काठमाडौं– सरकारले चालू आर्थिक वर्षको ८ महिनामा ६ खर्ब ६३ अर्ब रुपैयाँ राजस्व संकलन गरेको छ। साउनदेखि फागुन मसान्तसम्ममा कूल ६ खर्ब ६३ अर्ब ८३ करोडरुपैयाँ राजस्व संकलन भएको महालेखा नियन्त्रक कार्यालयले जनाएको छ।
यस्तै गत वर्ष (२०७९/०८०) को सोही अवधिमा ६ खर्ब २२ अर्ब ७८ करोड रुपैयाँ राजस्व संकलन भएको थियो। सरकाले चालू आर्थिक वर्षको ८ महिना समाप्त हुँदा लक्ष्यको ४१ प्रतिशत मात्रै राजस्व संकलन गर्दा फागुन मसान्तसम्म गत वर्ष भन्दा ७.१३ प्रतिशत बढी राजस्व संकलन गरेको छ।
कार्यालयको तथ्यांक अनुसार सरकारले चालू आर्थिक वर्षको ८ महिनामा कर राजस्वबाट ५ खर्ब ७८ अर्ब रुपैयाँ र गैर कर राजस्वबाट ६० अर्ब ३७ करोड रुपैयाँ र अन्य प्राप्तिबाट २२ अर्ब २ करोड रुपैयाँ संकलन गरेको छ। गत वर्ष सोही अवधिका कर राजस्वबाट ५ खर्ब १८ करोड रुपैयाँ, गैर कर राजस्वबाट ५६ अर्ब ८ करोड रुपैयाँ र अन्य प्राप्तिबाट ३५ अर्ब २० करोड रुपैयाँ संकलन भएको थियो।
लक्ष्य अनुसार राजस्व संकलन गर्न नसकेको सरकारले चालू आर्थिक वर्षको ८ महिनामा ८ खर्ब १ अर्ब रुपैयाँ खर्च गरेको छ। जुन गत वर्षको सोही अवधिको तुलनामा २२ अर्ब रुपैयाँ बढी हो। गतवर्ष फागुन मसान्तसम्म ७ खर्ब ७९ अर्ब ९२ करोड रुपैयाँ कूल खर्च भएको थियो।
चालू वर्षको ८ महिनाममा सरकारको खाता १ खर्ब ३७ अर्ब ७५ करोड बराबर घाटामा रहेको पाइएको छ। चालू वर्षको फागुन मसान्तसम्म सरकारले चालु तर्फ ५ खर्ब ८२ अर्ब रुपैयाँ खर्च गरेको छ भने पुँजीगततर्फ ८१ अर्ब २१ करोड रुपैयाँ र वित्तीय व्यवस्थापन तर्फ १ अर्ब ३८ अर्ब रुपैयाँ खर्च भएको महालेखा नियन्त्रक कार्यालयले जनाएको छ।
गत वर्षको फागुन मसान्तसम्म चालूतर्फ ६ खर्ब ८ करोड रुपैयाँ, पुँजीगत तर्फ ८४ अर्ब २५ करोड रुपैयाँ र वित्तीय व्यवस्थापन तर्फ ८६ अर्ब १२ करोड रुपैयाँ खर्च भएको थियो। चालू आर्थिक वर्षमा सरकारले १७ खर्ब ५१ अर्ब रुपैयाँको बजेट ल्याउँदा चालूतर्फ ११ अर्ब ४१ करोड रुपैयाँ, पुँजीगत तर्फ ३ खर्ब २ अर्ब रुपैयाँ तथा वित्तीय व्यवस्थापन तर्फ ३ खर्ब ७ अर्ब रुपैयाँ विनियोजन गरेको थियो।
फागुन मसान्तसम्म भएको आम्दानी र खर्च हेर्दा सरकारले संशोधित अनुमान अनुमान अनुसार पनि राजस्व संकलन गर्ने र बजेट खर्च गर्ने सम्भावना देखिँदैन। अर्थ मन्त्रालयले बजेटको अर्धवार्षिक समीक्षामार्फत् चालू आर्थिक वर्षमा १५ खर्ब ३० अर्ब ६२ करोड रुपैयाँ मात्रै खर्च हुने संशोधित अनुमान सार्वजनिक गरेको छ।
जसमध्ये पुँजीगततर्फ ३ खर्ब २ अर्ब ७ करोड विनियोजन गरिएकोमा ८४.१३ प्रतिशत मात्रै खर्च हुने, चालूतर्फ ११ खर्ब ४१ अर्ब ७८ करोड विनियोजन भएकोमा ८८. ८४ प्रतिशत मात्रै खर्च हुने र वित्तीय व्यवस्थापनतर्फ ३ खर्ब ७ अर्ब ४५ करोड विनियोजन गरिएकोमा त्यसको ८७.३९ प्रतिशत मात्र खर्च हुने अर्थ मन्त्रालयको अनुमान छ।
फागुनसम्म भएको खर्चको आधारमा संशोधित अनुमान अनुसार पनि लक्ष्य पुरा नहुने विज्ञहरु बताउँछन्। यस्तै, सरकारले संशोधित अनुमान अनुसार राजस्व संकलन गर्ने सम्भावना पनि छैन। सरकारले चालु आर्थिक वर्षमा १४ खर्ब २२ अर्ब रुपैयाँ राजस्व उठाउने लक्ष्य निर्धारण गरेको थियो।
तर, लक्ष्य अनुसार राजस्व संकलन नहुँदा चालू वर्ष १२ खर्ब २ अर्ब रुपैयाँ मात्रै राजस्व संकलन हुने संशोधित लक्ष्य तय गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
