धनगढी– नेकपा एमालेले बिहीबारदेखि मध्यपहाडी क्षेत्र केन्द्रित ‘समृद्धिका लागि संकल्प यात्रा’ सुरु गर्दैछ। एमालेले संकल्प यात्राको सुरुवातका लागि महाकाली किनारको सीमावर्ती बजार बैतडीको झुलाघाट रोजेको छ।
यात्राको उद्घाटनका लागि एमाले अध्यक्ष केपी शर्मा ओलीसहित शीर्ष नेताहरु बैतडी केन्द्रित भएका छन्। बैतडीमा जोडतोडका साथ यात्राको तयारी चलिरहँदा सुदूरपश्चिम प्रदेशकै अछाममा भने एमाले पंति उकुसमुकुसमा छ।
बिहीबार एमाले अध्यक्ष ओलीले राष्ट्रिय झण्डाको झण्डोत्तोलन गरेपछि सुरु हुने यात्रा शनिबार अछाम पुग्ने कार्यतालिका छ।
तर अछामका एमाले नेता/कर्ताहरु भने यात्रालाई लिएर बेग्लै तनावमा छन्। अछाम पार्टीका नेता भीम रावलको गृहजिल्ला हो। १०औं महाधिवेशनमा अध्यक्षका लागि ओलीको प्रतिस्पर्धी बनेयता रावल पार्टीमा निरन्तर ‘उपेक्षित’ बन्दै आएका छन्। रावलले भोग्दै आएको ‘उपेक्षा’का कारण नेतृत्व (अध्यक्ष ओली)प्रति असन्तुष्ट रहेका अछामका नेता/कार्यकर्ताहरु यात्राको सन्दर्भलाई लिएर कसरी प्रस्तुत हुने भनेर तनावमा छन्।
‘सुदूरपश्चिम प्रदेशबाट पार्टीको विशेष अभियान सुरु हुँदा भीम रावल जस्तो नेतालाई खबर नगरिनु। नबोलाइनु, सल्लाह नगरिनुलाई सकारात्मक रुपमा त लिन सकिँदैन नि!’ रावलनिकट एमाले अछामका एक नेताले भने।
एमाले सुदूरपश्चिम प्रदेश कमिटीका अध्यक्ष कृष्णप्रसाद जैशीले संकल्प यात्राका लागि रावललाई जानकारी गराएको बताउँछन्। यद्यपि त्यसबारे रावलबाट कुनै प्रतिक्रिया नआएको जैशीको भनाइ छ।
जैशीले भने, ‘उहाँ बैतडीदेखि नै सहभागी हुनुहुन्छ वा आफनो गृहजिल्लाबाट भन्ने केही थाहा छैन। तर, कार्यक्रमबारे जानकारी गराएका छौँ।’
एमाले अध्यक्ष ओली यात्राको उद्घाटन गर्न भन्दै बुधबार नै बैतडी पुगिसकेका छन्। बुधबार बैतडीमा आयोजित एक कार्यक्रममा बोल्दै ओलीले मध्यपहाडी राजमार्ग भित्रका पहाडका समस्या बुझ्न झुलाघाट–चिवाभञ्ज्याङ समृद्धिका लागि संकल्प यात्रा आयोजना गरिएको बताए। ‘महाकालीदेखि मेचीसम्म समृद्ध नेपाल सम्भव छ भन्ने उद्देश्यले संकल्प यात्रा गर्दै छौँ। भोलि यसै जिल्लाको झुलाघाटबाट सुरु गर्छौँ,’ ओलीने भने, ‘पूर्व–पश्चिम मेचीदेखि महाकालीसम्म एमालेले समृद्ध नेपाल बनाउन सक्छ। यहाँका समस्या के छन्, ती हर्नेका लागि पहाडै पहाडको यात्रामा छौँ।’
अध्यक्ष ओलीले झुलाघाटमा उद्घाटन गर्ने यात्रा पाँचथरको चिवाभञ्ज्याङ पुगेर समापन हुनेछ। १ हजार ८७९ किलोमिटर लामो १९ दिने मध्य पहाडी लोकमार्ग पदयात्रा शुक्रबार डोटी र शनिबार अछाम पुग्ने कार्यक्रम रहेको एमालेले जनाएको छ।
एमाले सुदूरपश्चिम प्रदेश कमिटिका अध्यक्ष जैशीका अनुसार पार्टीका शीर्ष नेता सबैको सहभागिता रहने उक्त संकल्प यात्राका क्रममा शनिबार अछामको साँफेबगर र मंगलसेन पुगेर कार्यक्रम गर्ने कार्यतालिका छ।
तर भीम रावल उक्त कार्यक्रममा नहुने अवस्था आएपछि रावलका समर्थकले विरोधका कार्यक्रम गर्नेसम्मको तयारी गरिरहेका छन्।
‘यो त हद भयो, आफ्नै प्रदेशको कार्यक्रममा पनि भीम रावलले सहभागी हुन नपाउने अवस्था बारम्बार दोहोरिन थाल्यो,’ रावल निकट एमाले अछामका अर्का एक नेताले भने, ‘अब के गर्ने भन्ने आन्तरिक छलफल गरिरहेका छौँ। सबै कार्यकर्ता आक्रोशित छन्, विरोधका क्रियाकलाप पनि हुन सक्छन्।’
हालै सम्पन्न एमाले सुदूरपश्चिम प्रदेश अधिवेशनमा पनि भीम रावललाई नबोलाइएको भन्दै उद्घाटन सत्रमा अध्यक्ष ओलीले बोलिरहँदा रावल समर्थक कार्यकर्ताहरुले ‘भीम रावल खै?’ भन्दै नारा लगाएका थिए।
रावलले पार्टीको संकल्प यात्राबारे आफूलाई जानकारी गराइएको भन्ने कुरा सत्य नभएको बताएका छन्। रावलले सामाजिक सञ्जालमा एक सन्देश लेख्दै आफ्नो सहभागिताबारे अध्यक्ष ओलीले चासो नदिएको र महासचिव शंकर पोरेलले पनि उपेक्षित गरेको बताएका छन्।
रावलले लेखेका छन्– एमालेको मध्यपहाडी पुष्पलाल राजमार्ग अभियानबारे धनगढीमा आयोजित पत्रकार सम्मेलनमा मेरो बारेमा सोधिएको प्रश्नको जबाफमा मलाई निम्तो दिइएको भन्ने सत्य होइन। तथ्य यस्तो छ: प्रदेश अध्यक्ष कृष्ण प्र जैशीले फोनमा पत्र पठाउँ कि भन्नु भयो। मैले भनेँ- अभियान प्रदेशको भए तपाईंले भन्दा म आइहाल्थेँ। तर केन्द्रको भएकोले तपाईं अध्यक्षलाई फोन गरी मेरो सहभागिताको कुरा गर्नुस्, उहाँले मलाई भन्नुभयो भने म सहभागी हुन्छु। केही समयपछि उहाँले फोनमा भन्नुभयो फोन गरेँ, अध्यक्षको स्वकीयसँग कुरा हुँदा महासचिवसँग कुरा गर्न भनियो। महासचिवसँग कुरा गर्दा इच्छा हुने जाँदा हुन्छ भन्ने जवाफ आएकोले तपाईं झुलाघाट जानु परेन, अछाम आफ्नै किसिमले गए हुन्छ।अब सबै विवेकशील व्यक्तिले सोचौं। यही हो त मलाई अभियानमा निम्ता गरिने कायदा?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
