जनकपुर- तराईमा बढेको अत्यधिक गर्मीले जनजीवन अस्तव्यस्त भएको छ। गर्मीका कारण हाटबजार तथा कार्यालयमा सेवाग्राही उपस्थिति कम भएको छ भने व्यापारिक क्रियाकलाप पनि सुस्ताएका छन्।
जीउ पोल्ने गरी बढेको तापक्रम अझै केही सातासम्म बढ्ने जलवायु तथा मौसम कार्यालयले जनाएको छ। वायुमण्डलीय तापक्रममा वृद्धिसँगै हावा नचल्नु र चल्दा पनि तातो हावा आउनुले सर्वसाधारणलाई घरबाहिर निस्किन समेत समस्या उत्पन्न भएको छ।
अत्यधिक गर्मीले बजार, शैक्षिक संस्था, सरकारी कामकाज समेत प्रभावित भएको छ। वायुमण्डलीय तापक्रम बढी रहँदा आज शनिबार जनकपुरको तापक्रम यस सिजनकै सबैभन्दा बढी ४२ डिग्री सेल्सियस मापन गरिएको छ।
जलवायु तथा मौसम कार्यालय जनकपुरका प्रमुख मुनेश मिश्राले मध्य तथा पूर्वी तराईका जिल्लामा अझै केही साता तापक्रम बढ्ने क्रममा रहने जनाए।
गर्मीले घरका भित्ताहरु तातिने हुनाले राती अबेर मात्र कोठामा सुत्ने गरेको क्षीरेश्वरनाथ नपा-५ महेन्द्रनगरकी नमिता उप्रेती बताउँछिन्। ‘पखां चलायो भने तातो हावा फाल्छ। छत तातिएर सुत्नै सकिँदैन।‘नमिता भन्छिन्, राती अली शितल हुन्छ त्यसपछि मात्र कोठामा सुत्न आउँछु।'
गर्मीले दिउँसो १२ बजेपछि जनकपुर बजार तथा सडकमा आवत जावत गर्ने मानिसको संख्या न्यून हुन्छ। बाहिर हिंड्दा गर्मी र त्यसमा पनि तातो हावा बहने हुँदा जनजीवन प्रभावित छ।
गर्मी बढेपछि बजारमा एसी, कुलर, टेबल पखांको बिक्री बढेको जनकपुरका इलेक्टोनिक पसलहरुले बताएका छन्।
महेन्द्रनगर निवासी प्रकाश महराले जनकपुरमा यसवर्ष अत्यधिक गर्मी भएको अनुभव गरेका छन्। १५ वर्षदेखि जनकपुरमा रिक्सा चलाउँदै आएका महराले भने, ‘यहाँ रिक्सा चलाउन थालेको धेरै वर्ष भयो। यस्तो गर्मी त कहिल्यै थाहा पाएको थिएन।'
गर्मी बढ्दा चिसो पेयपदार्थसँगै फलफूल जुसको व्यापार बढेको छ। जनकपुर बजारको ठाउँ ठाउँमा चिसो पेय पदार्थ, उखु, आंपको जुस, लस्सी बिक्री बढेको छ।
सडकमा हिंड्ने बटुवाहरु गर्मी कम गर्न जुस, लस्सी पिउने गर्दछन्। गर्मी कारण कोकाकोला, फेन्टा, स्प्राइट लगायत चिसो पेय पदार्थको बिक्री बढेको छ।
गर्मीले व्यापारीक कारोबारमा कमी आएको जनकपुरका होटल व्यावसायीले बताएका छन्। रमानन्द चोकमा रहेको होटेल राजधानीका संचालक राजिव झाले गर्मीले ग्राहकहरु नआउंदा ठुलो घाटा लागि रहेको बताउँछन्। उनले, ‘गर्मीले व्यापारीक कारोबारमा समेत गिरावट आएको छ।'
असार लाग्दा पनि पानी नपर्दा कृषक भने चिन्तित बन्न थालेका छन्। खोला नालाहरुमा पानीको सतह निकै घटेको छ भने खडेरीले पानीको सतह तल गएकाले धाराहरु समेत सुकेका छन्।
यस क्षेत्रमा पम्पसेटबाट पानी चलाएर लगाएको धानका ब्याड सुकेर पहेंला भएका छन् भने मकैबाली पानी नपाएर सुकेर कक्रक्क परेका छन्।
बैशाख–असारमा अत्यधिक गर्मीकै प्रकोपबाट बच्न निजी तथा सामुदायिक विद्यालयले बिहानको सत्रमा पठनपाठन सञ्चालन गर्ने गरेका छन्। यद्यपि विद्यालयबाट फर्किने समय मध्याह्न पर्दा गर्मीले बालबालिकाको स्वास्थ्यमा प्रतिकूल असर पार्दै आएको छ।
मध्याह्न र अपराह्न सरकारी कार्यालयसहित बजारमा सर्वसधारणको उपस्थिति पातलिएको छ।
नियमित विद्युत् आपूर्ति नहुँदा बढ्दो गर्मीमा सर्वसधारण झनै पिरोलिएका छन्। छाला ढाक्ने कपडा लगाउन, घाममा हिँड्दा नियमित अन्तरालमा बसेर शीतल पानीले हात मुख धुने जस्ता सुझाव चिकित्सकको छ। उनीहरु पानी बढी पिउने, सक्दो प्राकृतिक हावा अथवा छहारीमा बस्ने, घाममा निस्कँदा छाता लगाएर निस्किन सुझाउँछन्।
नियमित पानी पर्दा वायुमण्डलीय तापक्रम घटाउन सहयोग गर्ने भएपनि पछिल्लो एक सातामा पानी परेको छैन। मनसुनको कतै कुनै अत्तोपत्तो छैन। जसले गर्दा गर्मी बढ्ने क्रममा रहँदा सर्वसाधारण अझै बढी छटपटिएका छन्। लु लागेर ज्यानै जान सक्ने सम्भावना पनि रहने हुँदा अत्यधिक गर्मी महसुश भएमा सतर्कता अपनाउनुपर्ने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
