काठमाडौं- निर्माण तथा प्रविधिका सम्बन्धमा जानकारी दिने उद्देश्यले आयोजित नेपाल बिल्डकन अन्तराष्ट्रिय मेला भ्रमण गर्नेहरूको संख्या उल्लेख्य भएको आयोजकले जानकारी दिएको छ।
शनिबार दोस्रो दिन मेला हेर्न आउनेहरूको आकर्षण तथा चहलपहल अपेक्षाकृत नै रहेको बताइएको छ।
मिडिया स्पेस सोलुसन्स प्रालि र फ्युचरेक्स ट्रेड फेयर एन्ड इभेन्टले संयुक्त रुपमा आयोजना गरेको यस मेलाले नयाँ नयाँ प्रविधिका बारेमा जानकारी गराउन कोसेढुंगा सावित हुने दाबी छ।
यी हुन् मेलाका आकर्षण
आइतबारसम्म चल्ने तीनदिने मेलामा विश्वका विभिन्न देशका ख्यातिप्राप्त ३ सयभन्दा बढी ब्रान्डका २ सय स्टल राखिएका छन्। अन्तराष्ट्रिय ब्रान्डसँगै बाहुबली सिमेन्ट, बालाजी सिमेन्ट, पञ्चकन्या स्टिल्स, आइकोन हार्डवेयरलगायत नेपाली ब्रान्डका पनि स्टल छन्।
अन्तराष्ट्रिय बजारका कन्स्ट्रक्सन सामग्री, मेसिन, हेभी इक्वेपमेन्ट, विन्डोज मेसिनरी, बाथरुम फिटिङ, हार्डवेयर, पाइप, प्रि-इन्जिनियरिङ विल्डिङ, अर्थ मुभिङ इक्वेप्मेन्ट, मेट्रियल ह्याण्डलिङ इक्वेपमेन्ट आल्मुनियम कम्पोसाइट प्यालन लगायत सामग्री प्रदर्शनमा छन्।
बिल्डकन मेला किन?
निर्माण कम्पनी, डिलर, सब डिलर तथा बिक्रेताहरूले निमार्ण व्यवसायसँग सम्बन्धित उत्पादनबारेमा जानकारी गराउने र यस क्षेत्रमा आउने नयाँ प्रविधिको जानकारीका लागि बिल्डकन मेलाले विगत ५ वर्षदेखि निरन्तरता पाइरहेको छ।
यसअघि यो मेला बिल्डकन तथा उड एक्स्पोको रूपमा सञ्चालन हुँदै आएको थियो। गत वर्षदेखि भने निर्माण केन्द्रित गरी बिल्डकन एक्स्पोका रुपमा सञ्चालन हुन थालेको हो।
२०७२ सालको विनाशकारी भूकम्पपछि भत्किएका भौतिक संरचनाहरुको सुरक्षित तथा व्यवस्थित पुनः निमार्ण बारे आम उपभोक्तालाई सचेत गर्न यो मेलाको आयोजना गरिएको हो।
मेलामा भूकम्पप्रतिरोधी निर्माण सामग्रीहरू प्रदर्शनीमा राखिएका छन्।
उल्लेख्य सहभागिता
मेलामा घर बनाउन चाहने व्यक्ति, निर्माण क्षेत्रमा काम गरिरहेका व्यक्ति, आर्कीटेक्ट, इन्जिनियर, कन्ट्याक्टर्स, विल्डर्स तथा डिजाइनरको सहभागिता रहेको छ।
लक्ष्यअनुसार नै सम्बन्धित सरोकारवालाहरुको आगमन भएको व्यापारीहरूले बताएका छन्।
बाहुबली सिमेन्टका मार्केटिङ म्यानेजर राजु जोशीले मेलामा सम्बन्धित सबैको उल्लेख्य सहभागिता रहेको बताए।
मेलाले करिब ५ महिनादेखि बजारमा आएको बाहुबली सिमेन्टप्रति उपभोक्ताको आकर्षण अझ बढेको उनले बताए।
‘अन्य सिमेन्टका तुलनामा बाहुबली सिमेन्ट थप गुणस्तरीय छ, केही मिसावट छैन, मेलाबाट थुप्रैले हामीसँग चासो राख्नु भएको छ,’उनले भने।
प्रदर्शनीले नेपालमा हाल भइरहेको समग्र निमार्ण क्षेत्रको विकास, पुननिमार्ण तथा आधुनिकीकरणमा टेवा पुग्ने आयोजकले विश्वास लिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762935254.png)
