काठमाडौं- द्वन्द्वपीडितहरुले पीडितकै न्यायको विपक्षमा उभिएका व्यक्तिलाई संक्रमणकालीन न्यायसम्बन्धी आयोगमा ल्याउनु आयोग गठनको मान्यताविपरीत हुने बताएका छन्।
सत्य निरुपण तथा मेलमिलाप आयोगमा न्याय नेतृत्व र बेपत्ता पारिएका व्यक्तिको छानबिन आयोगमा पुरानै पदाधिकारी ल्याउन दल सहमत भएको भन्ने समाचार सञ्चार माध्यममा आएको भन्दै द्वन्द्वपीडित साझा चौतारीले आफूहरुको गम्भीर ध्यानाकर्षण भएको बताएको छ।
सत्य निरुपण तथा मेलमिलाप अयोगमा पूर्वमहान्याधिवक्ता रमन श्रेष्ठलाई पठाउन र बेपत्ता पारिएका व्यक्तिको छानबिन आयोगमा पुरानै पदाधिकारी पठाउन दलहरु सहमतिमा पुगेका खबरहरु बुधबार सार्वजनिक भएका थिए।
बिहीबार चौतारीले जारी गरेको विज्ञप्तिमा सत्य निरुपण तथा मेलमिलाप आयोगका लागि सिफारिस भएका भनिएका श्रेष्ठ द्वन्द्वको पक्षधर रहेका कारण पक्राउ परेका र महान्याधिवक्ता रहेका बेला संक्रमणकालीन न्यायको आधारभूत मान्यताविपरीत भूमिका खेलेको उल्लेख गरिएको छ।
त्यस्तै चौतारीले ‘असक्षम भनी हटाइएका पुरानै पदाधिकारीहरु दोहोर्याउने’ दलीय सहमतिप्रति पनि आपत्ति प्रकट गरेको छ।
दलहरुका बीचमा भएको भनिएको यस्तो सहमतिले संक्रमणकालीन न्यायसम्बन्धी मान्यतामा धावा बोलेको पनि चौतारीको ठहर गरेको छ। ‘राजनीतिक दलहरुका बीचमा भएको भनिएको उक्त कथित सहमतिले संक्रमणकालीन न्यायसम्बन्धी आयोगहरु निष्पक्ष, स्वतन्त्र र पारदर्शी प्रक्रियाद्वारा गठन हुनुपर्ने मान्यतामा धावा बोलेको छ,’ चौतारीका अध्यक्ष भागिराम चौधरी र महासविच जनकबहादुर राउतद्वारा जारी विज्ञप्तिमा भनिएको छ।
द्वन्द्वकालमा सशस्त्र विद्रोही पक्ष वा सो विद्रोहको दमनमा संलग्न व्यक्तिलाई आयोगमा नियुक्त गर्ने सहमतिले अन्तर्राष्ट्रिय रुपमा स्वीकृत मापदण्ड समेतको आधारमा गठन हुनुपर्ने भन्ने सर्वोच्च अदालतको फैसलालाई ठाडो चुनौती दिएको चौतारीको ठहर छ।
राजनीतिक दलको सहमतिमा नतमस्तक रहेको भन्दै चौतारीले सिफारिस समितिको समेत औचित्य सकिएको बताएको छ। विज्ञप्तिमा भनिएको छ, ‘पीडितको न्यायलाई इन्कार गर्ने राजनीतिक दलको यस्तो षड्यन्त्रमा औँठाछाप ठोक्ने कठपुतली बनेको नाममात्रको सिफारिश समितिको औचित्य पूर्णरुपमा सकिएको छ।’
सिफारिस समितिलाई तत्काल राजीनामा दिनसमेत चौतारीले आग्रह गरेको छ।
यो पनिः
द्वन्द्वकालीन आयोगमा पदाधिकारी टुंग्याउँदै दल, सत्य निरुपणमा पूर्व-महान्यायाधिवक्ता श्रेष्ठको सम्भावना
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
