काठमाडौं– मंसिर ४ गते सम्पन्न भएको प्रतिनिधि सभा निर्वाचनको नतिजा आउनेक्रम जारी छ।
हालसम्म ७ स्थानको नतिजा सार्वजनिक भएको छ। जसमा नेपाली कांग्रेसले ४ स्थानमा जित हात पारेको छ। नेकपा एमालेले २ स्थानमा जित हात पारेको छ भने रेशम चौधरीको नागरिक उन्मुक्ती पार्टीले एक सिटमा जित हात पारेको छ।
कांग्रेसले ४८ क्षेत्रमा अग्रता कायम गरेको छ भने एमालेले ४२ स्थानमा अग्रता कायम गरेको छ। त्यस्तै माओवादी केन्द्रले १५ स्थानमा अग्रता कायम गरेको छ।
त्यस्तै रवि लामिछानेको नेतृत्वको राष्ट्रिय स्वतन्त्र पार्टीले १२ स्थानमा अग्रता कायम गरेको छ। त्यस्तै राप्रपाले ६ स्थानमा अग्रता कायम गरेको छ। यसरी मतगणना चलिरहँदा कांग्रेसका केही 'हेविवेट' उम्मेदवार पछि परेका छन्।
हेविवेट उम्मेदवार जो पछि परे
रामचन्द्र पौडेल– नेपाली कांग्रेसका वरिष्ठ नेता रामचन्द्र पौडेल अहिले पछि परेका छन्। तनहुँ–१ का उम्मेदवार नेपाली कांग्रेसका नेता पौडेललाई नेकपा एमालेका उम्मेदवार एकबहादुर रानाले उछिनेका छन्।
प्रारम्भदेखि लगातार अग्रता लिएका पौडेललाई रानाले पछि पारेका हुन्। ९ हजार ७ सय ५६ मत गणना हुँदा एमालेका रानाले ३ हजार ३ सय ४२ ल्याएर अग्रता लिँदा कांग्रेसका पौडेल ३ हजार २ सय १० मत ल्याएर पछि परेका छन्।
बालकृष्ण खाड– गृहमन्त्री बालकृष्ण खाड अहिले पछाडि परेका छन्। उनी राप्रपाका दीपक बोहोरासँग पछाडि परेका हुन्। रुपन्देही–३मा बोहोराले ४ हजार ५ सय ७० मत ल्याएर अग्रता कायम गरेका छन्। खाडले ४ हजार २ सय १९ मत प्राप्त गर्दैै उनलाई पछ्याइरहेका छन्। २०७४ सालमा खाणले उक्त क्षेत्रबाट जित हात पारेका थिए।
ज्ञानेन्द्रबहादुर कार्की– सरकारका प्रवक्ता ज्ञानेन्द्रबहादुर कार्की पनि पछाडि परेका छन्। प्रारम्भिक मतगणनादेखि अग्रतामा रहेका उनी नेकपा एमालेका जगदिशप्रसाद कुसियैतसँग पछि परेका हुन्। कुसियतले २ हजार २ सय ५ मत प्राप्त गरेका छन् भने कार्कीले २ हजार ९६ मत प्राप्त गरेका छन्। कार्की २०७४ सालमा उक्त क्षेत्रवाट प्रतिनिधि सभामा निर्वाचित भएका थिए।
वीरबहादुर बलायर– नेपाली कांग्रेसका नेता वीरबहादुर पलायत प्रारम्भिक मतगणनामा पछि परेका छन्। उनी नेकपा एमालेका उम्मेदवार लेखराज भट्टसँग पछाडि परेका हुन्। कैलाली–४मा भट्टले ७ हजार ५ सय २७ मत ल्याएर अग्रता कायम गरिरहेका छन्।
उनलाई कांग्रेसका बलायरले ६ हजार ८ सय ४३ मत ल्याएर पछ्याइरहेका छन्। २०७४ सालमा भट्ट निर्वाचिन भएका थिए।
विजय गच्छादार– विजय कुमार गच्छदार प्रारम्भिक मत गणनामा पछि परेका छन्।
भगवती चौधरी र राष्ट्रिय स्वतन्त्र पार्टीका कमलबाबु मैनालीले अग्रता लिएका छन्। स्वतन्त्र पार्टीका मैनालीले ८ सय २९ मत पाएका छन् भने एमालेकी चौधरीले ७ सय ३४ मत ल्याएकी छन्। गच्छदारले ५ सय ३६ मत पाएका छन्।
गच्छदार निलम्बनमा रहेका छन्। ललिता निवासमा भ्रष्टाचार मुद्दा दायर भएपनि उनी निलम्बनमा परेका थिए।
कृष्णप्रसाद सिटौला– नेपाली कांग्रेसका नेता कृष्णप्रसाद सिटौला पनि पछि परेका छन्। उनी राप्रपाका अध्यक्ष राजेन्द्र लिङदेनसँग पछाडि छन्।
झापा–३मा लिङ्देनले ७ हजार ४० मत ल्याएका छन्। सिटौलाले ५ हजार २ सय २६ मत ल्याएका छन्। ०७४ सालमा पनि उनीहरू प्रतिस्पर्धी थिए । लिङदेनले जित हात पारेका थिए।
सुजता कोइराला– मोरङ–२ मा उम्मेदवार रहेकी सुजता कोइराला पनि पछि परेकी छन्।
उनलाई नेकपा एमालेका उम्मेदवार ऋषिकेश पोखरेलले पछि पारेका छन्। पोखरेलले ४ हजार १ सय ६० मत ल्याएका छन्। कोइरालाले ४ हजार ५ मत प्राप्त गरेकी छन्। २०७४ सालको निर्वाचनमा उक्त क्षेत्रमा मिनेन्द्र रिजालले जित हात पारेका थिए।
सुनिलबहादुर थापा– राप्रपाबाट नेपाली कांग्रेस प्रवेश गरेका उनी धनकुटाबाट उम्मेदवार छन्। सुरुवाती अग्रतामा उनी पछाडि परेका छन्।
नेकपा एमालेका उम्मेदवार राजेन्द्रकुमार राईसँग उनी पछाडि परेका हुन्। राईले ७ हजार ६ सय २ ल्याउँदै अग्रता कायम गरेका छन् भने थापाले ६ हजार ४ सय ८३ मत ल्याउँदै पछ्याइरहेका छन्।
२०७४ सालको निर्वाचनमा पनि थापा राईसँगै पराजित भएका थिए।
उमाकान्त चौधरी– खानेपानी मन्त्री रहेका उमाकान्त चौधरी पनि पछि परेका छन्। बारा–१ मा उनी नेकपा एमालेका उम्मेदवारसँग पछि परेका हुन्। एमालेका अच्युतप्रसाद मैनालीले १० हजार ९ सय ९१ मत प्राप्त गरेका छन् भने चौधरीले ८ हजार ३ सय ८५ मत प्राप्त गरेका छन्।
२०७४ सालमा उक्त क्षेत्रमा चौधरीले जितेका थिए।
पुष्पा भुसाल– निर्वतमान उपसभामुख पुष्पा भुसाल पनि प्रारम्भिमक मतगणनामा पछि परेकी छन्।
उनी नेकपा एमालेका टोपबहादुर रायमाझीसँग पछि परेकी हुन्।
रायमाझीले ११ हजार ६ सय ५२ मत प्राप्त गरेका छन् भने भुसालले ९ हजार २ सय ४१मत प्राप्त गरेकी छन्। ०७४ सालको निर्वाचनमा रायमाझीले जितेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
