काठमाडौं- अर्थमन्त्री डा युवराज खतिवडाले पुँजी बजारमा संरचनात्मक परिवर्तन भइरहेको बताएका छन्। शेयरमा लगानी गरेका लगानीकर्ताले लामो र झन्झटिलो प्रक्रिया पूरा गर्नुपर्नेमा अहिले धेरै परिवर्तन भइसकेको खतिवडाले बताए।
नेपाल स्टक एक्सचेञ्जको २७ अौँ वार्षिकोत्सवमा अर्थमन्त्री खतिवडाले नेपाल स्टक एक्सचेञ्जको विकल्प खोज्ने बेला नभएको पनि बताए। 'पुँजीको संरचनात्मक परिवर्तन भैरहेको छ, यसले पुँजी बजारलाई गतिशील बनाउँछ भन्ने मेरो विश्वास छ,' उनलेे भने।
सरकारले विगत दुई वर्षमा पुँजीबजार सँग सम्बन्धित धेरै विषयमा सरकारले सुधार गरिरहेको उल्लेख गरे। उनलेे नियामक र सञ्चालकबीच सामान्य विवाद हुनु सामान्य भएको टिप्पणी गरे। 'काम गर्दा ठाकठुक हुन सक्छ तर निर्देशन जारी भैसकेपछि कार्यान्वयन गरौ,' उनलेे भने, 'गतिशील बजारमा अवरोध कसैले गर्न हुँदैन।'
मन्त्री खतिवडाले बुझेर लगानी गर्न लगानीकर्तालाई सुझाव दिए। वास्तविक समयमा राफसाफ गर्ने गरि काम गर्न निर्देशन दिए। 'प्रणाली सुधार गरेर काम गर्नुस् बजार गतिशील हुन्छ,' उनलेे भने, 'बालुवाटार हेर्ने होइन।'
खतिवडाले लगानीकर्तालाई वित्तीय साक्षर बनाउने काम वित्तीय प्रणालीबारे जानकारी राख्ने सबैको भूमिका महत्त्वपूर्ण हुने उल्लेख गरे। उनले लाभांश करको विषय बजेटबाट सम्बोधन गर्ने वचन दिए।
खतिवडाले शेयर बजारलाई निश्चित गतिमा रहन दिनुपर्ने पनि उल्लेख गरे। 'बजार र मानिसको शरीर उस्तै हो, धेरै तापक्रम हुँदा पनि समस्या हुन्छ र कम तापक्रम हुँदा पनि रोग लाग्न सक्छ,' उनलेे भने।
धितोपत्र कारोबारले मात्रै बजार गतिशील नहुने भन्दै उनले ऋणपत्रको कारोबार बढाउनुपर्ने खतिवडाले बताए। प्राथमिक शेयर जारी गर्ने प्रक्रियामा सरलीकरण गरिएको उल्लेख गरे।
नेपाल धितोपत्र बोर्डका अध्यक्ष भीष्मराज ढुंगानाले पुँजी बजारमा योजनाबद्ध र चरणबद्ध सुधार आवश्यक रहेको उल्लेख गरे। उनलेे कारोबारको नियमन अहिलेको चुनौती भएको बताए। उनले दोस्रो बजार र ओटिसी बजारलाई चुस्त बनाउनुपर्ने उल्लेख गरे।
कार्यक्रम नेप्सेका अध्यक्ष लक्ष्मण न्यौपानेले धितोपत्र बजारको सुधारका लागि निरन्तर काम भइरहेको जानकारी दिए।
अहिले संसारभरबाट नेपाली लगानीकर्ताले शेयर कारोबार गर्न सक्ने अवस्था आएको भन्दै यो महत्त्वपूर्ण उपलब्धि भएको बताए।
नेपाल स्टक एक्सचेञ्जका महाप्रबन्धक चन्द्रसिंह साउदले अहिले अनलाइन पूर्णरूपमा सञ्चालनमा रहेको बताए। एक वर्षको अवधि१२ दिन एक अर्ब रूपैयाँ भन्दा धेरैको कारोबार भएको उनले जानकारी दिए। साउदले अनलाइन प्रणालीलाई क्लिएरिङ हाउसमार्फत राफसाफको व्यवस्था मिलाइएको पनि बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
