काठमाडौं- बुधबार दिउँसो साढे ३ बजे वाणिज्य, आपूर्ति तथा उपभोक्ता संरक्षण विभागका शाखा अधिकृत कपिल रेग्मी र रमशेकाजी श्रेष्ठ हस्याङफस्याङ गर्दै महाननिर्देशक योगेन्द्र कुमार गौचनको कार्यकक्षमा छिरे।
रेग्मी र श्रेष्ठको संयोजकत्वमा बुधबार २ वटा टोली बजार अनुगमनका लागि निस्किएको थियो।
महानिर्देशक गौचनको कार्यकक्षमा छिर्ने बित्तिकै अनुसन्धान अधिकृत रेग्मीले आफुमाथी व्यापारीहरूले आक्रमणको प्रयास गरेको जानकारी गराए।
‘यसरी त नसकिने भइयो सर। युद्ध लडेजस्तै हुँदो रहेछ। कि 'म मरेँ, कि यी व्यापारी मरे' भन्ने भयो। व्यापारीहरुले आक्रमणको प्रयास गरे। मुख छाडे। गालीगलौज गरे,’ रेग्मीले एक सासमा गौचनलाई बजार अनुगमनमा खटिँदाको पीडा सुनाउँदै थिए।
बजार अनुगमनको दोश्रो टोलीको नेतृत्व गरेका अर्का अनुसन्धान अधिकृत रमेशकाजी श्रेष्ठले पनि आफूहरु व्यापारीको कुटाइबाट निमेष मात्रले बचेको बताए।
‘सबै व्यापारीहरु हुल बाँधेर आउँछन्। अनुगमन टोलीमाथि खनिन्छन् गाली गर्छन्। आज त कुटौंलाजस्तो गरी व्यापारी हामीमाथि जाइलागे,’ श्रेष्ठले सुनाए।
विभागको २ वटा अनुगमन टोली बुधबार सुन्धारा, न्युरोड, ताहागल्लीका विभिन्न ईलेक्ट्रोनिक्स पसलहरुको अनुगमनका लागि पुगेको थियो।
अनुगमन टोलीले त्यहाँका इलेक्ट्रोनिक्स पसलहरुमा गई सामानहरुको बिलबिजक र मूल्यसूची मागेका मात्र के थिए, व्यापारीहरुको समूह उनीहरूमाथि खनिन थालिहाल्यो। ‘हामीले बिलबिजक जारी गरे/नगरेको र मूल्यसूची राखे नराखेको बारेमा मात्रै सोधेका थियौं, उनीहरू आक्रोशमा आइहाले,’ रेग्मीले सुनाए।
अनुगमन टोलीसँग केही संख्यामा सुरक्षाकर्मीहरू पनि खटिन्छन्। तर व्यापारीहरू जम्मा भएर समूहमा आक्रमणको उद्देश्यसहित आउँदा भने आफूहरू असुरक्षित महसुस गर्ने गरेको अनुसन्धानमा खटिने कर्मचारीहरूको गुनासो छ।
‘हामी व्यापारीहरुलाई ऐननियममा भएको व्यवस्थाअनुसार नै बजार अनुगमन भइरहेको भन्छौं तर उनीहरु त्यो ऐन नियम तपाईहरुसँगै राख्नुस्, यसरी छापामार शैलीमा पसलमा किन प्रवेश गरेको भन्दै आक्रोशित भइहाल्छन्,’ अधिकृत श्रेष्ठ भन्छन्।
बुधबार विभागका २ वटा टोलीले सुन्धारा र ताहागल्लीका ९ वटा ईलेक्ट्रोनिक्स पसलमा अनुगमन गरेकोमा ८ वटा पसललाई कारबाही गरिएको छ।
ती पसलहरुले बिलबिजक जारी नगरेको, मूल्यसूची नराखेको तथा अनुगमन टोलीलाई असहयोग गरेको भन्दै प्रतिपसल ५० हजार रुपैयाँ जरिवाना तिराएको छ।
अनुगमनमा खटिने टोलीमाथि व्यापारीहरूले आक्रमण प्रयास गरेको यो पहिलोपटक भने होइन। यसअघि बहालबाला मन्त्रीसहित बजार अनुगमनमा निस्किएको टोलीलाई बल्खुस्थित तरकारी तथा फलफूल पसलका व्यापारीहरुले आक्रमण गरेका थिए।
त्यसैगरी अघिल्लो वर्ष विभागको अनुगमन टोलीलाई कालीमाटीका व्यापारीले ४ घण्टा कालीमाटीभित्रै थुनेका थिए। उद्योग, वाणिज्य तथा आपूर्तिमन्त्री तथा काठमाडौंका प्रमुख जिल्ला अधिकारीसहित गएको टोलीले उनीहरुलाई छुटाएको थियो।
गत भदौमा मात्रै न्युरोडका कपडा व्यापारीहरूले अनुगमन टोलीमाथि आक्रमण गरेका थिए। त्यसैगरी दरबारमार्गका व्यवसायी पसल नै बन्द गरी अनुगमन टोलीलाई असहयोग गरेका थिए भने गोंगबुस्थित बिजी मलका व्यवसायीहरु पनि अनुगमन टोलीमाथी हातपात गर्न उत्रिएका थिए।
विभागका महानिर्देशक गौचन अनुगमनमा खटिने कर्मचारीलाई सुरक्षा चुनौती अत्यधिक रहेको आफूले महसुस गरेको बताउँछन्। ‘व्यापारीहरु हामीलाई आफ्ना शत्रु ठान्छन्। सिधै आक्रमणको प्रयास हुन्छ। यो उनीहरुमा भएको उपभोक्ता अधिकार र हाम्रो ऐन कानुनमा भएको व्यवस्थाको बारेमा जानकारी नभएर हो,’ गौचनले भने।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
![Nepal Live Samachar नेपाल लाइभ समाचार, जेठ २९ [भिडियाे]](https://nepallive.net/uploads/posts/500X300/samachar++-299-1718118150.jpg)
![Nepal Live Samachar नेपाल लाइभ समाचार, जेठ २७ [भिडियाे]](https://nepallive.net/uploads/posts/500X300/samachar++-1717941479.jpg)
