काठमाडौं- चितवनको भरतपुर विमानस्थल विस्तारका लागि नेपाली सेनाको घोडा प्रजनन केन्द्र विस्थापन गर्न छलफल सुरु भएको छ। छलफलसँगै विमानस्थल विस्तारका लागि एक मात्र विकल्प घोडा प्रजनन केन्द्र विस्थापन गर्नुपर्ने निष्कर्ष निकालिएको छ।
विमानस्थल विस्तारका विषयमा चितवनमा बुधबार भएको सरोकारवालासँगको छलफलले यस्तो निष्कर्ष निकालेको हो।
बुधबार संस्कृति, पर्यटन तथा नागरिक उड्डयनमन्त्री योगेशकुमार भट्टराईसमेत सहभागी भएको विमानस्थल विस्तारका लागि आयोजित छलफलले घोडा प्रजनन केन्द्र विस्थापन गर्ने निष्कर्ष निकालेको नेपाल नागरिक उड्डयन प्राधिकरणका महानिर्देशक राजन पाखेरलले जानकारी दिए।
छलफलमा नेकपा अध्यक्ष पुष्पकमल दाहाल, प्रदेश ३ का मुख्यमन्त्री डोरमणि पौडेल, भरतपुर महानगरपालिका मेयर रेणु दाहाल, पर्यटन सचिव केदारबहादुर अधिकारीलगायतका सरोकारवाला सहभागी थिए।
भरतपुर विमानस्थल आसपासमा रहेको घरका कारण समेत विमानस्थल सञ्चालानमा अवरोध रहेको वायुसेवा अपरेटहरूको गुनासोसँगै विमानस्थल विस्तारका विषयमा छलफल भएको पोखरेलले बताए।
भरतपुर विमानस्थल ६२ बिघा जग्गामा फैलिएको छ। विमानस्थलमा १२ सय मिटरको रनवे रहे पनि आसापासका घरका कारण ९ सय मिटर रनवे मात्रै प्रयोगमा आएकाले विस्तारका विषय अगाडि सारेको उनको भनाइ छ।
‘विमानस्थल विस्तार सम्भव छ। सरोकारवला सबैको सहयोग आवश्यक छ,’ पोखरेलले भने, ‘विमानस्थल विस्तारका लागि विमानस्थल नजिकैको नेपाली सेनाको घोडा प्रजनन केन्द्र विस्थापन हुन आवश्यक छ।’
नेपाली सेनाले घोडा प्रजनन केन्द्रका लागि प्रयोग गरेको ७२ बिघा जग्गा विमानस्थलका लागि प्रयोग गर्न सके चाहे अनुसारको विमानस्थल बनाउन सक्ने पोखरेलले जानकारी दिए।
छलफलकै क्रममा नेपाली सेनाका प्रधानसेनापति पूर्णचन्द्र थापाले समेत आफूहरू विकास विरोधी नभएको र विकासमा सहयोग गर्ने बताएको पोखरेलले जानकारी दिए।
काठमाडौं गएर घोडा प्रजनन केन्द्र विस्थापन गर्ने विषयमा पुनः नेपाल नागरिक उड्डयन प्राधिकरण र नेपाली सेनासँग छलफल गर्ने समेत निर्णय भएको पाखेरेलले जानकारी दिए।
प्राधिकरणले पनि नेपालको पर्यटकीय गन्तव्यमध्ये प्रमुख पर्यटकीय गन्तव्य भएकै कारण एटिआर-७२ सम्मका जहाज अवतरण गर्ने सक्ने गरी विस्तार गर्ने तयारी गरिएको उनको भनाइ छ।
प्राधिकरणले विमानस्थलको रने १६ सय मिटर हुने गरी विस्तारका लागि तयारी गरेको छ। भरतपुर विमानस्थलमा अहिले काठमाडौं र पोखरालाई 'बेस' मानेर बुद्ध र यती एयरलाइन्सले उडान गरिरहेका छन्।
तर, विमानस्थल आसापासका भवनले विमानस्थलको सुरक्षामा समेत समस्या सिर्जना गरेको प्राधिकरणका महानिर्देशन पोखरेलको भनाइ छ। (तस्बिर- चितवन टुरिजम)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
