काठमाडौं- अनलाइन कारोबार गर्ने कम्पनी दराजले आफू सेवामूलक कम्पनी रहको र व्यापार गर्ने आफ्नो उद्देश्य नभएको भन्दै वाणिज्य, आपूर्ति तथा उपभोक्ता संरक्षण विभागमा स्पस्टिकरण बुझाएको छ।
दराज कम्पनीले उपभोक्ता ठगी गरेको विषयमा उजुरी परेपछि विभागले शुक्रबार यो कम्पनीको नक्सालस्थित कार्यालयमा अनुगमन गरेको थियो।
विभागका वरिष्ठ अनुसन्धान अधिकृत दिपकराज पोखरेलका अनुसार उपभोक्ताले मिमिफोकस घडी किन्नका लागि अर्डर गरेको तर दराजले नाभिफोर्स घडी पठाइदिएको भन्दै उजुरी परेको थियो।
एउटा सामान अर्डर गरेकोमा अर्कै सामान पठाएर ठगी गरेको उजुरीका आधारमा अनुगमन भएको भएपनि उक्त कम्पनीको व्यापारको वैधता र उसले गर्दै आएको कामहरु कानुनसम्मत भए नभएको बारे पनि विभागले अध्ययन गर्ने जनाएको छ।
कम्पनीले आफ्नो उद्देश्य भित्र रहेर काम गरे/नगरेको बारे बुझ्न भन्दै विभागले आवस्यक कागजातसहित उपस्थित हुन शुक्रबार २४ घण्टे पुर्जी दिइएको थियो। कम्पनीका वित्तीय व्यवस्थापक सहित ४ जनाले आइतबार विभागमै गएर स्पष्टिकरण दिएका थिए।
कम्पनीका प्रतिनिधिले विभागलाई दिएको स्पष्टिकरणमा दराज कम्पनीले कुनै पनि सामान किनबेच नगरेको तर सामान किनबेचका लागि प्लेटफर्म मात्रै उपलब्ध गराइदिएको भनिएको छ। ‘उनीहरुले हामी व्यापारी होइन। कुनै सामान किनबेच पनि गरेका छैनौं। तर विभिन्न कम्पनीको सामान उपभोक्ता सम्म पुर्याउने मध्यस्तकर्ताको भूमिका मात्रै हाम्रो हो भनेर हामीलाई जवाफ पठाएका छन। छलफलका क्रममा पनि यहि भनेका थिए,’ पोखरेलले नेपाल लाइभसँग भने।
नेपालको कानुनअनुसार व्यापार गर्ने कम्पनीमा प्रत्यक्ष वैदेशिक लगानी भित्राउन पाइँदैन। दराज कम्पनीले पनि वैदेशिक लगानी तथा साझेदार भित्राएको छ। सेवा र उद्योग क्षेत्र भन्दै उद्योग विभागमा दर्ता भएको उक्त कम्पनीले गर्दै आएको काम व्यापार हो वा होईन भन्ने विषयमा विभाग पनि स्पष्ट हुन सकेको छैन।
'दराजले वस्तुको व्यापार नगरेपनि सेवाको व्यापार गरेको छ। त्यो पनि व्यापार नै हो। व्यापार गर्ने कम्पनी वाणिज्य विभागमा दर्ता हुनुपर्छ। तर त्यो यहाँ दर्ता भएको छैन,’ पोखरेलले भने। दराज कम्पनीले भित्राएको वैदेशिक लगानीको सहि उपयोग भए/नभएको विषयमा पनि विभागले अध्ययन गर्ने जनाएको छ।
एउटा क्षेत्रका लागि भनेर अर्कै क्षेत्रमा लगानी गरेको हुनसक्ने विभागको आशंका छ। विभागले थप अनुसन्धानका लागि भन्दै क्यामु नेपाल प्रालिका नामा दर्ता भएको कम्पनी दर्ता प्रमाणपत्र, कम्पनीको प्रबन्धपत्र र नियमावली, विदेशी लगानी स्वीकृतीका लागि उद्योग विभाग तथा नेपाल राष्ट्र बैंकबाट पाएको स्वीकृतीलगायत कागजातहरु झिकाएर अध्ययन गरिरहेको जनाएको छ।
२०७३ फागुन १४ गते कम्पनी रजिस्टार कार्यालयमा दर्ता भएको ‘क्यामु नेपाल कम्पनी प्रालि’को नाममा यो कम्पनी दर्ता भएको देखिन्छ। यो कम्पनीले अनलाइन विज्ञापन, सफ्टवेयर विकास र कार्गो उद्योग संचालन गर्ने भन्दै उद्योग विभागबाट अनुमति लिएको छ। दराज कम्पनीको मुख्यालय (हेडक्वाटर) पाकिस्तानको कराँचीमा छ। यो कम्पनीले चिनियाँ कम्पनी अलिबाबासँगको सहकार्य र विदेशी लगानीसमेत भित्राएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764688011.png)
-1764146706.png)
-1763721444.png)
