काठमाडौं–चीनको सिचुवान एयरलाइन्सले मंगलबारदेखि छेन्दु–पोखरा सिधा उडान थालेको छ।
सिचुवान एयरलाइन्सको न्यारोबडी एयरबस-३९१ मंगलबार पोखरा अन्तर्राष्ट्रिय विमानस्थलमा अवतरण गरेको हो।
१२८ जना चिनियाँ पर्यटक बोकेको उक्त विमान पोखराबाट १२६ जना लिएर छेन्दु प्रस्थान गरेको छ। पोखराबाट उक्त विमानमा महानगरका मेयर धनराज आचार्यको नेतृत्वमा जनप्रतिनिधि, पर्यटन व्यवसायी लगायत छन्।
उनीहरूले चीनको छेन्दुका विभिन्न पर्यटकीय स्थलको भ्रमण गर्ने र चीनमा पोखराको प्रवर्द्धन गर्ने उद्देश्य राखेका छन्।
पोखरा अन्तर्राष्ट्रिय विमानस्थल निर्माण भएर सञ्चालनमा आएको २ वर्षपछि कमर्सियल चार्टर्ड उडान सुरू भएको हो।उक्त विमान हप्तामा एक पटक पोखरा आउजाउ गर्ने सिचुवान एयरलाइन्सले जनाएको छ।
पोखराबाट अन्तर्राष्ट्रिय उडान भर्न कुनै समस्या नभएको विमानस्थलका सूचना अधिकारी जशोदा रेग्मीले बताइन्।
‘पोखरा अन्तर्राष्ट्रिय विमानस्थलमा अध्यागमन लगायत सबै सुविधा छ। यहाँबाट न्यारोबडी जहाज उडान र अवतरणमा कुनै समस्या छैन,’ उनले भनिन्, ‘पहिले आइसकेको सिचुवान एयरलाइन्सले मंगलबारदेखि सहजै चार्टर्ड उडान सुरू गरेको छ।’
छेन्दुबाट पोखरा आउजाउ गर्न १ हजार २५० जना चिनियाँ पर्यटक तयार भएका छन् भने पोखराबाट चीन घुम्न जान पोखराका पर्यटन व्यवसायी, उद्योग वाणिज्य संघ लगायतले सहकार्य गरेका छन्।
एयरलाइन्सले आगामी १० हप्तासम्म उडान तालिका बनाएको छ। त्यसपछि व्यवसाय हेरेर नियमित उडान गर्ने एयरलाइन्सको तयारी छ।
पोखराबाट छेन्दु आउजाउ गर्न हवाई टिकट शुल्क ६२ हजार रुपैयाँ तय भएको छ। पोखरा–छेन्दु आउजाउ टिकटसहित ७ दिने भ्रमण प्याकेज १ लाख २३ हजार रुपैयाँ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
