काठमाडौं- देश प्रतिनिधि सभा र प्रदेश सभाको निर्वाचन सम्मुखमा छ।
आगामी मङ्सिर ४ गते हुँदै गरेको निर्वाचनमा प्रतिनिधि सभामा सदस्य बन्न स्वतन्त्र उम्मेदवारी दिने लहर नै चलेको छ। प्रतिनिधि सभाका निर्वाचनको कारण प्रदेश सभा छायामा परेको अवस्थामा काठमाडौं ६ (ख) मा भने प्रमेश श्रेष्ठले स्वतन्त्र उम्मेदवारी दिएका छन्। २८ वर्षीय श्रेष्ठ आफ्नो चुनाव चिह्न ‘लालटिन’ लिएर मतदातामाझ पुगिरहेका छन्।
उनी आफ्नो उम्मेदवारी पुस्तान्तरण, राजनीतिक रूपान्तरण र निष्पक्ष संसदीय अभ्यासको उदाहरणको लागि भएको बताउँछन्। भन्छन्, ‘लोकतन्त्रलाई कमजोर बनाउँदै दलतन्त्र र लुटतन्त्र हाबी भएको अवस्थालाई चिर्न यसपालि स्वतन्त्र उम्मेदवारी दिएँ।’
श्रेष्ठ आफू प्रदेश सभा संसद्को लागि सक्षम भएकाले नै उम्मेदवारी दिएको बताउँछन्। उनी धेरै भन्दा धेरै मतदातालाई आफ्नो परिचय, अनुभव र एजेन्डाहरू बुझाउन मानिसहरूको घरघरमा पुगेको बताउँछन्।
‘मलाई पूर्ण विश्वास छ, अब मतदाताहरू ब्यूँझी सके। सबै उम्मेदवारहरूको तुलनात्मक अध्ययन गर्ने छन् र सक्षमलाई भोट हाल्ने छन्,’ उनी भन्छन्, ‘म आफूनै एउटा नमुना सांसद बन्न सक्ने क्षमता चुनाव जित्ने आधार हो।’
हुन त उनले प्रदेश सभामा स्वतन्त्र उम्मेदवारी दिएका छन्। उनी ७ वर्षदेखि विभिन्न सामाजिक अभियानको नेतृत्वदायी भूमिकामा पनि थिए। पछि विवेकशील नेपाली दलमा रहेर पनि ७ वर्ष विभिन्न अभियानमा जोडिए। तर उक्त पार्टी विभिन्न टुटफुटको शृङ्खला भोगेपछि भने स्वतन्त्र उम्मेदवारी दिएका छन्।
यस्ता छन् एजेन्डा
उनी घरदैलो जाँदा मुख्य गरी ५ वटा एजेडा लिएर मतदातामाझ जाने गरेको बताउँछन्। ‘म घरदैलोमा जाँदा ५ वटा मुख्य एजेन्डा लिएर गएको छु। पहिलो, बाग्मती प्रदेशभित्र विद्यमान सर्वव्यापी चरम दलीय सिन्डिकेट र लुटतन्त्र तोड्न आवाज उठाउनेछु र हरेक कदम त्यसैतर्फ चाल्नेछु। दलको सांसद होइन जनताको सांसद बनेर काम गर्ने छु,’ उनले भने।
उनको दोस्रो एजेन्डामा ५ वर्षभित्र शिक्षा, स्वास्थ्य, रोजगार, दिगो विकास, वातावरण, प्रविधि, सामाजिक न्याय जस्ता विषयहरूमा कम्तीमा १५ विधेयकहरूमा उल्लेखनीय योगदान गर्ने उल्लेख छ।
यस्तै नागरिकको सहजताको लागि बाग्मती प्रदेशभरि पेपरलेस गभरनेन्सको अवधारणालाई पूर्ण रूपमा कार्यान्वयन गर्न अधिकांश सरकारी काम कारबाही अनलाइन प्रविधिबाटै गर्न मिल्ने बनाउन आवश्यक विधेयक पेस गर्ने उनको एजेन्डा छ।
प्रादेशिक तहमा वैदेशिक रोजगारीमा जाँदा अन्यायमा परेका नागरिकहरूलाई न्यायोचित निर्णय गर्न सक्ने र गैर कानुनी रूपमा वैदेशिक रोजगारी सम्बन्धी काम गर्नेलाई आवश्यक कारबाही गर्न सक्ने एउटा सशक्त संयन्त्र बनाउन पहल गर्ने र आवश्यक विधेयक पेस गर्ने उनको एजेन्डा छ।
यस्तै स्वदेशमै रोजगारीको अवस्था सृजना गर्न र उद्यमशीलता प्रवर्द्धन गर्न बाग्मती प्रदेश अन्तर्गत शैक्षिक संस्थाहरू द्वारा ‘उद्यमशीलतामा आधारित शिक्षा’ निःशुल्क प्रधान गराउन पहल गर्ने र आवश्यक विधेयक पेस गर्ने उनको एजेन्डा छ।
के छन् प्रतिबद्धता?
