काठमाडौं- सेयर बजारका लगानीकर्ताले तीन महिनाको अवधिमै ४ खर्ब ६९ अर्ब रुपैयाँ कमाएका छन्। ठिक तीन महिना अगाडि मंसिर १० गते बजार पूँजीकरण १४ खर्ब ५० अर्ब रुपैयाँ मात्र थियो। सो समयमा नेप्से सूचक ११०९.१७ अंक थियो।
नेप्से सूचक सबैभन्दा बढी हुँदा बजार पुँजीकरण २० खर्ब ७० अर्ब रुपैयाँ थियो। त्यतिबेलाको सूचीकृत कम्पनीको चुक्ता पुँजीभन्दा अहिले तीन गुणा भन्दा बढी चुक्ता पुँजी थपिइसकेको छ।
सेयर संख्या तीन गुणा भन्दा बढीले थपिँदा नेप्से सूचक तीन सय अंक कम हुँदै बजार पुँजीकरण यसअघिको रेकर्ड आसपास पुगेको हो।
तीन महिनाको अवधिमा सेयर बजार ३ सय ९४ अंकले सुधार भएर १५०४.१४ अंक पुगेको छ। सूचकमा सुधार सँगै आइतबार बजार पुँजीकरण १९ खर्ब १९ अर्ब रुपैयाँ पुगेको हो।
यसै अवधिमा सबैभन्दा धेरै जीवन बीमा कम्पनीका सेयरधनीहरूले कमाएका छन्। तीन महिनाको अवधिमा जीवन बीमा कम्पनीको सूचक मात्रै ३ हजार ७ सय ३१ अंकले बढेको छ।
त्यस्तै माइक्रोफाइनान्सको सूचक १ हजार २ सय ५५ अंकले सुधार भएको छ।
यसै अवधिमा औषतमा माइक्रोफानान्सका सेयरधनीहरूको प्रतिकित्ता १ हजार २ सय ४४ रुपैयाँले बढाएका छन्। केही कम्पनीको सेयर खरिद गर्दाको अवस्थामा नेप्से सूचक सबैभन्दा उच्च र सम्बन्धित कम्पनीको सेयर सबैभन्दा उच्च भएको अवस्थामा किन्नेहरू भने अझै घाटामा रहेको बजार विश्लेषक बलराम रिमालले बताए।
केही वाणिज्य बैंकहरू सिभिल, सेञ्चुरी, कुमारी, मेगालगायतका कम्पनीको सेयरमा बोनस र हकप्रद खाँदा पनि घाटा देखिन्छ। तर अधिकांश कम्पनीको सेयर त्यस बखतमा किन्दा पनि नाफामा देखिन थालेको हो।
बिमा कम्पनी र माइक्रोफाइनान्सका सेयरधनीहरू भने लगभग नाफामा देखिइसकेका छन्। विगत दुई वर्षको अवधिमा सेयर किन्नेहरू लगभग सबै नाफामा देखिएका छन्। तर जलविद्युत कम्पनीका सेयरधनीहरू भने घाटामै छन्।
जलविद्युत कम्पनीहरूले वित्तीय अनुशासन कायम नगरेको हल्ला बजारमा चल्न थालेसँगै यी कम्पनीको सेयर मूल्यमा भारी गिरावट आएको थियो। सेयर बजार ११०० को लाइनमा हुँदा अधिकांश जलविद्युत कम्पनीको सेयर मूल्य आधार मूल्य भन्दा तल झरेको थियो। यसै अवधिमा जलविद्युत कम्पनीको सूचक १ सय १२ अंकले मात्रै सुधार भएको छ।
दोस्रो बजारमा लगानी गर्ने म्युचुअल फन्डहरू तीन महिना अगाडि आधारमूल्य भन्दा तल झरेका थिए। तर बजार सुधार सँगै फन्डहरुको औषत मूल्य १०.५४ रुपैयाँ पुगेको छ। बजार सुधार हुँदा सबैभन्दा धेरै कमाउनेमा म्युचुअल फन्ड छन्। अर्बौं रुपैयाँको पोर्टफोलियो एकाएक सुधार हुँदा उनीहरूको न्याभ रिपोर्ट सुधारिएर आउनेछ।
सेयर बजार लगातार घट्दा विगतमा लगानीकर्ताहरुले अर्बौं रुपैयाँ गुमाएका थिए। यसै अवधिमा केही लगानीकर्ताहरुले घाटा सहन नसकेर चरम निराशामा थिए। बजारबाट अकुत कमाउने लोभमा आफ्नो क्षमता भन्दा बढी लगानी गर्दा उनीहरू फसेका थिए।
लगानीकर्ताहरूको पुरानो घाटा पुर्ति हुन अझै केही समय लागे पनि विगत दुई वर्षको अवधिमा सेयर किन्नेहरूले रातारात पैसा कमाएको बजार विश्लेषक बलराम रिमालले बताए। एक वर्षको अवधिमा छिरेका नयाँ लगानीकर्ता सबैभन्दा बढी लाभांन्वित छन्। यसै अवधिमा माइक्रोफाइनान्स र बीमा कम्पनीमा सेयर किन्नेहरूले करोडौं कमाइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791822485.png)
-1786602170.png)
