काठमाडौं- जापानी कार उत्पादक कम्पनी 'निसान'ले दोस्रो इलेक्ट्रिक कार ल्याउने भएको छ। निसानको उक्त कारले टेस्लासँग प्रतिस्पर्धा गर्ने अनुमान गरिएको छ। क्रसओभर सेगमेन्टमा आउने यो कार सन् २०२१ सम्ममा बजारमा आउने अनुमान गरिएको छ।
निसानको पहिलो 'इभी लिफ' सन् २०१७ को आइएमएक्स कन्सेप्टमा आधारित रहेको थियो। नयाँ क्रसओभर इभीले शून्यदेखि ६० माइलको दूरी ५ सेकेन्डमै तय गर्नसक्छ। सवारी उत्पादकहरुले विद्युतीय कार उत्पादनलाई उच्च प्राथमिकता दिन थालेका छन्।
निसानको नयाँ विद्युतीय कारले एक पटकको फुल चार्जमा ३ सय माइल माइलेज दिने कम्पनीले जनाएको छ। कम्पनीले नयाँ कारको बारेमा थप विवरण भने बाहिर ल्याएको छैन। निसानको नयाँ इलेक्ट्रिक कारले टेस्लाको मोडल वाई, फक्सवागन आइडी-४ लगायतसँग प्रतिस्पर्धा गर्ने अनुमान गरिएको छ।
यस्तो छ निसान लिफ
यो कार संसारको सबैभन्दा बढी बिक्ने विद्युतीय कार बनेको छ। सन् २०१० मा सार्वजनिक भएको उक्त मोडल सन् २०१९ सम्म आइपुग्दा ६ लाखवटा भन्दा धेरै बिक्री भइसकेको छ। निसानले आफ्नो चर्चित विद्युतीय कार लिफको उत्पादन जापान र बेलायतमा गर्दै आएको छ। त्यसैले पनि निसानले उत्पादन गर्ने नयाँ विद्युतीय कारप्रति धेरैको चासो रहेको अन्तर्राष्ट्रिय सञ्चार माध्यमहरुले लेखेका छन्।
संसारका ५० भन्दा बढी देशमा बिक्री भइरहेको यो कार नेपाली बजारमा समेत ल्याउने तयारी भइरहेको छ। निसानले सन् २०१७ मा दोस्रो पुस्ताको लिफ सार्वजनिक गरेको थियो। कारमा नयाँ साधन क्लस्टर छ जुन पूर्ण डिजिटल छ। यसको केन्द्र कन्सोलमा ७ इन्च टचस्क्रिन इनपुट प्रणाली छ। यो एन्ड्रोइड ओटो र एप्पल कार-प्ले हो। यसमा तापक्रम नियन्त्रण जस्ता सुविधाहरू पनि छन्।
निसानको लिफमा प्रो-पायलट स्वायत्त ड्राइभिङ टेक्नोलोजी प्रयोग गरिएको छ, जसले स्वचालित स्टेरिङ र ब्रेक नियन्त्रण गर्दछ। कम्पनीले यसमा इ-पेडल प्रविधि पनि प्रयोग गरेको छ, जसले स्वचालित गति प्रदान गर्दछ। यो विद्युतीय कारमा ४० किलोवाट ब्याट्री प्याकेज रहेको छ, जसले गाडीमा १५० पिएसको पावर र ३२० एनएम टर्क दिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