श्रेष्ठ युवा उमेर देखि नै सामाजिक अभियानका साथसाथै वैकल्पिक राजनीतिमा सहभागी भए। तत्कालीन विवेकशील नेपाली दलमा राजनीति गर्दै गर्दा सुसंस्कृत राजनीतिको अभ्यास गरेका प्रदेश सभामा पनि सुसंस्कृत तरिकाले पेस हुने उनी आम मतदाताहरूलाई बुझाउँदै आएका छन्। यसका साथै उनी विषय विज्ञसँग छलफल र सुझाव लिएर काम गर्ने श्रेष्ठ बताउँछन्।
‘म विषय विज्ञहरूको सल्लाह–सुझाव बमोजिम संसदीय अभ्यास पूर्ण तयारीका साथ पूरा गर्ने, काठमाडौ क्षेत्र ६ (२) ले मात्र होइन सम्पूर्ण बाग्मती प्रदेशले गर्व गर्न लायक नमुना सांसदको भूमिका खेल्नको लागि उम्मेदवारी दिएको हो,’ उनी भन्छन्, ‘संसदीय विकृति अन्तको लागि लोकतान्त्रिक पद्धति र संसद्को गरिमा अनुसारको भूमिका निर्वाह गर्ने प्रतिबद्धता लिएको छु। निजी स्वार्थको लागि विभिन्न किसिमका प्रलोभन तथा पदीय मर्यादा विपरीत भइरहेको संसदीय फोहोरी खेलमा कहिल्यै पनि समावेश हुने छैन,’ उनी भन्छन्।
आफ्नो निर्वाचन क्षेत्रभित्र भएको बजार, उद्योग, कृषि, पर्यटन जस्ता क्षेत्रलाई व्यवस्थित, आयमूलक, गुणस्तरीय र प्रतिस्पर्धी बनाउन भूमिका नेतृत्व गर्न तयार भएको आम मतदातालाई बुझाएको उनी बताउँछन्।
नयाँ टेस्टको खोजीमा मतदाता
आम जनता अहिले पनि गाँस, वास, कपासका साथै गुणस्तरीय शिक्षा र स्वास्थ्य नै भएको श्रेष्ठको बुझाइ छ। उनी युवाहरू स्वदेशमा नै केही गर्न खोजिरहेको बताउँछन्।
‘यदि राजनीति ठिकठाक चल्थ्यो भने त म जत्तिको युवा देशमा नै आइटी उद्यम गरेर बसेको हुन्थे। वा युवाहरुलाई आइटी सम्बन्धी ट्रेनिङ दिइरहेको हुन्थे। तर पहिले राजनीति सफा नभई अन्य काम गर्न नसकिने रहेछ। युवाहरूलाई विदेश पलायनमा रोक्न नसकिने रहेछ,’ उनी भन्छन्।
यही कारण पनि उनी युवाहरूलाई नेपालमा नै बसेर आफ्नो उद्यम सञ्चालनको लागि सहजीकरण होस भन्ने बताउँछन्।
विपक्षीप्रति मूल्याङ्कन
उनी सबै उम्मेदवारहरूलाई सम्मान गर्ने बताउँछन्। तर पनि उनीहरूले आम मानिसको चासो र अपेक्षा अनुसारको एजेन्डा लिएर जनता माझ नआएका श्रेष्ठ बताउँछन्।
‘नेतृत्वले जनताको आवश्यकताका साथै आगामी भविष्यमा के गर्न सकिन्छ भन्ने सोचेर निर्णय गर्ने हो। तर उनीहरूमा जनताको लागि काम गर्ने भन्दा पनि पार्टीको ह्विप मान्ने र अर्को चुनावको लागि कसरी उम्मेदवार बन्ने भन्ने ध्याउन्नमा नै उनीहरूको ५ वर्ष खेर जाने देखेको छु’ उनी थप्छन्, ‘त्यसैले आम मतदाताहरूले यस पटक आफ्नो विवेक प्रयोग गरेर आफ्नो अमूल्य मतदान गर्छन् भन्ने मलाई लागेको छ।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1737300486.jpg)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
