काठमाडौं- कांग्रेसको आमागी सभापतिका लागि दोस्रो चरणमा मतदान हुने भएको छ। सोमबार भएको मतदानमा सभापतिका पाँचै जना उम्मेदवारले खसेको मतको पचास प्रतिशतभन्दा बढी मत प्राप्त गर्न नसकेपछि पुनः निर्वाचन हुने भएको हो।
महाधिवेशनमा शेरबहादुर देउवा पक्ष र कृष्णप्रसाद सिटौला पक्षबीच गठबन्धन भएको थियो। तर देउवाले जितका लागि आवश्यक पाउन सकेनन्। कुल खसेको ४६८१ मत मध्ये देउवाला जितका लागि ८३ मत कम भएको हो। सभापतिमा जितका लागि २३४१ मत आवश्यक पर्थ्यो।
दोस्रो चरणको निर्वाचनमा देउवालाई कठिन हुनसक्ने देखिन्छ। किनकि, उनले थप कुनै पक्षसँग गठबन्धन गर्न सक्ने सम्भावना कम छ।
पहिलो चरणको मतपरिणाम हेर्दा प्रकाशमान सिंह र विमलेन्द्र निधि निर्णायक देखिन्छन्। उनीहरुले क्रमशः ३७१ र २४९ मत पाएका छन्।
सिंह र निधि कुनै बेला देउवा निकट नेताहरु हुन्। तर यतिबेला दुवै देउवासँग टाढिएका छन्। उनीहरु दुवैले देउवालाई नेतृत्वबाट विस्थापन गर्नको लागि आफैंले सभापतिका लागि उम्मेदवारी दिएका थिए। दोस्रो चरणमा उनीहरु दुवैले शेखर कोइरालालाई सघाउने देखिन्छ।
निधिले आइतबार मात्रै सार्वजनिक अभिव्यक्ति दिएका छन्- 'सभापतिका लागि दोस्रो चरणको निर्वाचन भएमा सबै मिलेर देउवालाई हराइन्छ।'
सोमबार मतदानपछि प्रकाशमान सिंहले पनि त्यस्तै अभिव्यक्ति दिएका छन्- 'पहिलो चरणमा नतिजा ननिस्केमा दोस्रो चरणमा नेतृत्व परिवर्तन हुन्छ नै।'
सभापतिको प्रतिस्पर्धामा न्युन मत ल्याएका कल्याण गुरुङ पनि देउवाको विपक्षमै उभिने आकलन गरिएको छ।
महाधिवेशन सुरु भएसँगै सार्वजनिक भएका अभिव्यक्तिलाई केलाउँदा दोस्रो चरणको निर्वाचनमा देउवा विरुद्ध सभापतिका अन्य सबै प्रतिस्पर्धी उभिने देखिन्छ। त्यसो भएमा देउवा विरुद्ध माहोल बन्न सक्छ। त्यसको फाइदा कोइरालाले पाउन सक्छन्।
यतिबेला अर्को रोचक संयोग सिटौला पक्षका महाधिवेशन प्रतिनिधिको मत हुनसक्छ। सिटौला पक्षका नेताहरु पनि लामो समयदेखि देउवाको आलोचक थिए। तर चुनावमा भने गठबन्धन बनेकाले देउवालाई मत दिएका हुनसक्छन्। तर देउवा पक्षका प्रतिनिधिले सिटौला पक्षका उम्मेदवारलाई मत दिइसकेका छन्। देउवा पक्षबाट आफ्नो पक्षका उम्मेदवारलाई मत नआउला भन्ने सम्भावना छैन। त्यसैले दोस्रो चरणको मतदानमा सिटौला पक्षका प्रतिनिधिहरुले शेखरलाई मत दिनसक्छन्।
तर सिटौलासँग गठबन्धन गरेका देउवाका पुराना मित्र हुन्, निधि र सिंह। उनीहरुसँग गठबन्धन गर्न देउवाको प्रयास हुन्छ नै। गठबन्धन निर्माणमा चतुर खेलाडी मानिने देउवाले आफ्ना उपायहरु लगाउँछन् नै। उनले प्रकाशमान सिंहलाई भेट्नका लागि आफ्नो विश्वासपात्र बालकृष्ण खाँडलाई चाक्सीबारी पठाइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752324214.png)
-1752043710.jpg)
-1752245592.jpg)
-1749826086.png)
