काठमाडौं- उद्योग, वाणिज्य तथा आपूर्तिमन्त्री लेखराज भट्टले मन्त्रालयको प्रगति र भावी योजनाबारे जानकारी दिन आइतबार बिहान पत्रकार सम्मेलन आयोजना गरेका थिए।
पत्रकार सम्मेलनमा मन्त्रालयका दुवै सचिव यामकुमारी खतिवडा र बैकुण्ठ अर्याल, सहसचिवहरू, वाणिज्य, आपूर्ति तथा उपभोक्ता संरक्षण विभागका महानिर्देशक, नापतौल तथा गुणस्तर विभागका महानिर्देशक र मन्त्रालयका अरु कर्मचारी पनि उपस्थित थिए।
पत्रकार सम्मेलन चलिरहेकै अवस्थामा सचिव बैकुण्ठ अर्यालले पानी पिउन आफ्नो अगाडि राखिएको बोटल समाते। पिउनु अघि त्यसको गुणस्तर, मूल्यलगायत विवरण खुल्ने ‘लेबल’ हेरे। तर देखेनन्। उनले त्यो बोटलमा लेबल नभएको भेटेपछि अर्को बोटल टिपेर पानी पिए। मन्त्रालयका अरू कर्मचारीले सचिव अर्यालको टेबलबाट त्यो बोटल टिपेर राम्रोसँग हेर्न थाले। अर्की सचिव यामकुमारी खतिवडा बोल्ने क्रम चलिरहेको थियो। कार्यक्रममा सहभागी सबैले आफ्नो अगाडि रहेको पानीको बोटल हेर्न थाले।
मन्त्रालयको सभाहलमा राखिएका सबै बोटल ‘अक्वा हन्ड्रेड’ लेखिएको थियो। कुनैमा 'लेबलिङ' थियो, कुनैमा थिएन। पत्रकार सम्मेलनपछि सचिव अर्यालले ती बोटल वाणिज्य, आपूर्ति तथा उपभोक्ता संरक्षण विभागका महानिर्देशक नेत्रप्रसाद सुवेदीलाई जिम्मा लगाए।
उपभोक्ता संरक्षण ऐन २०७५ ले कुनै पनि वस्तुको प्याकेटमा उपभोक्ताले देख्ने गरी लेबल राख्नुपर्ने उल्लेख गरेको छ। विभागले बजार अनुगमनका क्रममा लेबल नभएका वस्तु भेटिए तत्काल कारबाही गर्छ। तर हामीले अनुमान गर्न सक्छौं, संघीय सरकारकै मन्त्रालयको पनि मन्त्रीको टेबलसम्म पुगेको पानीमा उपभोक्ता संरक्षण ऐनले गरेको व्यवस्था लागू हुँदैन भने आम सर्वसाधारणले पिउने पानीमा कति समस्या होला?
सरकारको अर्को निकाय खाद्य प्रविधि तथा गुण नियन्त्रण विभागको तथ्यांकअनुसार खाद्य वस्तुमा सबैभन्दा बढी कैफियत पिउने पानीमा छ। बोटल र जारको पानी पिउनलायक भन्दै उपभोक्ताले पिउने गरे पनि त्यस्तो अधिकांश पानी दुषित भेटिने गरेको विभागको निष्कर्ष छ।
आइतबारको पत्रकार सम्मेलनमा उद्योग, वाणिज्य तथा आपूर्तिमन्त्री भट्टले बजार अनुगमन हुन नसकेको र उपभोक्ताले मूल्य मात्र नभई गुणस्तरमा पनि ठगिनुपर्ने अवस्था रहेकाले बताउँदै बजार अनुगमनमा नयाँ तरिका अपनाएर अगाडि बढ्ने बताए। तर उपभोक्ता कहाँ र कसरी ठगिरहेका छन् भन्ने दृष्टान्त भने मन्त्रीको टेबलबाटै देखियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1786602170.png)
-1789631269.jpg)
