काठमाडौं- भारतले सन् २०२०-२०२१ मा ६ देखि ६.५ प्रतिशतको आर्थिक वृद्धिदर हासिल हुने पूर्वानूमानसहित आर्थिक सर्वेक्षण प्रस्तुत गरेको छ। चालु वर्षमा अर्थतन्त्र सुस्ताए पनि आगामी वर्ष ६ प्रतिशतभन्दा माथिको वृद्धिदर हासिल हुने अर्थमन्त्री निर्मला सिथारमणले अनुमान सार्वजनिक गरेकी हुन्।
आउँदो अप्रिल १ मा आफ्नो पहिलो बजेट ल्याउन लागेकी सिथारमणले त्यसअघि आर्थिक सर्वेक्षण प्रस्तुत गर्दै अर्थतन्त्रको वृद्धिदरबारे ताजा अनुमान सार्वजनिक गरेकी हुन्। चालु वर्ष आर्थिक वृद्धिदर खुम्चिए पनि अर्को वर्ष बलियो स्वरुपमा अर्थतन्त्र मोडिने अर्थमन्त्री सिथारमणले बताएकी छन्।
गत वर्षको आर्थिक सर्वेक्षणले भारतको आर्थिक वृद्धिदर ७ प्रतिशत हुने प्रक्षेपण गरेको भए पनि यो ५ प्रतिशतमा सिमित हुने प्रारम्भिक अनुमान यसअघि नै सार्वजनिक भैसकेको छ। भारतको यो आर्थिक वृद्धिदर ११ वर्षयताकै कमजोर हो। लगानी र उपभोगमा आएको नाटकीय गिरावटका कारण आर्थिक वृद्धिदर सुस्त हुन पुगेको यस वर्षको सर्वेक्षणमा उल्लेख गरिएको छ। चालु वर्षमा कर संकलन पनि अपेक्षाअनुसार नहुने सर्वेक्षणमा जनाइएको छ।
चालु वर्षमा लगानी वृद्धिदर १ प्रतिशत रहेको पनि सर्वेक्षणमा जनाइएको छ। गत वर्ष भारतमा लगानीको वृद्धिदर १० प्रतिशत थियो। यसैगरी निर्माण क्षेत्रमा १५ वर्ष यताकै कमजोर अर्थात् २ प्रतिशतको मात्रै वृद्धिदर हासिल हुने पनि सर्वेक्षणमा उल्लेख रेहको अन्तर्राष्ट्रिय सञ्चारमाध्यमहरुले जनाएका छन्।
त्यसअघि संसदमा सम्बोधन गर्दै राष्ट्रपति रामनाथ कोबिन्दले ५ खर्ब अमेरिकी डलर बराबरको अर्थतन्त्र बनाउन सरकार सम्पूर्ण सरोकारवालासँग छलफलमा रहेको बताएका थिए। उनले भारतमा वस्तु तथा सेवा कर (जिएसटी)लाई एक कर प्रणालीका रुपमा कार्यान्वयन गर्न सरकार प्रतिवद्ध रहेको पनि उनले बताएका छन्। प्रविधिको माध्यमबाट यसैलाई प्रभावकारी बनाउँदै लैजाने घोषणा पनि कोबिन्दले गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।