काठमाडौं– किसानको साइनो माटोसँग हुन्छ। कात्तिक महिना त किसानका लागि उत्सव नै हो। किनकि, असारमा ‘मानो रोपेर’ यो महिना ‘मुरी भित्र्याउने’ चटारो हुन्छ।
किसानले अन्नबाली भित्र्याउने समयमा आम चुनाव हुँदैछ। गाउँ-गाउँमा चुनावी सरगर्मी बढेको छ। बाह्रै महिना काठमाडौं बस्ने नेताहरु अहिले गाउँ पसेका छन्। मंसिर ४ मा हुने निर्वाचनका लागि भोट माग्न उम्मेदवारहरु किसानका घरदैलोमा पुगेका छन्।
गाउँघरका मतदातालाई आफूतिर तान्न १ महिनादेखि उम्मेदवारले निकै मिहिनेत गरिरहेका छन्। कुनै पनि तालिम, गोष्ठी, सेमिनार नछुटाउने नेताहरु अहिले खेतका आली, खला-खलिहानमा भेटिन्छन्।
कतिपय उम्मेदवार त मतका खातिर आफैं किसानका खेतमा पुगेर धान काट्ने, झार्ने समेत गरिरहेका छन्। अरु बेला जनताको फोन समेत नउठाउनेहरु यो बेला पिँढीमा बसेर जनतासँगै खाना खाइरहेको फोटो सामाजिक सञ्जालमा राख्दै फरक हुने प्रयास गरिराखेका छन्।
काभ्रेपलाञ्चोक- २ बाट प्रतिनिधि सभामा टिकट पाएका नेपाली कांग्रेसका नेता शिव हुमागाईंले उम्मेदवारी दर्ताकै दिन जनताको अगाडि लम्पसार पसेर जमिन ढोगे। उनले जनतालाई आकर्षित गर्न यस्तो अस्त्र प्रयोग गरेका थिए। उनी एमालेका पोलिटब्यूरो सदस्य गोकुल बास्कोटासँग चुनावी प्रतिस्पर्धा गरिरहेका छन्।
यस्तै, नेपाली कांग्रेसका केन्द्रीय सदस्य एवं नवलपरासी पश्चिम- १ का उम्मेदवार विनोद चौधरीले चुनावी प्रचारका क्रममा मोटरसाइकलको पछाडि बसेको फोटो सामाजिक सञ्जालमा हाले। त्यसको धेरैतिर आलोचना समेत भयो। चौधरी ग्रुपका मालिक समेत रहेका चौधरी एमालेको समर्थन रहेका राप्रपाका भोजराज ढकालसँग चुनावी मैदानमा छन्।
चौधरी जनताका घर-घर जाने। काम गरेको ठाउँमा गएर भोटको लागि अपिल गर्ने। जनताको घरमा गएर टपरीमा भात खाने गरिरहेका छन्। उनले टयाक्टर चलाएको फोटो समेत सामाजिक सञ्जालमा पोस्ट गरेका छन्।
अरबपति चौधरीलाई अघि-पछि भेट्नकै लागि घण्टौँ कुर्नुपर्छ। उनीसँग प्रत्यक्ष कुराकानी पनि हुँदैन। केही काम पर्दा सल्लाहकारसँग भेटेर फर्किनुपर्ने अवस्था हुन्छ। तर तिनै व्यक्ति मत तान्नका लागि भने अनेक फण्डा गर्दै आएका छन्। २०६४ र २०७४ मा समानुपातिक सांसद बनेका चौधरी अहिले पहिलो पटक प्रत्यक्ष उम्मेदवार बनेका हुन्।
चौधरी जस्तै नेकपा एमालेका सचिव योगेश भट्टराई पनि मत तान्न अनेक उपाय अपनाउँदैछन्। खाना पकाइरहेकी एक वृद्धाको भान्सामा जुत्ता नफुकाली गएर भोट मागेको तस्बिर सामाजिक सञ्जालमा भाइरल नै भयो।
उनले मत तान्न केटाकेटीसँग क्यारेम बोर्ड खेलिरहेको समेत देखिएको थियो। उनी मत माग्दै किसानका खेतबारीमा समेत पुगिरहेका छन्।
बाजुराबाट प्रतिनिधि सभा उम्मेदवार बनेका एमाले स्थायी कमिटी सदस्य कर्णबहादुर थापा चुनावी प्रचारका क्रममा कहिले धान काट्ने, कहिले ओखलमा धान कुट्ने त कहिले गोरु जोतिरहेका भेटिन्छन्। उनले जनताका कामसँग जोडिएर मत तान्न अनेक अस्त्र प्रयोग गरिरहेका छन्।
थापा २०७० को प्रत्यक्ष निर्वाचित सांसद हुन्। दोस्रो पटक प्रतिनिधि सभामा उम्मेदवार बनेका थापा कांग्रेसका सहमहामन्त्री बद्रीप्रसाद पाण्डेसँग प्रतिस्पर्धा गर्दैछन्।
एमालेका अर्का नेता नवराज सिलवाल पनि चुनावमा जनतालाई प्रभावमा पार्न अनेक चटक गर्दै आएका छन्। ललितपुर- १ बाट प्रतिनिधि सभा उम्मेदवार बनेका सिलवाल मत तान्न घरमा रङ लगाइदिनेदेखि किसानका खेतमा गएर धान काट्ने र धान खेतमा बसेर खिचाउने गरिरहेका छन्।
सिलवाल २०७४ मा यही क्षेत्रबाट निर्वाचित सांसद हुन्। उनी पहिला पनि यसरी मतदाताका खेतबारीमा गएर नै धान काटेको तस्बिर सार्वजनिक भएपछि विवादित भएका थिए।
एमालेका सचिव तथा रुपन्देही- १ का उम्मेदवार छविलाल विश्वकर्मा पनि मतदातालाई प्रभाव पार्न धान काट्दै भोट मागिराखेका छन्। विश्वकर्मा एमालेका पूर्वनेता घनश्याम भुषालसँग प्रतिस्पर्धा गर्दैछन्।
नेकपा एकीकृत समाजवादीका उपमहासचिव तथा प्रवक्ता जगनाथ खतिवडा किसानका धान झार्दै भोट मागिराखेका छन्। उदयपुर- २ बाट उम्मेदवार बनेका खतिवडा किसानका खेतबारीमा गएर मतदातालाई प्रभाव पार्ने कोसिस गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
