काठमाडौं- संघीय संसदको अन्तर्राष्ट्रिय सम्बन्ध समिति अन्तर्गत उपसमितिले लगानी सुनिश्चित भएपछि मात्रै निजगढ अन्तराष्ट्रिय विमानस्थल वरपरको रुख कटान गर्नुपर्ने प्रतिवेदन समितिमा बुझाएको छ। बुधबार सिंहदरबारमा बसेको समितिको बैठकमा पेस गरिएको उपसमितिको प्रतिवेदनमा लगानी सुनिश्चित भएपछि मात्रै विमानस्थल वरपरको रुख कटानको काम सुरु गर्नुपर्ने उल्लेख छ।
विमानस्थल निर्माणका लागि लाखौंको संख्यामा रुख कटान गर्ने योजना अघि सारेको भन्दै स्थानीयले विरोध गरिरहेका बेला माधवकुमार नेपाल नेतृत्वको उपसमितिले लगानी सुनिश्चित नभई रुख कटानको काम अघि नबढाउन सरकारलाई सुझाव दिएको हो।
प्रतिवेदनमा सरकारी–निजी क्षेत्रसँग सहकार्य गरेर वैदेशिक लगानी भित्र्याउने गरी सो विमानस्थल निर्माणका लागि लगानीको मोडल तयार पार्न पनि सुझाइएको छ। लगानीको मोडल तयार भएपछि रुख कटान गर्नुपर्ने निष्कर्षसहितको प्रतिवेदन समितिमा पेस गरिएको उपसमितिका संयोजक नेपालले बताए।
टाँगिया बस्ती क्षेत्रमा धावनमार्ग
उपसमितिले विमानस्थलको धावनमार्ग निर्माणका लागि टाँगिया बस्ती रहेको क्षेत्र नै उपयुक्त हुने निष्कर्ष पनि निकालेको छ।
राजमार्गसँग समेत जोडिएकाले टाँगिया बस्ती रहेको क्षेत्रमा नै धावनमार्ग बनाउन उपयुक्त हुने निष्कर्ष पनि निकालिएको उपसमितिका संयोजक नेपालले जानकारी दिए।
उपसमितिले विमानस्थलबाट विस्थापित हुनेहरुलाई नजिकै बसोबासको उचित व्यवस्था गर्न पनि सरकारलाई सुझाव दिएको छ।
हरेक घरपरिवारका एक सदस्यलाई सरकारी नोकरीको व्यवस्था गर्ने गरी विस्थापितहरुलाई नजिकैको क्षेत्रमा बसोबासको व्यवस्था गर्न उपयुक्त हुने उपसमितिको राय छ। संयोजक नेपालले सो विमानस्थल नजिकै स्मार्ट सिटी बनाउने सरकारको अवधारणा भने अस्विकार गरिएको बताए।
सिमरा, वीरगन्ज लगायतका सहर नजिकै भएकाले तत्काल स्मार्ट सिटीको आवश्यकता नरहेको उपसमितिले समितिमा बुझाएको प्रतिवेदनमा उल्लेख गरिएको छ।
उपसमितिले तयार पारेको प्रतिवेदनमा विस्तृत अध्ययन प्रतिवेदन तयार पारेर मात्रै सो विमानस्थल निर्माणको काम अघि बढाउन सरकारको गम्भीर ध्यानाकर्षण गराइएको छ।
गत जेठ ९ गते बसेको मन्त्रिपरिषद् बैठकले सो विमानस्थल निर्माणको काम अघि बढाउने निर्णय गरेको थियो। सोही निर्णय अनुसार सरकारले सो विमानस्थल वरपरको रुख कटान गर्ने जिम्मेवारी नेपाली सेनालाई दिए पनि स्थानीयले विरोध गरेपछि सो काम अवरुद्ध हुन पुगेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
