काठमाडौं- वैदेशिक रोजगारीमा जाँदा सवारी चालक कामका लागि जाने श्रमिकहरुले अनिवार्य रुपमा नेपालको सवारी चालक अनुमति पत्र (लाइसेन्स) प्राप्त गरेको हुनुपर्ने व्यवस्था कार्यान्वयन गरिने भएको छ। 

योसँगै अब सवारी चालक कामका लागि विदेश जान नेपाली लाइसेन्सको प्रमाणपत्र पनि अनिवार्य रुपमा पेस गर्नुपर्ने भएको हो। 

यसअघि सवारी चालकका रुपमा श्रम स्वीकृति लिएर जाने श्रमिकहरुले लाइसेन्स पेश गर्नु पर्ने व्यवस्था थिएन। 

जसले गर्दा सवारी चालकको नाममा वैदेशिक रोजगारीमा जाने श्रमिकहरु गन्तव्य मुलुकमा पुगेर अन्य काममा संलग्न हुने गरेका थिए। 

सवारी चालकका रुपमा जाने श्रमिकहरुले नयाँ श्रम स्वीकृति लिँदा, श्रम स्वीकृति नविकरण गर्दा वा वैधानिकीकरण गर्दा अनिवार्य रुपमा लाइसेन्स देखाउनु पर्ने व्यवस्था कार्यान्वयनमा ल्याइएको श्रम कार्यालय ताहाचलले जानकारी दिएको छ। 

सवारी चालक कामको लागि जान लागेका तर सवारी चालक अनुमति पत्र नभएका २ सयभन्दा बढी सेवाग्राहीलाई श्रम कार्यालय ताहाचलले फर्काएको कार्यालयले जनाएको छ। 

श्रम कार्यालय ताहाचलका कार्यालय प्रमुुख देवेन्द्र कार्कीले नेपाल लाईभसँग भने, ‘ड्राइभिङका लागि जाने श्रमिकले श्रम स्वीकृति लिन लाइसेन्स अनिवार्य पेश गर्नुपर्दछ। नेपालमा लिएको वा विदेशमा लिएको जुन लाइसेन्स भएपनि अनिवार्य पेश गर्नुपर्दछ । होइन भने सवारी चालक कामका लागि कार्यालयले श्रम स्वकृति दिन मिल्दैन।’ 

यो व्यवस्थाले सवारी चालक कामका लागि वैदेशिक रोजगारीमा पुगेका श्रमिक गन्तव्य मुलुकमा पुगेर पनि सोही पेसामा संलग्न हुने विश्वास गरिएको छ। 

साथै गन्तव्य मुलुकमा सवारी चालक पेशालाई थप सुरक्षित, व्यवस्थित र मर्यादित बनाउनका लागि समेत यो व्यवस्था अगाडी सारिएको श्रम कार्यालय ताहाचलका कार्यालय प्रमुख देवेन्द्र कार्कीको भनाई छ।