क्रिकेट

मुस्तफालाई दर्शकको साथ, सोमपालको ‘दार्शनिक’ जवाफ

पोखरा- दोस्रो पोखरा प्रिमियर लिग (पिपिएल) टी ट्वान्टी क्रिकेट प्रतियोगितामा सात खेल सकिए। हरेक खेलमा केही रोचक दृश्यहरू देखिइरहेका छन्। बिहीबार चितवन राइनोजले बुटवल ब्लास्टरलाई १ सय १९ रनले हराएको खेलमा पनि त्यस्तै केही दृश्यहरू देखिए।

टस हारेर बुटवलले फिल्डिङ रोजेपछि चितवनका लागि ओपनिङ ब्याटिङमा कप्तान पारस खड्का र युएईका खेलाडी रोहन मुस्तफा आए। सुरुदेखि नै सम्हालिएको ब्याटिङ गरेका दुवैले अर्धशतक हाने।

मुस्तफाले ५६ बलमा ७ चौका २ छक्हासहित अविजित ७० रन साथै पारसले ४० बलमा ६ चौका र २ छक्कासहित ६३ रन बनाए। आक्रामक देखिएका आरिफ शेखले पनि १९ बलमा ३ चौका र ३ छक्कासहित ४० रन बनाए। जसले चितवनले पिपिएलकै कीर्तिमानी २ सय ३ रन बनायो।

२ सय ४ रनको लक्ष्य पछ्याएको बुटवलको ब्याटिङ सम्हालिन सकेन र ८४ रनमा नै अलआउट भयो। १ सय १९ रनको फराकिलो जित बनाएको चितवन अंक तालिकाको शीर्ष स्थानमा रह्यो। चितवनले यसअघिको खेलमा पोखरालाई ६ विकेटले हराएको थियो।

यो सबैका बीच मैदानमा एक खेलाडी आफ्नो उत्कृष्ट खेलका कारण मात्रै होइन दर्शकले दिएको साथका कारण पनि निकै चर्चामा रहे। ब्याटिङमा ७० रन हानेका मुस्तफालाई बलिङ गर्न दिने माग चितवनको बलिङ चलिरहँदा दर्शकबाट नै निरन्तर आइरह्यो।

बाउन्ड्री लाइन नजिक फिल्डिङ गरिरहेका मुस्तफाको नाम लिएर दर्शकले निरन्तर उनको हौसला बढाइरहे। ‘मुस्तफा बलिङ गर’ भन्ने माग दर्शकबाट निरन्तर आइरहँदा मुस्तफाले पनि हाँस्दै भनिदिए– ‘मलाई होइन, पारसलाई भन।’

दर्शकको हुटिङसँग जानकार कप्तान पारसले पनि हातको इशाराले अर्को ओभर मुस्तफालाई बलिङ गराउने दर्शकलाई जवाफ दिए। नभन्दै १३औं ओभरमा पारसले बलिङको जिम्मा मुस्तफालाई नै दिए। जसमा उनले ३ रन मात्रै खर्चिए। त्यसपछि १५औं ओभर बलिङ गरेका उनले १ रन मात्रै दिए। १७औं ओभरमा बलिङ गरेर १ रन मात्रै दिएका उनले २ विकेट पनि लिए।

म्यान अफ दि म्याच पनि बनेका मुस्तफाले खेलपछि भने– ‘मलाई दर्शकले माया गर्ने कारण नेपालमा खेल्न असाध्यै रमाइलो लाग्छ।’

उता पहिलो खेलमा काठमाडौंलाई सुपर ओभरमा हराएको बुटवल चितवनविरुद्ध भने कमजोर देखियो। त्यसमा बुटवलका कप्तान सोमपाल कामीले खेलमा यसै हुन्छ भन्न नसकिने र कहिले राम्रो हुने कहिले नराम्रो हुने स्वभाविक प्रक्रिया भएको बताए।

खेललाई जीवनसँग तुलना गर्दै उनी भन्छन्– ‘सबै कुरा गाह्रो नै हुन्छ। जिन्दगी नै गाह्रो छ नि, हरेक दिन बिहानै उठ्न पर्छ काम गर्न पर्छ। त्यस्तै नै हो क्रिकेट पनि। बलरले बल फाल्छ, ब्याट्सम्यानले रन हान्छ। जुन दिन बल ब्याटमा लाग्छ त्यो दिन राम्रो देखिन्छ। जुन दिन लाग्दैन त्यो दिन नराम्रो देखिन्छ।’

खेलपछि कसले के भने?

रोहन मुस्तफा, चितवन
(म्यान अफ दि म्याच, ५६ बलमा ७० रन। बलिङ– ३ ओभर ५ रन २ विकेट)

सिनियर खेलाडी भएका हिसाबले र विदेशी खेलाडी भएकाले पनि राम्रो गर्नुपर्ने दबाब ममा थियो। यसअघिको खेलमा पोखराविरुद्ध मैले ११ रन मात्रै बनाएको थिएँ। त्यसैले आजको खेल राम्रो गरेकाले मेरो लागि आत्मविश्वास बढाउन निकै सहयोग गरेको छ।

पारससँगको ओपनिङ निकै राम्रो रह्यो। पारस त नेपालका लिजेण्ड खेलाडी नै भइहाले, खेलिरहँदा सकेसम्म धेरै रन बनाउनुपर्छ भन्नेमा नै थियौँ। पारसको सट लागिरहेकाले मैले उसलाई स्ट्राइक मिलाइरहेको थिएँ।

