काठमाडौं- विभिन्न समयमा ७ जनाको हत्या र डकैतीमा संलग्न भएका सिरियल किलर नसिम अमम्मद मुसलमान (नसिम खान) लाई प्रहरीले लामो समयपछि आज सिनामंगलबाट पक्राउ गर्न सफल भयो। प्रहरीको केन्द्रीय अनुसन्धान ब्युरो (सिआइबी) को टोलीले उनलाई पक्राउ गरेको हो।
हत्या तथा डकैतीमा संलग्न उनी मोस्ट वान्टेड भए पनि राजनीतिक आडका कारण जोगिँदै आएका थिए। पक्राउ गरेका खानले तत्कालीन नेकपा एमालेबाट २०६९ मंसिर १० गते सदस्यता लिएको पाइएको छ।
.jpg)
गत पुसमा खान कृषिमन्त्री चक्रपाणि खनाल र कपिलवस्तुका प्रमुख जिल्ला अधिकारी अर्जुन पोखरेलसँगै मञ्चमा देखापरेका थिए। कपिलवस्तुको मायादेवी– २ मा आयोजित मुसायरा वाचन एवं कवि सम्मेलनमा उनी देखिए पनि प्रहरीले देखेको नदेख्यै गर्यो। सत्ता र शक्तिको आडमा उनले आफ्नो गतिविधि बढाइरहे।
उनी पछिल्लो समय संयुक्त जनतान्त्रिक तराई मुक्ति मोर्चामा आबद्ध थिए। उनी उक्त संगठनका केन्द्रीय सदस्यसमेत हुन्। उनले जाबेद, बादशाह लगायतका उपनाम राखेका थिए।
कपिलवस्तुको मायादेवी गाउँपालिका ४ पिपरा (साबिक पिपरा गाविस २) घर भएका उनी भारतको अलिगढवा बस्दै आएका थिए।
४८ वर्षका उनले भारतबाटै आइए पास गरेका छन्।
यस्तो छ उनको हत्या शृंखला
खानले २०६३ जेठ १९ गते कपिलवस्तु फुलिका-३ बस्ने धर्मराज बराईका छोरालाई धारिलो हतियार प्रहार गरी हत्या गरेका थिए। २०६३ साउन १४ गते उक्त मुद्दा अदालतमा पेस भएको थियो। पुनरावेदन अदालतमा रहेको सो मुद्दा मुलतबीमा रहेको बताइएको छ।
२०६४ चैत ६ गते खानले कपिलवस्तु मोतिपुर- १ बस्ने भुवन भन्ने प्रेम परियारलाई गोली हानी हत्या गरेका थिए। तत्कालीन माओवादी जिल्ला कमिटी सदस्य सन्दीप कुमारले २०६५ पुस १ गते दिएको निवेदन हाल हाल पुनरावेदन अदालत बुटवलमा विचाराधीन अवस्थामा रहेको छ।
खानले २०६५ भदौ ३० मा कपिलवस्तु नगरपालिका १० बस्ने नसिबुल्लाह मुसलमानलाई हानेको गोली पारसनाथ कोहारकी श्रीमती अकला कोहारलाई लागी मृत्यु भएको थियो। पीडित पारसले सो सम्बन्धी २०६५ पुस २५ गते निवदेन दिए। उक्त मुद्दा पुनरावेदन अदालत बुटवलमा पुगेको छ।
यस्तै, खानले २०६५ कात्तिक ९ गते कपिलवस्तु नगरपालिका ७ बस्ने पिपरा गाविसका सचिव राममिलन प्रसाद गुप्तालाई गोली हानी हत्या गरे। उक्त घटनापछि पारसनाथ गुप्ताले २०६५ मंसिर ७ मा जाहेरी दिए। सो मुद्दाको मिसिल हाल पुनरावेदन अदालत बुटवलमा पुगेको छ।
२०६७ बैसाख १३ मा पनि खानले कपिलवस्तु पकडी-६ का ३५ वर्षका राजेन्द्र प्रसाद तिवारीको हत्या गरे। २०६७ जेठ ८ गते अदाललतमा पेस भएको उक्त मुद्दाको मिसिल कपिलवस्तु जिल्ला अदालतमा रहेको छ।
२०७४ फागुन ३ गते ४ वर्षका मोहम्मद अहेमानको अपहरणपछि हत्यामा पनि खान नै संलग्न रहेको देखिएको छ। अपरिचित व्यक्तिले घर नजिक बाटोबाट उठाई बालकलाई मोटरसाइकलमा अपहरण गरेका थिए। उनका बुबा फत्तेह महोम्मद मुसलमानको उजुरीपछि प्रहरीले २०७४ फागुन ६ गते घर नजिक पोखरीमा मृत अवस्थामा फेला पारेको थियो। नसिम र फत्तेह महोम्मदबीच पहिलेदेखि नै राजनीतिक तथा पारिवारिक रिसिबी थियो।
उनको हत्या शृंखला यतिमै रोकिएन। २०६४ चैत ९ कपिलवस्तु हथिहवा-३ बस्ने रामहर्ष प्रसाद कुर्मीका छोरा शिवपुजन कुर्मीलाई गोली हानी खानले हत्या गरे। घटनामा संलग्न धर्मेन्द्रसिंह क्षेत्री पक्राउ परे पनि मुख्य योजनाकार खान पक्राउ पर्न सकेका थिएनन्।
लुटपाट र डकैतीमा पनि उनको संलग्नता देखिएको छ। उनले २०६४ बैसाख १७ कपिलवस्तु नगरपालिका १ बस्ने सन्दीप कुमार गुप्ताको जिपलाई रोकी बन्दुक देखाई २ लाख लुटेका थिए। २०६४ चैत २५ गते अदालतमा पेस भएको उक्त मुद्दा हाल सर्वोच्च अदालतमा विचाराधीन छ।
(मुख्य तस्बिर स्रोत: हिमाल खबर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787239320.jpg)
-1786602170.png)
-1786513116.png)
