काठमाडौं– भारतीय अभिनेता राजपाल यादवलाई चेक बाउन्ससम्बन्धी मुद्दामा सर्वोच्च अदालतले बक्यौता रकम तिर्न ठोस प्रस्ताव पेस गर्न अन्तिमपटक दुई साताको समय दिएको छ ।
प्रधानन्यायाधीश सूर्यकान्त तथा न्यायाधीशद्वय जयमाल्या बागची र भी. मोहना सम्मिलित इजलासले यादवलाई सर्वोच्च अदालतको रजिस्ट्रीमा २ करोड रुपैयाँ जम्मा गर्न समेत आदेश दिएको छ ।
अदालतले यादवको विगतको आचरणप्रति भने विश्वास गर्न नसकिने टिप्पणी गरेको छ । दिल्ली उच्च अदालतबाट यसअघि उनलाई तीन महिनाको जेल सजाय सुनाइएको प्रसंग उल्लेख गर्दै इजलासले भनेको छ, ‘उनको विगतको आचरण हेर्दा पृथ्वीमा कसैले पनि उनीमाथि कसरी विश्वास गर्न सक्छ ?’
यादवले यसअघि सर्वोच्च अदालतको ८ सेप्टेम्बरको आदेश कार्यान्वयनका लागि थप समय माग्दै निवेदन दिएका थिए । उक्त आदेशमा रकम बुझाउने सर्तमा उनलाई आत्मसमर्पण गर्नबाट अस्थायी राहत दिइएको थियो । तर, तोकिएको २४ घण्टाभित्र रकम जम्मा गर्न नसकेपछि उनले थप समय मागेका हुन् ।
फिल्मका लागि लिएको ५ करोड ऋणको विवाद
उजुरीकर्ताका अनुसार यादवले सन् २०१० मा फिल्म निर्माणका लागि लिएको ५ करोड रुपैयाँ ऋण फिर्ता गर्ने क्रममा सन् २०१३ मा १ करोड ५ लाख रुपैयाँका सातवटा चेक दिएका थिए । ती सबै चेक बाउन्स भएको कम्पनीको दाबी छ ।
त्यसअघि सन् २०१२ मा भएको सम्झौताअनुसार यादव, उनकी पत्नी र उनको कम्पनीले ब्याजसहित करिब ११ करोड रुपैयाँ तिर्न सहमति जनाएको बताइएको छ ।
चेक बाउन्सको यही विवाद अदालतसम्म पुगेपछि यादवमाथि कानुनी प्रक्रिया अघि बढेको हो । पछिल्लो सुनुवाइमा सर्वोच्च अदालतले उनलाई रकम भुक्तानीका लागि अन्तिम दुई साताको समय दिएको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
