शिक्षा मन्त्रालयले इन्टर्न राख्न तयार गरेको कार्यविधिमा के छ?

राजनीति

नेपाल लाइभ मंगलबार, चैत २०, २०८० १८:००

काठमाडौं- उच्च शैक्षिक संस्थामा अध्ययनरत तथा उच्च शैक्षिक उपाधिको लागि प्रतिक्षारत विद्यार्थीलाई शिक्षा, विज्ञान तथा प्रविधि मन्त्रालय तथा अन्तर्गतका निकायबाट सम्पादन हुने कार्य तथा सेवाका विषयमा इन्टर्नसीप कार्यक्रममार्फत् व्यावहारिक सीप र कार्य अनुभव दिलाउन आवश्यक व्यवस्था गर्न वाञ्छनीय भएको भन्दै 'प्रशिक्षार्थी (इन्टर्न) सम्बन्धी कार्यविधि, २०८०' तयार गरेको छ।

सुशासन (व्यवस्थापन तथा सञ्चालन) नियमावली, २०६५ को नियम ९ को उपनियम (१) ले दिएको अधिकार प्रयोग गरी कार्यविधि बनाइएको हो।

इन्टर्नसीपमा सहभागी हुने कार्य क्षेत्रगत पहिचानका तीन आधार प्रस्तुत गरिएको छ- विद्यार्थीको रुचि, विद्यार्थीले अध्ययन गरेको विषय र इन्टर्नसँग सम्बन्धित विषयमा मन्त्रालयले निर्धारण गरेको क्षेत्र।

इन्टर्नको कार्यक्षेत्र पहिचान गरी सिफारिस गर्न मन्त्रालयमा एक इन्टर्न छनोट तथा सिफारिस समिति रहने व्यवस्था गरिएको छ। समितिले प्रतिलित कानुन तथा अभ्यासका आधारमा इन्टर्नलाई संलग्न गराउन सकिने क्षेत्रगत विषय, महाशाखा, अन्तर्गतका निकाय तथा मातहतका निकाय र संख्याको पहिचान गर्ने कार्यविधिमा उल्लेख छ।

मन्त्रालय वा मतहतका निकायमा एक पटकमा बढीमा बीस जनासम्म इन्टर्नलाई समावेश गर्न सकिनेछ। प्रचलित कानुन बमोजिम गोप्य राख्नुपर्ने लिखत रहने वा नीतिगत रुपमा गोप्य रहने वा प्रचलित कानुन बमोजिम नियुक्त वा मनोनित वा निर्वाचित व्यक्तिबाट मात्र सम्पादन हुने भनी कार्य क्षेत्र निर्धारण भएका विषय क्षेत्रमा इन्टर्नलाई संलग्न गराउन सकिने छैन।

इन्टर्नको रुपमा परिचालित हुने विद्यार्थीको परीक्षण अवधि बढीमा तीन महिनासम्मको हुनेछ। तर विश्वविद्यालयको पाठ्यक्रम बमोजिम इन्टर्नसीपमा आवद्ध हुने इन्टर्नको हकमा तीन महिनाभन्दा बढी अवधिसम्म इन्टर्नसीप गराउन बाधा पर्ने छैन। इन्टर्नले प्रचलित कानुन विपरीत वा निर्धारित शर्त वा आचरण विपरीत कुनै कार्य गरेमा निजलाई सम्बन्धित शाखा प्रमुखको सिफारिसमा समितिले जुनसुकै बखत हटाउन सक्नेछ।

मन्त्रालयले इन्टर्नसीपमा परिचालन गरेका इन्टर्नलाई अवधि समाप्त भए पश्चात प्रमाणपत्र उपलब्ध गराउने छ।

मन्त्रालय वा सम्बन्धित निकायमा इन्टर्नलाई खटाउँदा नेपाल सरकारलाई कुनै आर्थिक दायित्व नपर्ने गरी खटाउनुपर्ने कार्यविधिमा उल्लेख छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

हमासले गर्यो थप तीन जना बन्धकको रिहाइ

माटोको ढिस्कोमा पुरिएर एक जनाको मृत्यु

त्रिकोणात्मक टी-२० आई सिरिज: नेपाल थाइल्याण्डसँग ४ विकेटले पराजित