काठमाडौं- कीर्तिपुर मैदानमा नेपालले दिएको २ सय ५० रनको लक्ष्य। राम्रो बलिङ मानिएको टिम र कम रन बन्ने मैदानमा नेपालले हार्ला भन्ने कल्पना समर्थकमा थिएन। तर, देखा परे अकिब इलियास।
अकिबको पहिलो एकदिवसीय शतक नेपाली टिमका लागि हारको मुख्य कारण बन्यो। अविजित रहेका अकिबले १ सय ८ बलमा १ सय ९ रन बनाए। जसमा उनले १२ चौका र १ छक्का हानेका थिए। ब्याटिङमा मात्र होइन त्यसअघि १० ओभर बलिङ गरेका अकिबले ३६ रन मात्र दिएर ४ विकेट लिएका थिए।
पाकिस्तानको सियालकोटमा जन्मिएका अकिबले नेपाली मैदानमा ओमानका लागि पहिलो एकदिवसीय शतक बनाएका हुन्। जुन शतक अकिबले नेपाली दर्शकमा समर्पित गरे।
अर्धशतक पूरा गर्दा टिमका साथीहरु तिर फर्किएर ब्याट उठाएका अकिबले शतक हानेपछि पहिले दर्शकतिर फर्किएर ब्याट उठाए। यसको खास कारण बताउँदै उनी भन्छन्- ‘जीवनमै यति गजवका दर्शक कहिल्यै देखेको थिइनँ।’
‘हामीले अहिलेसम्म नेपालमा जस्तो गजवको दर्शक कतै देखेकै थिएनौँ। दर्शकको यस्तो उत्साह मैले पनि जीवनमै पहिलोपटक देख्दैछु। आफ्नो टिमलाई समर्थन गरिरहेका उनीहरु जब विपक्षीले राम्रो खेल्छन् तब उनीहरुलाई पनि समर्थन गर्छन्। यसैले मैले शतक बनाएपछि पहिले दर्शकतर्फ फर्केर नै ब्याट उठाएँ’, अकिब भन्छन्, ‘मेरो टिमतर्फ फर्केर त फेरि पनि खुसी मनाउन सकिहाल्छु तर थाहा छैन नेपालको यस्तो गजवको दर्शकसँग अब कहिले भेट हुन्छ।’
अकिब एक समय ३७ रन बनाएर खेलिरहँदा करण केसीको बलमा धन्नै आउट भइसकेका थिए। उनको सट पोइन्टमा रहेका अरिफ शेखले मिस गर्न पुगेका थिए। जसले गर्दा अकिबले थप सम्हालिने अवसर पाए।
‘हामीले निकै राम्रो खेल्यौँ, नेपालले पनि राम्रो ब्याटिङ गरेको हो तर आजको दिन हाम्रो थियो। हामीले सुरुदेखि नै राम्रो ब्याटिङ गर्न सक्यौँ। साझेदारीहरु बन्दै गयो’, उनी भन्छन्, ‘हामीलाई प्रशिक्षकले तिमीहरु राम्रो गर्न सक्छौँ, खराब सट नखेल र सकरात्मक भएर अगाडि बढ भन्नुभएको थियो, हामीले त्यसै गर्यौँ। नेपालमा खेलमा फर्कने अवसर नै दिएनौँ।’
नेपालविरुद्धको जित ओमनको एकदिवसीय जितमध्ये एक उत्कृष्ट जित भएको भन्दै उनी थप्छन्- ‘राम्रो लक्ष्य पछ्याउँदा हामी ढुक्कले खेल्न सक्यौँ। दुई विकेट मात्र गुमाएर २ सय ५० रनको लक्ष्य भेट्टायौँ। नेपाली टिममा राम्रा बलरहरु हुँदा पनि हामीले यसरी खेल जित्नु राम्रो कुरा हो।’
शतक बनाउँदाको खुसीभन्दा ठूलो एक ब्याट्सम्यानका लागि अरु सायदै होला। त्यसमा पनि अकिबले त बलिङमार्फत पनि अलराउन्ड खेल देखाएका थिए। ‘शतक बनाएको खुसी त असाध्यै छ। योभन्दा ठूलो खुसी अर्को केही हुँदैन। अझ आफैले चार विकेट लिएको खेलमा शतक पनि बनाउन सक्नु त दोहोरो खुसी हो’ खेलपछि उनले सुनाए।
