काठमाडौं– जेठ, असार र साउन महिनामा बलात्कारका घटना धेरै हुने गरेको प्रहरीको तथ्याङ्कले देखाएको छ। देशभरिको बलात्कार मुद्दाको विश्लेषण गर्दा तीन महिनामा घटना धेरै भएको पाइएको हो।
महानगरीय प्रहरी परिसर काठमाडौंका डिएसपी मोहन थापाले मंगलबार राजधानीमा आयोजित एक कार्यक्रममा पेश गरेको तथ्याङ्कअनुसार गर्मी महिनामा धेरै अपराध हुने गरेका छन्।
गत वर्ष काठमाडौं जिल्लामा बलात्कारका १ सय १२ वटा घटना दर्ता भएका थिए। जसमध्ये असारमा १५, साउनमा १४ र जेठमा १३ वटा बलात्कार भएका थिए। सबैभन्दा कम माघमा २, पुसमा ४ र फागुनमा ६ वटा घटना प्रहरीमा दर्ता भएका थिए।
शुक्रबार, शनिबार र आइतबार बढी घटना
बारका आधारमा बिश्लेषण गर्दा शुक्रबार, शनिबार र आइतबार बलात्कारका धेरै घटना भएका छन्। एक वर्षको अवधिमा आइतबार २१, शनिबार १९ र शुक्रबार १७ वटा घटना भएका छन्। सबैभन्दा कम मंगलबार ११ वटा मात्र घटना भएका छन्।
धेरै जसो बालिका बलात्कारको शिकार
बालात्कृत हुनेमा धेरैजसो बालिकाहरु छन्। १ सय १२ पीडितमध्ये ६२ जना १६ वर्षभन्दा कम उमेरका बालिका छन्। नेपालको कानुन अनुसार १६ वर्षमुनिका बालिकासँग सहमतिमै सम्बन्ध राखे पनि बलात्कार ठहर्ने प्रावधान छ।
त्यस्तै, १७ देखि २५ वर्ष उमेरका ३१ जना, २६ देखि ३५ वर्ष उमेरका १० जना र ३५ देखि ४५ वर्ष उमेरका ९ जना महिला बलात्कारको सिकार भएका छन्। पीडितमध्ये ७९ अविवाहित र ३३ जना विवाहित छन्।
बलात्कारका अभियुक्तमा धेरैजसो २६ देखि ३५ वर्ष उमेरका व्यक्ति रहेको डिएसपी थापाले बताए। पक्राउ परेका १ सय १७ मध्ये ४७ जना यो उमेर समूहका छन्।
१८ जनालाई बिहे गर्ने भनेर बलात्कार
एक वर्षको अवधिमा प्रहरीमा दर्ता भएका घटनामध्ये १८ जनालाई बिहे गर्ने प्रलोभनमा बलात्कार गरिएको छ। प्रहरीका अनुसार धेरैजसो घटना ललाईफकाई तथा प्रलोभनमा पारेर हुने गरेका छन्। ५३ जनालाई फकाएर, ३१ जनालाई प्रलोभनमा पारेर र १० जनालाई धम्काएर बलात्कार भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
