाट नियाल्नुपर्ने अवस्था सिर्जना भएको हो।
एक ब्रोकरले भने‚ 'लगानीकर्ताहरुले आफूखुसी कारोबार गर्न थालेपछि कारोबार अवधिभर बजार नियालेर बस्नुपर्ने अवस्था आएको छ।' ब्रोकरहरु आफैं पनि बजारका ठूला लगानीकर्ता हुन्।
बजारको ४० प्रतिशत कारोबार उनीहरु आफैंले गरिरहेका हुन्छन्।
ब्रोकर आफैंले भ्याएसम्म कम्पनीको शेयर मूल्यमा केही हदसम्म तल माथि गर्न सक्ने सामर्थ्य राख्छन्। तर ठूलो संख्यामा लगानीकर्ताले शेयर खरिद बिक्री गर्दा ब्रोकरलाई बजारको विश्लेषण गर्न गाह्रो पर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786270026-1786586748.jpeg)
-1786602170.png)