आफू चोटका कारण टिमबाहिर रहेको र क्रिकेटमा फर्कन्छु भन्ने यकिनसमेत नहुँदा प्रशिक्षकको आग्रहमा टिममा आएको सुनाउँदै उनी भन्छन्– ‘घाइते भएर बाहिर बसेको बेला सबैले टिममा बोलाउनुभएको थियो। म त खेलमा फर्कन्छु भन्ने सोच पनि थिएन। साथीहरु र प्रशिक्षकले खेल्नुपर्छ भनेर बोलाउनुभयो। यस्तोमा आएर शतक बनाउन सक्नु अहिलेसम्मकै सबैभन्दा खुसीको क्षण हो।’
सबै खुसीको क्षणमा पनि अकिबका लागि सबैभन्दा खुसीको अवस्था दर्शकको उपस्थिति नै हो। अकिबको शतकमा तालि बजाएर सम्मान गरेका दर्शकलाई उनले पनि झुकेर सम्मान गरे।
अकिबले आफ्नो जर्सी खेलपछि एक दर्शकलाई उपहारस्वरुप दिए। ओमानको गर्मीमा अभ्यास गरे पनि नेपालको चिसो मौसममा छिटो घुलमिल हुन सक्नुको जस पनि अकिब दर्शकलाई नै दिन्छन्।
‘यहाँको मौसमको अवस्था पनि हाम्रोमा भन्दा भिन्न छ। त्यहाँ ४० डिग्रि भन्दा माथिको तापक्रममा अभ्यास गर्दा धेरै समय मेहनत गर्न पनि सकिँदैन। लगातार दुई दिन खेल्ने त कल्पना पनि हुँदैन’, उनी भन्छन्, ‘यहाँ त अलि चिसो मौसम छ र खेलिरहन पनि सकिन्छ। मुख्य त दर्शकको जोशले खेलाडीले पनि शक्ति पाउँछन्। यसैले हामी यहाँ छिटै घुलमिल भइहाल्यौँ।’
जारी त्रिदेशीय सिरिजको पहिलो खेलमा नेपालविरुद्ध १६ रन बनाउँदा उनी रन आउट हुन पुगेका थिए। त्यसमा दुई ओभर बलिङ गरेका उनले आठ रन मात्र दिएर एक विकेट पनि लिएका थिए। जसमा ओमन १८ रनले विजयी भएको थियो।
सिरिजको दोस्रो खेलमा अमेरिकाविरुद्ध अकिबले १ सय १० बलमा ७२ रन बनाएका थिए। जसमा उनले ६ चौका र २ छक्का हानेका थिए। अमेरिकाविरुद्ध ५ ओभर बलिङ गरेका उनले २० रन खर्चेर २ विकेट लिएका थिए।
सन् २०१९ को अप्रिलमा नामिबियामा भएको आइसिसी विश्व क्रिकेट लिग डिभिजन टुमा उपविजेता रहँदै ओमनले एकदिवसीय मान्यता पाएको थियो। त्यही प्रतियोगिताले उनीहरुले अहिले भइरहेको आइसिसी क्रिकेट विश्व कप लिग टुमा स्थान बनाएका थिए। जसमा उनीहरुले ९ खेलमा ७ खेल जितिसकेका छन्।
ओमन, नेपाल र अमेरिकासहित स्कटल्यान्ड, नामिबिया, युएई र पपुवा न्यु गिनी रहेको लिग टुमा १४ अंकसहित ओमन नै शीर्ष स्थानमा छ। दोस्रोमा रहेको अमेरिकाले १० खेलमा ६ खेल जितेर १२ अंक बनाएको छ। ३ खेल खेलेको नेपालले १ जितसहित २ अंक जोडेको छ।
सन् २०१९ अप्रिल २७ मा नामिबियाविरुद्ध एकदिवसीय डेब्यू गरेका अकिब त्यसपछि हरेक खेलमा ओमानका लागि महत्वपूर्ण सावित भएका छन्। त्यसअघि पनि डिभिजन थ्री, डिभिजन टु हुँदै ओमान टिमलाई अगाडि बढाउन अकिबको भूमिका प्रशंसायोग्य छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
