काठमाडौं- अघिल्लो सातादेखि नै उकालो लाग्न थालेको पुँजीबजारले यो साताको पहिलो दिन पनि निरन्तरता पाएको छ। कारोबारको पहिलो दिन आइतबार नेपाल स्टक एक्सचेन्ज (नेप्से) परिसूचक ३ दशमलव ५१ प्रतिशत बढेकाले निरन्तरता पाएको हो। यसको अर्थ आइतबार नेप्से ४२ दशमलव ६१ अंकले बढेर १ हजार २ सय ५५ दशमलव ७२ अंकमा पुगेको हो।
लामो समय १ हजार १ सय बिन्दुको वरिपरि रुमल्लिएको परिसूचक गत साताबाट आक्रामक देखिन थालेको हो। एक सातामा नै नेप्से १ सय बिन्दुभन्दा बढीले वृद्धि भई १ हजार २ सयको बिन्दुमाथि पुगेको छ। सामान्यतया, पुँजीबजार पनि माग र आपूर्तिको सिद्धान्तमा आधारित भएर घटबढ हुने हो। तर पनि पुँजीबजार परिसूचक निर्धारणमा माग र आपूर्तिका अतिरिक्त विभिन्न पक्षले महत्वपूर्ण भूमिका खेल्छन्। पछिल्लो समय नेप्सेमा देखिएको वृद्धिका पछाडि भूमिका खेल्ने विभिन्न कारणबारे नेपाल लाइभले पुँजीबजारसँग सम्बन्धित केही व्यक्तिसँग कुराकानी गरेको छ। सोही कुराकानीको संक्षिप्त र सम्पादित विषय यहाँ प्रस्तुत गरिएको छ।
ब्याजदर घट्ने हल्ला र पर्याप्त तरलताले लगानीकर्ता हौसिए : भरत रानाभाट
अध्यक्ष, स्टक ब्रोकर एसोसियसन अफ नेपाल
बजार १ हजार १ सयको बिन्दुसम्म झरिसकेको थियो। त्यो बढ्दा एकैचोटी १ हजार ५ सयको बिन्दुमा पुग्ने होइन विस्तारै जान हो। अहिले पुँजीबजारमा थोरै विश्वास चाँहि बढेको हो कि जस्तो देखिएको छ। बजार बढ्न त्यो विश्वाश जुटाउन लगानीकर्तालाई गाह्रो भइराखेको थियो। तर परिसूचक १ हजार २ सयभन्दा माथि पुगिसकेपछि अब चाँहि गति लियो है भन्ने परेको हुन सक्छ।
बजारमा बैंकका ब्याजदर घट्ने हल्लाले पनि त्यसको असर पुँजीबजारमा देखिएको हुन सक्छ। बैंक तथा वित्तीय संस्थामा तरलता अभाव समस्या नरहेपछि त्यसको असर ब्याजदरमा पनि देखिन्छ। अर्को कारण भनेको घरजग्गा, गाडीजस्ता क्षेत्रमा जाने कर्जा लगानी राष्ट्र बैंकको कडाइपछि घटेको हुन सक्छ र त्यसको फाइदा पुँजीबजारलाई परेको हुन सक्छ। ती क्षेत्रमा गइरहेको पैसा सेयर बजारमा आउँछ भन्ने सोचले पनि काम गरेको हुन सक्छ।
धितोपत्र बोर्डका अध्यक्ष पनि पुँजीबजारप्रति सकारात्मक देखिएका छन्। सेयरमा लगानी गर्ने भनेको कमाउनकै लागि हो र त्यसलाई राम्रो बनाउन विभिन्न उपकरण थप गर्ने भन्ने उनको भनाइले सकारात्मक भुमिका खेलेको हुन सक्छ। अर्थमन्त्री आफैले पहिला लगानीकर्तालाई आफूसँग भएको पैसा मात्रै लगानी गर्नुस् भन्नुहुन्थ्यो। तर एक कार्यक्रममा 'अब तरलता बढ्यो, सेयरमा लगानी गर्नेले बैंकबाट कर्जा लिन सक्ने अवस्था बन्यो। अहिले बजारमा पैसा छ' भन्ने जुन अभिव्यक्ति आयो, त्यसको असर पनि हुन सक्छ। यसरी सबै क्षेत्र राम्रो भएर बजारमा पनि यसको संकेत देखिएको हो।
