काठमाडौं- खानेपानीमन्त्री बिना मगरले राष्ट्रिय गौरवको मेलम्ची खानेपानी आयोजनाको बुधबार स्थलगत निरीक्षण गरेकी छिन्।
मेलम्ची आयोजनाको हेड वर्क्स र सुरुङ फिनिसिङको ठेक्का पाएको कम्पनी सिनो हाइड्रो कर्पोरेसनले आयोजनाको काम अघि बढाएको सन्दर्भमा कामको प्रगतिको अवस्था बुझ्न खानेपानीमन्त्री मगरले स्थलगत निरीक्षण गरेकी हुन्। मन्त्री मगरको नेतृत्वमा खानेपानी सचिव माधव बेल्बासे पनि निरीक्षणमा सहभागी थिए।
यसअघि ठेकेदार कम्पनी 'सिएमसी'ले काम छाडेर गएपछि बाँकी कामको ठेक्का सिनो हाइड्रोले पाएको हो। अबको एक वर्षमा मेलम्चीको पानी काठमाडौंमा ल्याउनेगरी सिनो हाइड्रोले काम सुरु गरिसकेको छ। मेलम्ची आयोजनालाई समयमै सम्पन्न गर्नेगरी कामको रफ्तारमा अघि बढाउन मन्त्री मगरले निर्देशन दिएकी छिन्।
‘मेलम्ची आयोजनामा देखिएका समस्या समाधान गरेर सरकार अघि बढ्ने भन्दै मन्त्री मगरले भनिन्, ‘स्थानीय जनताको मागलाई सम्बोधन गर्न सरकार गम्भीर छ। स्थानीयले सडक पिच गर्नुपर्यो भनेर माग गरेका छन्। यो विषयमा सडक विभागसँग छलफल चलिरहेको छ।’
मन्त्री मगरले हरहालतमा मेलम्चीको पानी काठमाडौं ल्याउने अठोटसमेत व्यक्त गरेकी छिन्। सबै अवरोधहरु पन्छाएर आयोजनाको काम अघि बढेकाले अब मेलम्चीबारे दुविधा नराख्न पनि उनले आग्रह गरिन्।
स्थलगत निरीक्षणपछि सञ्चारकर्मीसँग कुराकानी गर्दै मन्त्री मगरले भनिन्, ‘मेलम्ची हाम्रो राष्ट्रिय गौरवको आयोजना हो, नेपालको प्रतिष्ठाको आयोजना पनि हो। तर, निर्माणको जिम्मा लिएको सिएमसी कम्पनीले एक्कासी हात झिक्दा हामीले अप्रत्याशित परिस्थितिको सामना गर्नुपर्यो। तर, अहिले त्यो परिस्थिति अन्त्य भएको छ र सबै अवरोध छिचोलेर मेलम्चीको काम अघि बढेको छ।'
‘सिएमसी कम्पनी आर्थिक रुपमा टाट पल्टिएका कारण आयोजनाबाट हात झिक्यो,’ मेलम्चीको पछिल्लो प्रगतिबारे जानकारी दिँदै मन्त्री मगरले भनिन्, ‘हामीले नसोचेको परिस्थिति झेल्यौं, अब त्यो अवस्था छैन। नयाँ कम्पनीले आयोजनाको ठेक्का लिएपछि निर्माणको काम द्रूत गतिमा अघि बढेको छ। तसर्थ, हरहालतमा मेलम्ची आउँछ, अब शंका नगरौं।’
मंगलबार संसद्को विकास समितिकी सभापति कल्याणी खड्कासहितको संसदीय टोली मेलम्ची पुगेको थियो। त्यसको भोलिपल्ट मन्त्री मगरको टोली आयोजनाको स्थलगत निरीक्षण र प्रगति विवरण बुझ्न मेलम्ची पुगेको हो।
२१ डिसेम्बर २०१८ मा निर्माण कम्पनीले आयोजनाको निर्माण कार्यबाट हात झिकेसँगै मेलम्ची आयोजना अन्योलमा परेको थियो। त्यसलगत्तै नेपाल सरकार र मन्त्रालयले आयोजनाको काम छिटोभन्दा छिटो सम्पन्न गर्न विभिन्न विकल्पहरुमा छलफल गरेको थियो। मेलम्ची विकास समितिले ग्लोवल टेन्डरका आधारमा आयोजनाको बाँकी निर्माण कार्य सम्पन्न गर्न गत असोजमा चिनियाँ ठेकेदार कम्पनीसँग सम्झौता गरेको थियो। सम्झौतापछि ठेकेदार कम्पनीले निर्माणको काम अघि बढाएको हो।
गत असोज १० गते मेलम्चीको सुरुङ मार्गको काम र असोज २४ गते हेड वर्क्सको काम चिनियाँ ठेकेदार कम्पनी सिनो हाइड्रोलाई दिनेगरी निर्माण सम्झौतामा हस्ताक्षर भएको थियो। मेलम्चीको बाँकी काम १ अर्ब ८७ करोड रुपैयाँमा सम्पन्न गर्न सिनो हाइड्रोले ठेक्का पाएपछि निर्माणको काम अघि बढिरहेको छ। चिनियाँ कम्पनीले सम्झौताको समयावधिभित्रै आयोजनाको निर्माण कार्य सम्पन्न गर्ने प्रतिवद्धतासमेत व्यक्त गरेको छ।
निर्माण सम्झौतामा हस्ताक्षर भएपछि ठेकेदार कम्पनीले तिहारअघि नै आयोजनाको सम्पूर्ण अवस्थाको स्थलगत जानकारी लिएको थियो। निर्माण सम्झौतामा हस्ताक्षर भएको तीन हप्ता नपुग्दै सिनो हाइड्रोले निर्माण कार्यमा गुणात्मक प्रगति गरेको छ। अघिल्लो ठेकदार कम्पनी सिएमसीले स्थानीय कामदारलाई तिर्नुपर्ने पारिश्रमिकको दायित्व नेपाल सरकारले लिन तयार भएपछि आयोजनाको स्थानीय अवरोध हटेको थियो।
सिनो हाइड्रोले 'रक डावेल'को काम सुरु गरी हेड वर्क्सको फाउन्डेसन ब्लास्टिङको तयारी गरिरहेको छ। तीन हप्ताको अवधिमा टनेलभित्र 'ग्राउटिङ'को काम पनि सुरु भइसकेको छ। कम्पनीले आयोजना निर्माण कार्यमा अघिल्लो ठेकेदार कम्पनीले प्रयोगमा ल्याएका हेभी इकुप्मेन्ट आवश्यकताअनुसार भाडामा चलाउने सम्झौता पनि गरिसकेको मेलम्ची आयोजनाका सिनियर इन्जिनियर कमल श्रेष्ठले जानकारी दिए।
श्रेष्ठका अनुसार ब्लाचिङ प्लानका लागि ३० घनमिटरको मेसिन जडान गरी मिक्सिङको काम तयारी अवस्थामा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
