काठमाडौं– ‘घर शान्ति नै विश्व शान्तिको आधारः दिगो विकासका लागि लैङ्गिक हिंसारहित समाज’ भन्ने नाराकासाथ हालै देशैभर लैङ्गिक हिंसाविरुद्धको १६ दिने अभियान मनाइयो। मंसिर १० गतेदेखि २४ गतेसम्म देशभर विभिन्न गोष्ठी, सेमिनार, अन्तर्क्रिया, छलफल गर्दै लैङ्गिक हिंसाविरुद्धको १६ दिने अभियान चलाइयो।
एकातिर सरकारी र गैरसरकारी निकायले लैङ्गिक हिंसाविरुद्धको अभियान चलाइरहँदा अर्कोतिर भने हिंसाकै कारण ६ जना महिलाको ज्यान गएको छ। परिवारका सदस्यबाटै भएका हत्यादेखि आत्मदाहसम्मका घटना यो १६ दिनको अवधिमा भए। हिंसा न्यूनीकरण लागि भन्दै विभिन्न कार्यक्रम भइरहँदा सोही अवधिकमा भएका यस्ता अमानवीय र क्रुर घटनाले लैङ्गिक हिंसा विरुद्धको अभियानमाथि नै प्रश्न उठिरहेको सरोकारवालाहरू बताउँछन्।
घटना–१
मंसिर १२ गते एउटा फोटो सामाजिक सञ्जालमा भाइरल भयो। एक पुरुषले आफ्नै श्रीमतीको हत्या गरेर टाउको प्लाष्टिकको झोलामा पोको पारेर हातमा बोकेर भाग्दै गरेको तस्बिर थियो, त्यो। उक्त फोटोले सामाजिक सञ्जाल ततायो।
घटना सुर्खेतको पञ्चपुरी नगरपालिका–३ स्थित तोक्मामा भएको थियो। तोक्माका ३८ वर्षीय अमरबहादुर आले मगरले ३० वर्षीया श्रीमती मिनाको हत्या गरेर भाग्दै गरेको बेला प्रहरीले पक्राउ गरेको थियो।
अमर वैदेशिक रोजगारीबाट हालै मात्र घर फर्किएका थिए। घरयासी विवादका कारण उनले श्रीमतीको हत्या गरेको प्रहरीले जनाएको छ। अमरलाई प्रहरीले पक्राउ गरेर हिरासतमा राखेको छ। घटनाका विषयमा अनुसन्धान भइरहेको सुर्खेत प्रहरीले जनाएको छ।
घटना–२
काठमाडौं बानेश्वरमा बस्ने २७ वर्षिया पुष्पा न्यौपानेको मंसिर १९ गते कीर्तिपुरको बर्न अस्पतालमा निधन भयो। उनले मंसिर १८ गते धुम्बारबाहीस्थित सुदन संग्रौलाको घर अगाडि आत्मदाहको प्रयास गरेकी थिइन्। उनी किन सुदनको घर अगाडि पुगेर आत्मदाह गर्ने निर्णयमा पुगिन्? प्रहरी अनुसन्धानको ठोस तथ्य सार्वजनिक नभएपनि पुष्पाले आत्मदाह गर्नुको कारण सुदनसँगको इंगेजमेन्ट तोडिनु रहेको देखिएको छ।
पुष्पाले आत्मदाहको प्रयासको अघिल्लो दिन मंसिर १७ गते सुदनको परिवारले बुद्धनगरस्थित पुष्पाको परिवारकहाँ पुगेर यी दुईको इंगेजमेन्ट तोडेका थिए। उनीहरूले इंगेजमेन्टमा लिएको गहना र दक्षिणा फिर्ता गर्यो।
त्यसको भोलिपल्ट पुष्पाले सुदनको घरअगाडि पुगेर शरीरमा पेट्रोल छर्केर आगो लगाएकी लगाइन्। उनलाई तत्कालै महाराजगञ्जथित त्रिवि शिक्षण अस्पताल लगियो। त्यहाँ उपचार सम्भव नभएपछि कीर्तिपुरस्थित बर्न अस्पतालमा लगिएकामा १९ गते उनको निधन भयो।
पुष्पाको दरबारमार्गस्थित ‘केल्मी’को शोरुममा काम गर्थिन्। झापाका सुदनसँग त्यहीँ चिनजान भएको थियो। सुदनको परिवारले न्युरोडमा पसल गर्थे। उनीहरुको चिनजान विस्तारै प्रेममा परिणत भयो। त्यसपछि दुवैको परिवारको रोहबरमा भदौ १८ गते पुष्पा र सुदनले इंगेजमेन्ट गरेका थिए।
मंसिरमै बिहे गर्ने भनेपनि बिहेको मिति तय भएको थिएन। पुष्पाको परिवारले बिहेको मिति तय गर्न सुदनको परिवारलाई आग्रह गरेका थिए। मंसिर १७ गते सुदनको परिवार अचानक इंगेजमेन्ट तोड्नका लागि पुष्पाको घर पुगे।
