काठमाडौं- देश आर्थिक संकटोन्मुख छ। संकटको लहरो देशको ढुकुटीदेखि व्यक्ति बगलीसम्म फैलिएको छ।
आर्थिक तरलतामा संकटको बाँध लागेपछि निकटस्थको गर्जो टारेको पैसा समेत उठ्न छाडेको छ। त्यसले व्यक्तिको आर्थिक गतिविधि मात्रै होइन, सामाजिक सम्बन्धका तन्तुहरु पनि चुँडिन थालेका छन्।
निकटस्थ ठानेर अप्ठ्यारो परेको बेला गुन लगाउन पैसा सरसापट लिनुदिनु सामान्य कुरा हो। तर, परिस्थिति सहज भएपछि पैसा फिर्ता हुनु परको कुरा मित्रत्व, साथीत्व र अपनत्व समेत गुमिसक्छ, सापटी दिएको पैसा फिर्ता हुँदैन। यो आमलोकले भोगेको कुरा हो। त्यही आमलोकको भोगाइलाई ‘पैसा सापटी’ गीतमार्फत् सुरमा ढालेका छन्, लोकगायक बद्री पंगेनीले।
सहयोगले जीवनको लय बिगारेको विषयलाई बद्री पंगेनीले यसरीमा लयमा ढालेका छन् :
एक महिनालाई सापटी माग्यो
एक वर्ष भो कता भाग्यो
सापटी नदिउँ आफन्त टाढा
सापटी दिँदा बिग्रियो सारा
ऋणका रुपमा दिएको पैसा भन्दा सहयोगका रुपमा दिएको पैसा उठाउन सहज हुनुपर्ने हो। सकेसम्म आफैं सम्झेर फिर्ता गर्नुपर्ने हो तर, लिँदा फकाउने र दिनुपर्दा थर्काउने मानवीय स्वभाव बनिसकेको छ। जहाँ यसरी प्रस्तुत हुन्छन् पंगेनी :
सुरसारै छैन पैसा फर्काउने
खाइदिन्नँ भन्दै उल्टै थर्काउने
पुलिस केस गरौं प्रमाण छैन
ठग्लान् भनेर दिएको हैन
नजिकको हितैसी समस्यामा परेर छट्पटाएको हेर्न सकिँदैन। त्यस्तो अवस्थामा घरपरिवारसँग सल्लाह नगरेर समेत गर्जो टारिएको हुन्छ। सुटुक्क लिएको पैसा चुटुक्क फिर्ता आउने आशा हुनु स्वभाविक हो। तर, लिनेले त्यही भावना कायम राख्दैन। हितैसीको अहित हुनेगरी झुलाउँछ। त्यो अवस्थालाई समेत गीतमा उनले प्रस्तुत गरेका छन्। जहाँ महिलाको प्रतिनिधित्व गर्दै रचना रिमाल गाउँछिन् :
बुढाको कुरा सुनिन पहिले
पछुताउनु पर्या छ अहिले
करोडपति म पनि छैन
धेरै भएर दिएको हैन
अहिले चेक बाउन्सको संख्या बढिरहेको बैंकहरु बताउँछन्। कतिपय अवस्थामा चाहेर होइन, व्यवहार नै बिग्रेर सापटीका कारण साथीकै माया मार्नुपर्ने अवस्थामा पुगिरहेका हुन्छन् मान्छेहरु। टार्नका लागि दिइएको चेक बाउन्स भइरहन्छ। पंगेनीले गीतमार्फत् एउटा व्यवहारको ‘अव्यवहारिक कथा’ सुनाएका छन्।
करुण रसमा प्रस्तुत गीतमा पंगेनीसँगै गायिका रिमालको गायनले यथार्थको नजिक पुर्याएको छ। पंगेनीले आफ्नै लय र शब्दमा लामो समयको अन्तरालमा गीत ल्याएका हुन्।
गीतको भिडियो समेत निर्माण भएको छ। जहाँ सागर लम्साल ‘बले‘, अनु रेग्मी, नन्दा बस्याल, सन्तोष पौडेल ‘बटुक’ लगायतले अभिनय गरेका छन्। उक्त भिडियोको कथा र निर्देशन पंगेनी आफैंले गरेका छन्।
हेर्नुहोस् भिडियो :
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
