स्थायी कमिटी बैठकबाट सतहमा आयो माधव-झलनाथबीचको मतभेद

राजनीति

नेपाल लाइभ आइतबार, साउन २१, २०८० २१:३९

काठमाडौं- नेकपा एकीकृत समाजवादीका अध्यक्ष माधवकुमार नेपाल र सम्मानित नेता झलनाथ खनालबीचको मनमुटाव सतहमा आएको छ। दुई दिनसम्म चलेको स्थायी कमिटी बैठकमा खनालले फरक मतसहितको दस्तावेज समेत प्रस्तुत गरेका छन्।

नेतृत्वको शैलीमाथि प्रश्न मात्रै गरेनन्, संगठनलाई रावणको संज्ञा दिए। खनाल निकट नेताहरु पनि बैठकमा आक्रामक रुपमा प्रस्तुत भएका थिए।

नेपालले खनालको दस्ताबेजमा उठाएका सवालको समेत बैठक समापन गर्ने क्रममा एक-एक गरी जवाफ दिएको एक स्थायी कमिटी सदस्यले बताएका छन्।

जस्तो खनालको फरक मतमा उल्लेख छ, 'हाम्रो पार्टी र विद्रोह गरिएको पार्टी एमालेका सैद्धान्तिक र नीतिगत सवालमा भिन्नता के छ? देखाउन सकिएको छैन। हाम्रो पार्टीमा पनि जबजकै धङधङी छ र एमालेमा पनि जबजकै धङधङी छ। त्यसले गर्दा पनि ठूलो संख्यामा विद्रोह गरेर अघि आएका नेतारकार्यकर्ताहरु वैचारिक-सैद्धान्तिक भिन्नता नदेखेर एमालेमा फर्किने क्रम देखिन्छ। किन यस्तो भइरहेको छ? हामीभित्र कहाँ कमजोरी छ? कुन कमजोरीका कारणले यस्तो भइरहेको छ?'

नेपालको जवाफ थियो, 'हाम्रो शक्ति कमजोर होइन, छैन र यो पार्टीसँग सशक्त बैल्कल्पिक शक्ति बन्ने निकै राम्रो ग्राउन्ड छ। हामीभन्दा विचार र व्यवहारमा अरु को उत्कृष्ट छ?'

खनालले अर्को कुरा उठाएका थिए, 'हाम्रो पार्टी यतिबेला माथि रावणको टाउको जस्तो र तल सुक्दै झिनु भएर उभिन पनि गाह्रो पर्ने अवस्थामा भएको महसुस हुन्छ। त्रिपाई जस्तो माथि फुकेको तल सुकेको पार्टी संगठन छ। हुनुपर्ने ठीक उल्टो हो। विद्रोह गर्दा पार्टी पंक्तिमा निकै ठूलो उत्साह, उमङ्ग र जुन शक्ति थियो, आज त्यो पनि छैन।'

नेपालले संख्यामा तुलना गर्न नमिल्ने बताउँदै जवाफ दिएका थिए, 'कार्यकर्ताको संख्या बढ्न समय लाग्छ। उनको हाम्रो पार्टीले कार्यकर्ता बढाउनेगरी काम गरिरहेको छ। संगठन निर्माणका लागि सडक, संसद् र सरकार तिनै क्षेत्रमा काम भइरहेको छ।'

विद्रोह गर्दा राष्ट्रिय पार्टी मानिएकोमा आज त्यो नरहेको उनको समेत खनालले बताएका थिए। स्थानीय चुनावमा मात्र पनि आफ्नो पार्टीले ६ लाख मत पाएकोमा राष्ट्रिय चुनावमा आउँदा ३ लाख पनि नघाउन नसक्ने विषयलाई गम्भीरतापूर्वक लिनुपर्ने खनालको दस्तावेजमा उल्लेख छ। नेपालले संख्यामा तुलना नगर्न पटक-पटक जोड दिएका थिए।

पार्टी अहिले दिशाविहीन रहेको कार्यकर्ताले महशुस गरेको खनालको भनाइमा नेपालले आफ्नो पार्टी सशक्त वैकल्पिक शक्ति बन्ने बताएका छन्। पार्टीको शक्ति कमजोर नभएको र सशक्त वैकल्पिक शक्ति बन्ने राम्रो ग्राउन्ड भएकोमा जोड दिएका छन्।

खनालले एमालेको नेतृत्वसँग पार्टीको वैचारिक अन्तरविरोध चर्को भए पनि राजनीतिक शक्तिको मित्रतापूर्ण अन्तरविरोध रहेको उल्लेख गरेका थिए। मालेलाई 'शत्रु शक्ति' जस्तो ठानेर दक्षिणपन्थी शक्तिलाई 'मित्र ठान्ने'र एमालेलाई 'मुख्य निशाना' ठान्ने दक्षिणपन्थी दृष्टिकोणबाट पार्टी सर्तक रहनु पर्ने उनको भनाक्ष थियो।

नेपालले नेकपा एमालेमा विद्रोह गरेर सर्वथा उचित गरेको बताउँदै कम्युनिष्ट आन्दोलनभित्र आफूहरू अगाडि आउन सक्ने बताए। उनले विचार र व्यवहारका दृष्टिकोणले पनि आफ्नो पार्टी सर्वोत्कृष्ट पार्टी भएको दाबी गरे।

खनालले कांग्रेससँगै आफ्नो पार्टी सरकारमा सहभागी भइरहेको विषयमा समेत असन्तुष्टि जनाएका छन्। उनले भनेका छन्, 'मुख्य प्रतिद्वन्दी शक्तिसँग 'गठबन्धन', 'कार्यगत एकता' वा 'मोर्चा' बनाउँदै सत्ताका चुस्की लिइरहेका छन्। यो दक्षिणपन्थी कार्यदिशा हो। दक्षिणपन्थी कार्यदिशाले वामपन्थीहरुलाई निरन्तर अधोगति, सुस्तता, विभाजन र पलायन तिर लगीरहेछ।'

बैठकमा अध्यक्ष नेपाल, सम्मानीत नेता खनाल, महासचिव घनश्याम भूसाल, सचिव रामकुमारी झाँक्रीलगायत ३० जना नेताले विचार राखेका थिए। त्यसक्रममा अधिकांशले पार्टीको कार्यशैलीमा परिवर्तनको कुरा उठाएको ती स्थायी कमिटीका सदस्यले बताएका छन्। पार्टी नेता-कार्यकर्ताले एमालेमै फर्किरहेको विषय समेत बैठकमा उठेको छ र सरकारमा सहभागी मन्त्रीहरुको कार्यशैलीमा समेत प्रश्न उठेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

महिला टी-२०आई शृंखला : पाँच खेल खेल्दा पनि जितविहीन नेपाल, पाँचौं खेलमा नेदरल्याण्ड्ससँग १० विकेटले पराजित

निर्माणधीन झोलुङ्गे पुलबाट खसेर दुई जना बेपत्ता

४.४५ अंकले घट्यो नेप्से