इंगेजमेन्ट तोडिएपछि त्यसको पीडा सहन नसकेर पुष्पाले आत्मदाहको प्रयास गरेको उनको परिवारको दाबी छ। उनीहरुले सुदनसहित उनको परिवाविरुद्ध किटानी जाहेरी दिएका थिए। तर, प्रहरीले सुदनलाई पक्राउ गरेर आत्महत्या दुरुत्साहनको मुद्दामा अनुसन्धान गरिरहेको छ।
घटना–३
बैतडीको पञ्चेश्वर गाउँपालिका–४ सौलोडा घर भएकी माया लुहारको उनका प्रेमी भरतराज कोलीले घाँटी रेटेर हत्या गरे। मंसिर १४ गते जंगलमा हत्या गरेर फालिएको अवस्थामा शव फेला पर्यो। मायासँगै रहेकी भतिजी नेहामाथि पनि भरतले हत्या प्रयास गरे। नेहालाई गम्भीर घाइते अवस्थामा उद्धार गरियो।
कोली बैतडीकै शिवनाथ गाउँपालिका–४ सोल्पलाका हुन्। कोली सशस्त्र प्रहरी हुन्। कोली मंसिर ७ गते सशस्त्र प्रहरी बल नेपाल हुल तथा दंगा व्यवस्थापन तालिम शिक्षालय, पोखरा कास्कीबाट घर बिदामा मंसिर ९ गते आफ्नो घर पुगेका थिए। मंसिर १० गते आफ्नौ घरमा बसी ११ गते मायालाई भेट्न पुगेका थिए।
२१ वर्षिया माया आफ्नै भतिजी नेहासँग बजारमा कपडा सिलाउन गएकी थिइन्। भरतराजले मायाको मोबाइल खोसेका थिए। उनले मायालाई शिवनाथ–४ ओल्या ओख्डानी ठूलो खोला सामुदायिक वनमा मोबाइल लिन बोलाएका थिए। तर, उनले मायाको हत्या गरे। उनी किन मायाको हत्या गर्ने मनस्थितिमा पुगे भन्ने अनुसन्धान भइरहेको छ। प्रहरीका अनुसार मायाको अरुसँग पनि प्रेम सम्बन्ध रहेको आशंका भरतले हत्या गरेको हुन सक्छन्। तर, घटना अनुसन्धानकै क्रममा रहेकाले थप रहस्य खुल्न बाँकी रहेको प्रहरीले बताएको छ। भरतराजलाई प्रहरीले महेन्द्रनगरबाट पक्राउ गरेर बैतडी पुर्याएको थियो।
घटना–४
बर्दियाको गुलरिया नगरपालिका–१ की २६ वर्षीया नानकला बस्नेतलाई श्रीमान बोधराज बस्नेतले कुटपिट गरी हत्या गरे। घरायसी विवादमा बोधराजले नानकलाई मंसिर १२ गते मरानासन्न हुनेगरि कुटपिट गरेका थिए।
गम्भीर घाइते भएकी नानकलालाई उपचारका लागि बर्दिया अस्पताल गुलरिया लैजाँदै गर्दा बाटोमै मृत्यु भयो। बर्दिया प्रहरीले बोधराजलाई सोही दिन पक्राउ गरेर हिरासतमा राखेको छ। अहिले घटनाको थप अनुसन्धान भइरहेको प्रहरीले जनाएको छ।
घटना–५
धनुषाको बटेश्वर गाउँपालिका–५ शान्तिपुरमा अमृता कुमारी यादवलाई उनका पति वीरेन्द्रकुमार यादवले बञ्चरो प्रहार गरेर हत्या गरे। मंसिर २६ गते बिहान ४ बजे चिया पकाउने विषयमा यादव दम्पतीबी विवाद भयो।
विवादले उग्ररुप लिएपछि ३२ वर्षीय वीरेन्द्रले २८ वर्षीया श्रीमती अमृतालाई बञ्चरो प्रहार गरि हत्या गरे। गम्भीर घाइते भएकी अमृतालाई उपचारका लागि जनकपुरको काव्या अस्पताल पुर्याइएको थियो। उनको उपचारको क्रममा मृत्यु भयो। वीरेन्द्रलाई धनुषा प्रहरीले पक्राउ गरेर अनुसन्धान गरिरहेको छ।
घटना–६
सप्तरीको राजविराज नगरपालिका–१ चनौरा पडरियाकी ४० वर्षीया गीता रजकको पति हिरालाल रजकले हत्या गरे। टाउको र निधारमा धारिलो हतियार प्रहार गरी हत्या गरेको अवस्थामा गीताको शव मंसिर १० गते प्राङ्गारिक मल बनाउने निर्माणाधीन खुल्ला भवनको प्यासेजभित्र फेला परेको थियो।
उनीहरु रामपुरको एक घरमा भाडामा बस्दै आएका थिए। हत्या आरोपमा प्रहरीले ५२ वर्षीय हिरालाललाई मंसिर १० गते गिरफ्तार गरेर घटनाको अनुसन्धान गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
