पर्सा- अन्तःशुल्कको स्टिकर हिनामिना गरी राजस्व छल्ने २ डिष्टिलरी सञ्चालकलाई आन्तरिक राजस्व कार्यालयले ३१ करोड रुपैयाँभन्दा बढी जरिवानासहित एक–एक वर्ष कैद गर्ने निर्णय गरेको छ।
जिल्लामासञ्चालित जयश्री धौलागिरि डिष्टीलरी र उदयपुर डिस्टलरीले अन्तःशुल्कको स्टिकर हिनामिना गरी राजस्व छलेका प्रमाणित भएकाले उक्त कार्यालयले मङ्गलबार दुवै उद्योगका सञ्चालकलाई सो कारबाही गरेको हो।
उदयपुर डिष्टीलरीले ३६ लाख ६९ हजार ७४२ थान अन्तःशुल्क स्टिकर हिनामिना गरेकाले त्यसका सञ्चालक ओमप्रकाश कलवारलाई २६ करोड १६ लाख रुपैयाँ जरिवानासहित एक वर्ष कैद र धौलागिरि डिष्टीलरीले ७ लाख ४५ हजार ६१५ थान अन्तःशुल्क स्टिकर हिनामिना गरेकाले त्यसका सञ्चालक शम्भुशरणप्रसाद कलवारलाई १ वर्ष कैद र ५ करोड ४७ रुपैयाँ लाख जरिवाना गरिएको कार्यालय प्रमुख गोपीकृष्ण कोइरालाले जानकारी दिए।
दुवै सञ्चालकको जायजेथा बिक्री तथा लिलाम गरी जरिवानाको रकम असुलउपर नभए फौजदारीसंहितानुसार थप ७ वर्ष कैद सजाय गरिने उक्त कार्यालयले जनाएको छ। दुवै उद्योग सञ्चालकलाई वीरगञ्ज कारागार पठाइएको छ।
डिष्टीलरीभित्र निगरानी गर्न खटाइएका कर्मचारीले समेत आफ्नो दायत्व पूरा नगरेको प्रमाणित भएकाले ती उद्योगमा कार्यरत चार नासुलाई निजामती सेवा ऐन २०५० अनुसार विभागीय कारबाही गरिने निर्णय भएको कार्यालय प्रमुख कोइरालाले बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
