काठमाडौं- सरकारले राहदानी (पासपोर्ट) को दस्तुर घटाएको छ। राजपत्रमा सूचना प्रकाशित गर्दै परराष्ट्र मन्त्रालयले राहदानी नियमावली २०७७ को अनुसूची ४ मा संशोधन गरेको छ।
संशोधित व्यवस्था अनुसार सरकारले साधारण राहदानीको लागि विभाग वा जिल्ला प्रशासन कार्यालयमा निवेदन दिँदा नियम ६ को उपनियम (४) बमोजिम निवेदन दिएकोमा ५ हजार रुपैयाँ शुल्क तोकेको छ। सरकारले यसअघि जिल्ला प्रशासनमा निवेदन दिँदा ३४ पृष्ठको हकमा ५ हजार रुपैयाँ र ६६ पृष्ठको हकमा १० हजार शुल्क लिने गरेको थियो। तर, अब ६६ पृष्ठको पासपोर्ट ५ हजार रुपैयाँमा लिन सकिने व्यवस्था गरेको छ।
सरकारले सेवाग्राहीका लागि ३४ र ६६ पृष्ठका दुई पासपोर्ट वितरण गर्ने गरेको थियो। जसको शुल्क पृष्ठ अनुसार फरक तोकिएको थियो। तर, नयाँ व्यवस्थाअनुसार अब सबैलाई ६६ पृष्ठको पासपोर्ट वितरण गरिने राहदानी विभागका महानिर्देशक सुरेन्द्रकुमार यादवले बताए। ‘दुई प्रकारका पासपोर्ट वितरण गर्दै आएको थियो। अहिले शुल्क घटाएर ३४ पृष्ठको मूल्यमा नै ६६ पृष्ठको पासपोर्ट पाउने व्यवस्था गरिएको हो’ उनले भने।
सरकारले राहदानी विभागमा पासपोर्ट निकाल्दा लाग्ने शुल्क पनि घटाएको छ। यसअघि ३४ पृष्ठको हकमा १२ हजार रुपैयाँ र ६६ पृष्ठको हकमा २० हजार रुपैयाँ शुल्क लिने गरिएको थियो। अहिले ६६ पृष्ठको पासपोर्टको शुल्क पुरानो शुल्क अनुसार ६ हजार रुपैयाँ घटाएर १२ हजार मात्रै तोकेको छ।
नियम ६ को उपनियम(६) मा भनिएको छ, ‘उपनियम ५ मा जुनसुकै कुरा लेखिएको भएता पनि कसैले विभागबाटै द्रुतरुपमा राहदानी जारी गरि पाउन निवेदन दिएमा विभागले अनुसूची ४ बमोजिमका शुल्क लिइ २ कार्यदिनभित्र साधारण राहदानी जारी गर्न सक्नेछ।’ यस्तो खालको पासपोर्ट यस अघि २० हजार रुपैयाँ शुल्क लाग्ने गरेको थियो। तर संशोधित व्यवस्था अनुसार यसका लागि अब १२ हजार रुपैयाँमा ६६ पृष्ठको पासपोर्ट बन्ने भएको छ।
राहदानी हराय दोब्बर शुल्क
यस्तै राहदानी हराएको, पाना च्यातिएको, केरमेट भएको वा अन्य कारणले राहदानी प्रयोग हुन नसक्ने भएकोमा नियोगबाट नयाँ राहदानी लिनु पर्दा लाग्ने शुल्कको दोब्बर बनाइएको छ। राहदानी हराएको, पाना च्यातिएको, केरमेट भएको वा अन्य कारणले राहदानी प्रयोग हुन नसक्ने भएको खण्डमा लाग्ने दस्तुरमा थप ५ हजार रुपैयाँ शुल्क तोकिएको छ।
उत्तर र दक्षिण अमेरिकी महादेश अन्तर्गतका देशहरू, अष्ट्रेलिया, न्यूजिल्याण्ड, जापान, दक्षिण कोरिया र हङकङस्थित नेपाली नियोगमा निवेदन दिँदा राहदानी एक सय ५० अमेरिकी डलर वा सो बराबरको स्थानीय मुद्रा तोकिएको छ। यसअघि ३४ पृष्ठको लागि सोही मूल्य तोकेको थियो भने ६६ पृष्ठको हकमा २५० अमेरिकी डलर वा सो बराबरको स्थानीय मुद्रा तोकेको थियो।
रुसी महासंघ र र नेपाली राजदूताबास मस्कोको सहप्रमाणीकृत मुलुक र साइप्रसको लागि नेपाली नियोगमा निवेदन दिँदा प्रति राहदानी ३४ पृष्ठको ८० युरो वा सो बराबरको स्थानीय मुद्रा तोकेको छ। अबदेखि सेवाग्राहीले ८० युरोमा पासपोर्ट पाउनेछन्। जसमा सरकारले ५० युरो घटाएको छ। युरोपेली देशस्थित नेपाली नियोगमा निवेदन दिँदा प्रतिराहदानी १२० युरो वा सो बराबरको स्थानीय मुद्रा तोकेको छ। यसअघि सरकारले १७० युरो वा सो बराबरको स्थानीय मुद्रा तोकेको थियो।
मलेसिया, कतार, साउदी अरेबिया, संयुक्त अरब इमिरेट्स, बहराइन, लेबनान, इराक, इरान, कुबेत, इजरायल, सिरिया, जोर्डन, ओमान र यमनस्थित नियोग र सो नियोगको सहप्रमाणीकृत मुलुकको लागि नियोगमा निवेदन दिँदा प्रति राहदानी ५० अमेरिकी डलर वा सो बराबरको स्थानीय मुद्रा तोकेको छ। यसअघि सोही पासपार्ट पाउनका लागि सरकारले एक सय डलर तोकेको थियो।
अन्य एसियाली, अफ्रिकी र बाँकी सबै देशस्थित नियोगमा निवेदन दिँदा प्रति राहदानी ८० अमेरिकी डलर वा सो बराबरको स्थानीय मुद्रा तोकेको छ। सरकारले यसअघि १३० अमेरिकी डलर वा सो बराबरको स्थानीय मुद्रा तोकेको थियो।
१० वर्षभन्दा कम उमेरको आधा शुल्क
१० वर्षभन्दा कम उमेरका नाबालकको राहदानीको लागि जिल्ला प्रशासनमा निवेदन दिँदा आधा शुल्क लाग्नेछ। सोहि उमेरका नाबालकले राहदानीको लागि विभागमा निवेदन दिँदा ९ हजार ५ सय रुपैयाँ शुल्क लाग्ने भएको छ। सरकारले यसअघि ६६ पृष्ठको पासपोर्टका लागि १४ हजार ५ सय रुपैयाँ शुल्क तोकेको थियो। विभागबाट जारी गरिने प्रतियात्रा अनुमतिपत्रको ४ हजार रुपैयाँ, नियोगबाट जारी गरिने प्रतियात्रा अनुमतिपत्रको ५० अमेरिकी डलर वा सो बराबरको स्थानीय मुद्रा तोकेको छ।
विभागबाट जारी गरिने सिम्यान्स अभिलेख किताब (सिम्यान्स पासपोर्ट) को लागि १२ हजार रुपैयाँ र नियोगबाट जारी गरिने सिम्यान्स अभिलेख किताब (सिम्यान्स पासपोर्ट) को लागि १२० अमेरिकी डलर वा सो बराबरको स्थानीय मुद्रा तोकेको छ। अस्थायी राहदानीको लागि ५० अमेरिकी डलर वा सो बराबरको स्थानीय मुद्रा तोकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