५८ बुँदे कार्ययोजना कार्यान्वयन र लगानीयोग्य रकम अभावको समस्या हट्दा बजार सकारात्मक : राधा पोखरेल
अध्यक्ष, नेपाल पुँजीबजार लगानीकर्ता संघ
बैंकका सेयरका लागि भनेर छुट्याइएको रकम अहिले फालाफाल भयो। बैंकमा तरलता अभावको समस्या रहेन। बैंकहरूले पनि पुँजीबजारमा लगानी गर्न थाले। बैंक आफैले हामी बैंक ब्याजदर घटाउँछौं तर ऋण लिन आइदिनुपर्यो भन्ने गरेका थिए। अहिले तरलता अभावको समस्या छैन। लगानी गर्न पर्याप्त पुँजी भएकाले सकारात्मक असर देखिएको हो।
पुसको मसान्तसम्म बजार घटिरहने पहिला देखिको ट्रेन्ड हो। बजार घटबढ हुन सामान्य कुरा हो, तर आर्थिक वर्षको दोश्रो त्रैमासिकपछि केही सकारात्मक प्रभाव देखिन थाल्छ। सरकारले पनि ५८ बुँदे कार्ययोजना चरणबद्ध रूपमा कार्यान्वयनमा गयो।
पुँजीबजारबारका लागि अहिले विस्तारै सकारात्मक वातावरण बन्दै गएको छ। अहिले धितोपत्र बोर्डमा अध्यक्ष पनि पुँजीबजारलाई नजिकबाट बुझेको व्यक्ति आउनु भएको छ। पहिला लगानीकर्ताले राखेका समस्या समयमा समाधान नहुने अर्थ मन्त्रालयले बोर्ड र बोर्डले मन्त्रालयलाई देखाउने अवस्था थियो। अब बुझेको व्यक्ति जिम्मेवारीमा आएपछि त्यसका सकारात्मक नतिजा देखिन्छन् र बजारमा पनि त्यसको असर देखिन्छ भन्ने लगानीकर्तामा विश्वास छ।
लगानीकर्तामा विस्वास जागेकाले बजार बढ्नु स्वभाविक : ताराप्रसाद फुल्लेल
उपाध्यक्ष, सेयर लगानीकर्ता संघ
बजार सकारात्मक हुने लक्षण देखिएको हो। त्यसको पछाडि केही कारण छन्। बजार न्यून बिन्दुमा आइसकेको थियो। न्यून बिन्दुमा पुगिसकेको बजार सधैं घटिराख्ने भन्ने त हुँदैन। अहिले सस्तो दरमा राम्रो कम्पनीको सेयर किन्न पाइराखेको अवस्था छ। त्यसकारण पनि कारोबार संख्या बढी भएकाले बजार बढेको हुन सक्छ।
हालै मात्र धितोपत्र बोर्डमा नयाँ अध्यक्ष आउनु भएको छ। उहाँले पुँजीबजार विकासका लागि भनेर राम्रो स्किम लिएर आउनु भएको छ। उहाँको प्रतिबद्धता राम्रो देखिएको छ। धेरै कुरामा सुधार गर्छु भन्नुभएको छ। त्यो पनि पुँजीबजार बढ्न भुमिका खेलेको सकारात्मक पक्ष हो। अर्थमन्त्रीले पनि हिजोअस्तिका कार्यक्रममा पुँजीबजारसम्बन्धी बोलेका कुराले सकारात्मक असर पारेको हुन सक्छ। अहिलेको बजारमा लगानी गर्दा घाटा खानु पर्दैन भन्ने लगानीकर्तालाई लागेको हुन सक्छ। बजार घट्ने र बढ्ने विषय प्राकृतिक र निरन्तरको प्रक्रिया हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