नेपालमा दर्शकको समर्थन पनि मैले निकै राम्रोसँग पाउँछु। यहाँका दर्शक मलाई पनि निकै मन पर्छ। उनीहरुको समर्थनले गर्दा नै नेपालमा हरेक खेल मलाई रमाइलो लाग्छ। साच्चै भन्दा मलाई नेपालमा खेल्न असाध्यै मन पर्छ किनभने दर्शकहरु मेरो नाम लिएर हुटिङ गरिरहेका हुन्छन्। त्यसले आफूले सक्दो राम्रो खेल्ने प्रेरणा पनि पाउँछु। त्यसैअनुसार मेहनत गर्छु।

हुन त कुनै एक दिन खेल कस्तो हुन्छ भन्ने खेलाडी स्वयमको हातमा मात्र हुँदैन तर पनि दर्शकबाट समर्थन पाउँदा राम्रो खेल्ने हौसला त निकै बढ्छ नै।

पारस खड्का, कप्तान चितवन
(४० बलमा ६३ रन, ६ चौका २ छक्का)

आज खेल राम्रो भयो। लगातार दुई खेल जितेका छौं तर दुई खेल जित्नु मात्र पर्याप्त छैन। अगाडि अझै राम्रो गर्नुपर्ने छ। आश गरौँ अहिलेको जस्तै खेल अगाडि पनि हुनेछ। कुनै पनि कुरा सजिलो छैन।

हामीसँग खेलाडीहरु राम्रा छन्। पोजिसनमा पनि धेरै परिवर्तन गर्नसक्ने सुविधा हामीसँग छ। यस्तै खेलिरह्यौं भने हामी अगाडि पुग्ने नै छौं।

पोखराको मैदानमा ठूलो स्कोर पनि बनिरहेको छ। टिमहरु थोरै रनमा आउट हुने पनि देखिएको छ। बिहान ९ बजे सुरु हुने खेलमा पहिले ब्याटिङ गर्न अलि कठीन नै हो कि भन्ने थियो तर हिजो काठमाडौंका लागि ज्ञानेन्द्र मल्लले शतक हानेर त्यसलाई पनि गलत सावित गरिदिएका छन्।

रन हानिसके पनि पिचलाई दोष दिँइदैन, प्रतियोगिता सुरु भएको बेलामा भन्दा अहिले पिचको अवस्था पनि अलि सहज भइसकेको छ। पहिले बल अलि रोकिएर आउने जस्तो थियो, पछिल्लो दिन घाम लागेर अहिले राम्रो भएको छ। अझ धेरै रनहरु बन्छन् कि जस्तो लाग्छ।

आज शतक बनाउने अवसर खेर गयो जस्तो त लाग्यो तर शतकभन्दा महत्वपूर्ण कुरा टिमको जित हो। जितका लागि काम गर्न पाउँदा खुसी लागेको छ। टिमको जित नै मुख्य प्राथमिकतामा रहन्छ। अब अगाडि पनि यस्तै प्रदर्शन गर्न सकौं भन्ने लागेको छ।

एक समर्थकसँग सोमपाल।

सोमपाल कामी, कप्तान बुटवल
(८ बल खेलेर ३ रनमा आउट)

लक्ष्य ठूलो भएकाले सुरुवाती पावरप्लेमा धेरै रन बनाउनै पर्ने थियो। तर टिमको खेल त्यो अनुसार हुन सकेन। हामीले २ सय ४ रन भेट्टाउन सक्छौं भन्ने नै सोेचेको थियौं, यो विकेटमा त्यो सम्भव पनि थियो तर त्योअनुसारको ब्याटिङ हामीले गर्न सकेनौं।

सुरुवातदेखि नै राम्रो हुन सकेन। विकेटमा टिक्न नै अप्ठ्यारो भयो। पहिलो खेल सुपर ओभरमा जितेका थियौं। आज हार्न पुगेका छौं।

यो क्रिकेट हो, के हुन्छ भन्न सकिँदैन। सबै कुरा गाह्रो नै हुन्छ। जिन्दगी नै गाह्रो छ नि, हरेक दिन बिहानै उठ्न पर्छ काम गर्न पर्छ। त्यस्तै नै हो क्रिकेट पनि। बलरले बल फाल्छ, ब्याट्सम्यानले रन हान्छ। जुन दिन बल ब्याटमा लाग्छ त्यो दिन राम्रो देखिन्छ। जुन दिन लाग्दैन त्यो दिन नराम्रो देखिन्छ।

आज हाम्रो त्यस्तै नराम्रो देखिने दिन परेको रहेछ। अब अगाडि राम्रो गर्ने छौं भन्ने लागेको छ। सुधार गर्नुपर्ने कुराहरु धेरै छन्। कसरी मानसिक रुपमा समेत बलियो बनेर अगाडि बढ्ने पनि कुरा पनि गरिरहेका छौं।

चोटका कारण मैले बलिङ गर्न नसक्दा पनि टिमलाई घाटा लागिरहेको छ। मेरो ढाँडमा समस्या देखिएको हो। महत्वपूर्ण खेलहरु अझ अगाडि आउँदै छन्। गएको साग खेलकुदमा पनि मैले बलिङ गरिनँ।

पिपिएलमा नयाँ बलले हामीले जसरी सुरुवात गथ्र्यौं त्यो हुन सकेको छैन। बलरलाई खेलाउन पर्दा एकजना ब्याट्सम्यान पनि अभाव भइरहेको छ। आश गरौं जति पनि बलरहरु छन् उनीहरुले राम्रो गर्नेछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।