काठमाडौं- 'नेपाल भ्रमण वर्ष २०२०' अभियान प्रारम्भ हुनैलाग्दा मुलुकको होटल क्षेत्रमा वैदेशिक लगानी उल्लेख्य मात्रामा वृद्धि भएको पाइएको छ।
चालू आर्थिक वर्षको पहिलो ३ महिनामा ३९ वटा पर्यटन उद्योग (होटल तथा रेष्टुरेन्ट) मार्फत ५ अर्ब ७७ करोड रुपैयाँ वैदेशिक लगानी भित्रिएको उद्योग विभागले जनाएको छ। विभागका अनुसार चालू आवको पहिलो तीन महिनामा अघिल्लो वर्षको सोही अवधिको तुलनामा शतप्रतिशत लगानी वृद्धि भएको छ।
विदेशी लगानीतर्फ चालू आवको तीन महिनामा ७७ उद्योगले स्वीकृति पाएका छन्। यसमा सबैभन्दा बढी ३९ वटा पर्यटन उद्योगसँग सम्बन्धित छन्। सेवातर्फ २५, उत्पादनका ७, सूचना प्रविधिसम्बन्धी ६ र कृषि, वन पैदावारको १ उद्योग रहेका छन्। उपयुक्त परियोजनाका लागि ११ अर्ब ३६ करोड रुपैयाँको प्रतिबद्धता आएको विभागले जनाएको छ। यसबाट ४ हजार २ सय ९२ रोजगारी सिर्जना हुने प्रक्षेपण गरिएको छ।
गत वर्षको सोही अवधिमा ४ अर्ब ८३ करोड ५२ लाख रुपैयाँ विदेशी लगानी प्रतिबद्धता आएको थियो।
विभागका निर्देशक एवं प्रवक्ता विनोद खड्काले चालू आवको पहिलो ३ महिनामा उत्साहवर्द्धक रुपमा विदेशी लगानी प्रतिबद्धता आएको बताए। अघिल्लो आवको सोही अवधिको तुलनामा अहिले शतप्रतिशत लगानी बढेको उनको भनाइ छ।
निर्देशक खड्काका अनुसार चालू आवको ३ महिना (साउन १ देखि असोज मसान्तसम्म) विभागमा ८२ उद्योग दर्ता भएका छन्। तीमध्ये सबैभन्दा बढी ३० वटा पर्यटन उद्योग (होटल तथा रेष्टुरेन्ट) छन्। उत्पादनतर्फ २०, ऊर्जाका १५, सेवामूलक १२ र कृषि, वन पैदावारमा आधारित ३ उद्योग दर्ता भएका छन्। ती उद्योगबाट आर्थिक प्रतिबद्धताअनुरुप ४८ अर्ब ९१ करोड ३६ लाख रुपैयाँ लगानी हुँदैछ। यसबाट ५ हजार ६१ रोजगारी सिर्जना गर्ने लक्ष्य छ।
विभागको आँकडाअनुसार अघिल्लो आव २०७५/७६ मा कूल २३ अर्ब ६९ करोड विदेशी लगानी प्रतिबद्धता आएको थियो।
चिनियाँ लगानीको आकर्षण
उद्योग विभागको आँकडाअनुसार नेपालमा होटल तथा रेष्टुरेन्ट क्षेत्रमा चिनियाँ लगानीकर्ताको आकर्षण बढेको देखिएको छ।
चालू आवको पहिलो तीन महिना विभागमा दर्ता भएका ३९ वटा होटल तथा रेष्टुरेन्टमध्ये ३६ वटा होटल तथा रेष्टुरेन्टमा चिनियाँ लगानी प्रतिबद्धता आएको छ। आर्थिक रुपमा करीब ७ अर्ब रुपैयाँ चिनियाँ व्यवसायीले लगानी गर्नेछन्। यस्तै भारतका दुई र एक जापानिज लगानीकर्ताले होटल तथा रेष्टुरेन्टमा लगानी गर्ने प्रतिबद्धता जनाएका छन्।
विभागको विवरणमा चिनियाँ लगानीका दुई वटा तारे होटल तथा रेष्टुरेन्ट काठमाडौं र पोखरामा सञ्चालन गर्ने इच्छा जनाएका छन्। भ्रमण वर्षलाई सार्थक तुल्याउन महत्वपूर्ण पर्यटकीय पूर्वाधारको रुपमा रहेको होटल क्षेत्रको विशेष योगदान रहन्छ। समग्रतामा नेपालको पर्यटन क्षेत्रमा विदेशी लगानीकर्ताको आकर्षण देखिएको विभागका निर्देशक खड्काले बताए। उनले मुलुकमा लगानीको वातावरण सिर्जना भएको र नीतिगत सुधारका कारण पनि लगानी बढेको उल्लेख गरे।
होटल एसोसिएसन अफ नेपाल (हान)का प्रथम उपाध्यक्ष विनायक शाहले नेपाललाई पर्यटकीय गन्तव्यका रुपमा लिएर विदेशी लगानीकर्ता आकर्षित भएको र यसले देशको अर्थतन्त्रलाई गतिशील बनाउने विश्वास व्यक्त गरे। पर्यटन क्षेत्रमा आएको लगानी उत्साहवर्द्धक रहे पनि लगानीको प्रतिफलको सुनिश्चितताका लागि सरकारले आधारभूत पूर्वाधार विकासमा जोड दिनुपर्ने खाँचो औँल्याए।
हानसँग पर्यटकस्तरदेखि पाँचतारे होटलसम्म गरी २ हजार हाराहारी होटल आवद्ध छन्। हानका १५ क्षेत्रीय च्याप्टर छन्। ती होटलमा झन्डै ४८ हजार श्यया रहेको व्यवसायीको दाबी छ।
अहिलेकै अवस्थामा २० लाख पर्यटकलाई व्यवस्थापन गर्न सकिने व्यवसायीले जनाएका छन्। सरकारले भ्रमण वर्ष मनाएर २० लाख विदेशी पर्यटक भित्र्याउने लक्ष्य राखेको छ। होटलपछि हवाई र सडक यातायात पनि महत्वपूर्ण हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
