काठमाडौं- सामाजिक सुरक्षा कोषमा सूचीकृत हुने श्रमिकहरुको संख्या ५० हजार नाघेको छ।
बुधबार दिउँसो २ बजेसम्म कोषमा ५० हजार १ सय ४० श्रमिकहरु सूचीकृत भएका हुन्। सूचीकृत रोजगारदाताको संख्या ४ हजार ७ सय ९० पुगेको छ।
सूचीकरणका लागि तोकिएको समयसीमा नजिकिँदै गर्दा आबद्ध हुन आउने रोजगारदाता तथा श्रमिकको संख्या पनि बढ्दै गएको सामाजिक सुरक्षा कोषका कार्यकारी निर्देशक कपिल ज्ञवालीले बताए।
‘कोषमा सूचीकृत हुनेमा ठूलाठूला रोजगारदाता रहेका छन्,’ कार्यकारी निर्देशक ज्ञवालीले भने। कोषमा सूचीकृत भएका ठूला रोजगारदाताहरुमा चौधरी ग्रुप, गोल्छा अर्गनाइजेसन, डाबर नेपाल, सूर्य नेपाल, शिवम् सिमेन्ट, युनिलिभर, जि-फोर सेक्युरिटीसहित १ सय १७ वटा सूचीकृत भएको कोषका कार्यकारी निर्देशक ज्ञवालीले जानकारी दिएका छन्।
त्यस्तै आउटसोर्सिङ कम्पनी, नोबेल मेडिकल कलेज, मेडिकेयर अस्पताल, गोल्डस्टार सुज, नर्भिक अस्पताल, आम्दा नेपाल, सानीमा हाइड्रो, सोल्टी होटल, मेरियट होटल, सांग्रीला होटल, शंकर ग्रुप, यति डिस्टिलरी, ट्रिनटी कलेज, किस्ट कलेज, त्रियोग स्कुल, इन्फोटेक सर्भिसेज, दराज डटकम कोषमा सूचीकरण भएको जानकारी कोषले दिएको छ। सूचीकृत हुन सजिलो होस् भन्नका लागि प्राविधिक सुधार गरेको बताइएको छ।
त्यस्तै ठूला रोजगारदातासँग कोषका कर्मचारी पुगी श्रमिक सूचीकरणका लागि पहल गरिरहेको कोषले जनाएको छ।
श्रमिक तथा रोजगारदाताको सहजताका लागि सामाजिक सुरक्षा कोषमै कल सेन्टर सञ्चालनमा ल्याइने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
