काठमाडौं- झापाबाट काठमाडौंतर्फ आउँदै गरेकाे बस त्रिशुली नदीमा खस्दा मृत्यु हुनेकाे संख्या ५ पुगेको छ। धादिङकाे गजुरी गाउँपालिका-६, बन्छेटारबाट यात्रुबाहक बस आज बिहान त्रिशुली नदीमा खसेकाे थियाे।दुर्घटनामा हालसम्म ४ पुरुष र एक महिलाकाे मृत्यु भएकाे धादिङका प्रहरी प्रमुख प्रहरी उपरीक्षक राजकुमार बैदवारले जानकारी दिए।
चार जनाको घटनास्थलमै मृत्यु भएको र एक जनाको उपचारका क्रममा मृत्यु भएको उनले बताए। मृतकको सनाखत हुन बाँकी छ।
इलाका प्रहरी कार्यालय गजुरीका अनुसार दुर्घटनामा २९ जना घाइते भएका छन्। घाइतेहरुकाे हाल स्थानीय अस्पतालमा उपचार भइरहेकाे छ भने अवस्था गम्भीर रहेका करिब एक दर्जन घाइतेलाई भने सामान्य उपचार पछि काठमाडाैं लाने तयारी भइरहेको पनि प्रहरी जनाएकाे छ।
अन्य घाइतेहरुको गजुरी, आदामघाट र गल्छीमा रहेका स्वास्थ्य संस्थाहरुमा उपचार भइरहेको छ।
झापाको काँकडभिट्टाबाट काठमाडौं आउँदै गरेको ना७ख ४३८७ नम्बरको यात्रुबाहक बस बिहान ६ बजे त्रिशूली नदीमा खसेको थियाे। बस सडकबाट करिब ६० मिटर तल त्रिशुली नदीमा खसेको हो। बसकाे आधा भाग मात्रै नदीमा डुबेको छ। बसलाई नदी बाहिर निकाल्न सकिएकाे छैन। दुर्घटनाका मृतक तथा घाइतेहरुकाे नेपाली सेना, सशस्त्र प्रहरी र स्थानीयले उद्धार गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
