काठमाडौं– अन्तर्राष्ट्रिय र वातावरण कानूनका ज्ञाता डा. कटक मल्लको ‘न्याय–अन्याय कानूनः भू राजनीति र कूटनीति’ किताब सार्वजनिक भएको छ।
मल्ल स्विडेनको स्टकहोम, काल्सटा र उमियो विश्वविद्यालयमा अध्यापनमा सक्रिय छन्। मल्लको किताबमा कानून, राजनीति, मानवअधिकार, न्यायपालिका, भू–राजनीति÷कूटनीति, पर्यावरण लगायतका विषय समेटिएका छन्।
राजधानी काठमाडौंमा मल्लको किताब सार्वजनिक गर्दै सर्वोच्च अदालतका पूर्व न्यायाधीश प्रकाश वस्तीले मल्लको किताब कानूनी दर्शनको दस्तावेज भएको बताए।
उनले भने, ‘नेपालमा कानून सम्बन्धी पहिलो किताब २०१ वर्ष अगाडि लेखिएको थियो। त्यस यता धेरै किताब लेखिए तर, कानूनी दर्शनका आधारमा लेखिएका थिएनन्। यो किताब कानूनी दर्शनको किताब हो।’
पुस्तकमाथि टिप्पणी गर्दै पूर्व न्यायाधीश डा. प्रभा बस्नेतले मल्लको किताबमा न्यायिक विषयहरुलाई आलोचनात्मक र रचनात्मक शैलीमा प्रस्तुत गरिएको बताइन्।
‘किताबमा न्यायलाई आलोचनात्मक, रचनात्मक मात्र नभई मौलिक शैलिले प्रस्तु गरिएको छ,’ बस्नेतले भनिन् । त्यसैगरी विश्लेशक डा. चन्द्रदेव भट्टले मल्लको किताब कानून, समाज, लोकतन्त्र र भू–राजनीतिक दार्शनिक दस्तावेज भएको टिप्पणी गरे।
सार्वजनिक बौद्धिकका रुपमा स्थापित मल्लको यस अगाडि नेपाली भाषामा ‘मानवअधिकार’ किताब प्रकाशित छ। ‘न्याय–अन्याय कानूनः भू राजनीति र कूटनीति’ किताब इन्डिगो इन्कले प्रकाशित गरेको हो। ३९८ पृष्ठको किताबको मूल्य ९९९ रुपैंयाँ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
