रोल्पा- १२ वर्षअघि आफैंले शिलान्यास गरेको रोल्पा माडीखोला पुलको ऊर्जा जलश्रोत तथा सिँचाईमन्त्री वर्षमान पुनले उद्घाटन गरेका छन्। शनिबार मन्त्री पुनले उक्त पुलको उद्घाटन गरेका हुन्।
२०६५ सालमा तत्कालीन भौतिक योजना तथा निर्माणमन्त्री हृदयेश त्रिपाठी र तत्कालीन अर्थमन्त्रीको हैसियतले वर्षमान पुनले संयुक्त रुपमा उक्त पुल शिलान्यास गरेका थिए। ३ वर्ष भित्र सम्पन्न गर्ने संझौता भएको उक्त पुल निर्माण व्यवसायको लापरबाहीका कारण सम्पन्न गर्न १२ वर्ष लागेको थियो।
पहिलो निर्माण व्यवसायीले समयमा काम नगरे पछि सरकारले पुनः टेन्डर आह्वान गरी दोश्रो निर्माण व्यवसायीलाई जिम्मेवारी दिएसँगै उक्त पुल निर्माण भएको हो। सो पुल निर्माण संगै रोल्पाको पश्चिम भेग जिल्ला सदरमुकामँंग यातायात संजालमा जोडिएका छन्। उक्त पुल निर्माणपछि जिल्लाका आधा दर्जनभन्दा बढी गाउँपालिकामा आवातजावतमा सहजता हुने भएको छ।
सरकारले पहिलो निर्माण व्यवसायीले काम गर्न नसकेको भन्दै दोश्रो पटक टेन्डर आवह्वान गरि अर्को निर्माण कम्पनीलाई उक्त पुल निर्माणको जिम्मा दिएको थियो। सत्र महिना भित्र निर्माण कार्य सक्ने गरि एसियाटिक राज जेभी कन्ट्रक्सन रोल्पाले उक्त निर्माण कार्यको जिम्मा पाएको हो।
अघिल्लो वर्ष आषाढ ३१ गते संझौता गरी सोही वर्षको भाद्र १ गतेदेखि निर्माण थालेको उक्त पुल ११ महिनामा सम्पन्न भईसकेको छ। उक्त पुल तीन करोड ३५ लाखको लागतमा निर्माण गरिएको हो।
यसअघि निर्माण आरम्भ गरिएको १० वर्षमा २ वटा पिलर मात्र ठड्याएर बेवारिसे बनेको थियो। अघिल्लो ठेक्का रद्द गरी अघिल्लो वर्ष गरिएको नयाँ सम्झौता सँगै पुल निर्माणले तिव्रता पाएको थियो। ०६५ सालमा सडक विभाग मार्फत गरिएको टेन्डरबाट काठमाडौंमा रहेको लामा-एडी- धर्मेन्द्र जेभी निर्माण कम्पनीले सो पुल निर्माण गर्ने जिम्मा पाएको थियो। शुरुआाती चरणमा निर्माणको केही काम गरे पनि राजनैतिक पहुँचका आधारमा निर्माण व्यवसायी वसन्त दशौदीले निर्माण कार्य आलटाल गरेसँगै पुल निर्माण कार्य अनिश्चित बनेको स्थानीयहरुले आरोप लगाउँदै आएका थिए।
पुनः निर्माण कार्यलाई तिव्रता दिन रोल्पाका स्थानीय राजनैतिक दल र सामाजिक संघसंस्थाको टोली सडक डिभिजन कार्यालय प्यूठान समेत पुगेको थियो। प्यूठानको स्थानीय प्रशासन, सडक डिभिजन कार्यालय, रोल्पाको सर्वपक्षिय टिम र निर्माण व्यवसायी दशौदी वीच अविलम्ब निर्माण कार्य सम्पन्न गर्ने सहमति भए पनि अर्को एक पिलर ठड्याउने वाहेक थप काम गरेका थिएनन्। पुल निर्माणका क्रममा आफ्नो विभिन्न निर्माण सामाग्री हराएको तथा लागत ईष्टमेट भन्दा वढि काम थपिएको भन्दै निर्माण व्यवसायी दशौदी फाईल वोकेर क्षतिपूर्ति माग गर्नमै लामो समय विते पछि पुल निर्माणले गति लिन सकेको थिएन।
लामो समयसम्म पुल निर्माण कार्य नगरेपछि सडक डिभिजन कार्यालय प्यूठानले ठेक्का रद्द गरेको थियो। ठेक्का रद्द गरिएको छ। तर निर्माण व्यवसायी दशौदीले भने अदालतमा मुद्दा दायर गरेका थिए। जसले काम झनै ढिलाई भएको बताइएको छ। उच्च राजनैतिक संरक्षण भएका कारण निर्माण व्यवसायीले पुल निर्माण कार्य अलपत्र पारेको आरोप लाग्दै आएको थियो।
अघिल्लो निर्माण व्यवसायीसँग ४ करोड बढी लागतमा निर्माणका लागि सम्झौता भएको थियो। निर्माण व्यवसायी दशौदीले पटकपटक गरी १ करोडभन्दा बढी भुक्तानी लिईसकेको सडक डिभिजन कार्यालय प्यूठानले जानकारी दिएको छ। सम्झौता बमोजिम ६२ मिटर लम्बाईको पुल मात्रै बनाउनु पर्नेमा २ मिटरपछि थप भएपछि आफू घाटामा जाने भएकाले बजेट थप गर्ने प्रक्रियामा लागेको दशौदीले बताउँदै आएका थिए। सरकारले सुरुमा गराएको लागत विवरण नै गलत रहेको दशौदीले दाबी गर्दै आएका छन्।
३६ महिनाभित्र निर्माण सम्पन्न गरी हस्तान्तरण गर्ने भनिए पनि एक दशक पार गर्दा समेत पुल बन्न सकेको थिएन। सो नदीमा वैकल्पिक व्यवस्थाका लागि भन्दै बेलीब्रिज राखिएको भए पनि आवतजावतमा निकै समस्या हुने गरेको यातायात व्यवसायीले बताउँदै आएका थिए।
पुल बनेसँगै रोल्पाको पश्चिमी भूभागमा उत्पादन हुने तरकारी, फलफुल,घीउ,दाल, जडिवुटी, खसीबोका सदरमुकाम लिबाङ ल्याउन सहज हुने भएको छ। पुल नहुँदा सदरमुकाम लिबाङ, सुलिचौर जस्ताबजार क्षेत्रमा खपत हुने अधिकांश तरकारी पश्चिम रोल्पाबाट सल्यान दाङ हुदै पुनः रोल्पा आउने भएकाले लागत मूल्य पनि अधिक हुने गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
