काठमाडौं– द्वन्द्वरत देश इजरायलमा रहेका नेपालीहरुमध्ये थप १८ जना नेपालका लागि प्रस्थान गरेका छन्।
इजरायलको राजधानी तेल अविवस्थित नेपाली राजदूतावासका अनुसार स्वदेश फर्किनेहरुमा ४ जना विद्यार्थी, १३ जना कामदार र १ जना पर्यटक भिसामा आएकाहरु रहेका छन्।
उनीहरु बेन गुरियन इन्टरनेशनल एअरपोर्टबाट स्थानीय समय अनुसार दिउँसोको २:५५ बजे उडेको स्पाइसजेट एअरलाइन्सको उडान नम्बर एसजी ९९९६ बाट भारतीय दूतावाससँगको समन्वयमा भारतको राजधानी नयाँ दिल्लीसम्म र त्यहाँबाट नयाँ दिल्लीस्थित नेपाली दूतावासको सहयोगमा नेपालसम्म पुर्याउने गरी व्यवस्था गरिएको दूतावासले जनाएको छ।
विज्ञप्ति जारी गर्दै दूतावासले आवश्यकतानुसार अन्यको फिर्तीमा समेत क्रमशः सहजीकरण गर्ने जनाएको छ। यस्तै हमासको आक्रमणमा मारिएका विद्यार्थीहरुको शव फिर्तीका लागि समेत प्रक्रिया अघि बढेको जनाएको छ।
सो घटनामा परी निधन भएकामध्ये पहिचान भएका शवको कानूनी प्रक्रिया पूरा गरी २/३ दिन भित्र नेपाल पठाउने गरी तयारी भइरहेको छ भने अन्य शवको पहिचानको काम भइरहेको दूतावासले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
