काठमाडौं– नेपाली राष्ट्रिय क्रिकेट टोलीका निलम्बित कप्तान सन्दीप लामिछाने विरुद्धको बलात्कार मुद्दामा थुनछेक चलिरहेको छ। बुधबारबाट सुरु भएको थुनछेक बहस बिहीबार पनि चल्यो।
बिहीबारसमेत बहस नसकिएकाले मुद्दा हेर्दाहेर्दैमा राखिएको छ। जिल्ला अदालत काठमाडौंका न्यायाधीश माधव घिमिरेको इजलासमा भएको थुनछेक बहसमा बिहीबार सन्दीपका तर्फबाट वरिष्ठ अधिवक्ताहरू कृष्ण सापकोटा,सविता भण्डारी, लव मैनाली, रमन श्रेष्ठ र अधिवक्ता सुवास पाठकले बहस गरे।
सबैजसो अधिवक्ताहरूले सन्दीप निर्दोष रहेको, बलात्कार भएको पुष्टि गर्ने कुनै प्रमाण नभएको जिकिर गर्दै तत्काल रिहा हुनुपर्ने माग राखे। उनीहरूले बलात्कार गरेको कुनै ठोस प्रमाण अभियोजनमा नभएको दाबी गर्दै आफ्नो पक्ष निर्दोष रहेको जिकिर गरे। बलात्कार भन्दै दाबी गरिएपनि घटनास्थल मुचुल्कामा केही छैन, डाक्टरको रिपोर्टले समेत बलात्कार पुष्टि गर्ने कुनै आधार नदिएको सन्दीपका वकिलको तर्क छ।
वरिष्ठ अधिवक्ता रमन श्रेष्ठले आफ्नो पक्ष निर्दोष रहेको दाबी गर्दै कुनै प्रमाणविना मिथ्या आरोप लगाउन नहुने तर्क राखे। अझ उनले अभियोजनमा नाबालिग भन्दै मुद्दा लगाइएका उक्त मुद्दा नै खारेज हुनुपर्ने जिकिर राखे।
‘उहाँहरूले नाबालिग भन्दै अभियोजन गर्नुभएको छ। हामीले बालिग रहेको प्रमाण पेश गरेका छौं। जसकारण नाबालिग भन्दै पेश गरिएको अभियोजन नै खारेज हुनुपर्छ,’ वरिष्ठ अधिवक्ता श्रेष्ठले भने।
अभियोगमा बलात्कार भएको भनिएको समय गत भदौ ५ गते पीडित भनिएकी किशोरी १७ वर्ष २ महिना १८ दिन भएको भन्दै उल्लेख गरिएको छ। उक्त उमेर नागरिकता अनुसार भएको तर नागरिकता भन्दा अघि जारी भएको जन्मदर्तामा उल्लेख भएको जन्ममिति अनुसार किशोरी १८ वर्ष पुरा भइसकेको दाबी श्रेष्ठले गरे।
दुईवटा जन्ममिति भएको अवस्थामा जेठ जन्ममिति (पहिला जारी भएको)लाई मान्यता दिनुपर्ने निजामति नियमावलीमा समेत प्रष्ट उल्लेख भएकाले नागरिकतालाई नभई जन्मदर्ताको उमेरलाई खास प्रमाण मान्नुपर्ने तर्फ श्रेष्ठले राखे। जन्मदर्ताको विवरणअनुसार नाबालिग भनिएकी किशोरी बालिग भइसकेको ठहर हुनेहुँदा नाबालिग भन्दै दायर गरिएको मुद्दा नै खारेज हुनुपर्ने तर्क उनको थियो।
सन्दीपकाका वकिलहरूले पेश गरेको जन्मदर्ताको विवरणअनुसार पीडित भनिएकी किशोरीको उमेर ०६१ असार १८ गते छ। उक्त मितिलाई आधार मान्दा उनी बालिग भइसकेको देखिन्छ।
अर्कोतर्फ नागरिकतालाई मात्रै प्रमाण मान्न नहुने भन्दै उनीहरूले नजिरसमेत पेश गरे। सर्वोच्चका न्यायाधीश कल्याण श्रेष्ठ र कृष्णप्रसाद उपाध्यायको संयुक्त इजलासले मुद्दा नम्बर ०६१ को दे. पु. न ८३९७ को नजिरसमेत उनीहरूले पेश गरे।
‘नागरिकताको प्रमाणपत्र वादीसँग रहने वादीको प्रयोजनका लागि तयार हुने कागज भएकाले सो प्रमाण पत्र लिँदा प्रतिवादीको सहमति संलग्नता रहने कुरा हुँदैन। प्रतिवादीको सहमतिबेगर त्यहाँ लेखिएको व्यहोरा अकाट्य प्रमाण हुन नसक्ने,’ उक्त नजिरमा लेखिएको छ।
प्रतिवादी सन्दीपतर्फका अधिवक्ताहरूले बिहीबार बहस गरेपनि त्यसको जवाफी बहस वादी तथा सरकारी पक्षबाट शुक्रबार हुने भएको छ। जवाफी बहस सकिएपछि उनलाई धरौटी, तारेखमा छाड्ने वा पुर्पक्षका लागि कारागार पठाउने भन्ने आदेश आउने छ।
बुधबार पीडित भनिएकी किशोरीको तर्फबाट चारजना सरकारी वकिल र चारजना अन्य वकिलहरूले बहस गरेका थिए। पीडित किशोरीको बयानअनुसार त्यसराति सन्दीप उक्त होटलमा देखिएको, सीसी टीभी फुटेज लगायतबाट उक्त कुरा पुष्टि भएको र राति एउटै कोठामा बसेकोसम्म प्रतिवादीले स्वीकार गरिसकेको र अन्य घटना प्रमाण तथा बयानहरुका आधारमा बलात्कार पुष्टि भएको दाबी उनीहरूको थियो।
बुधबार नै सन्दीपको तर्फबाट मुरारीप्रसाद सापकोटा र रोशनी पौडेलले बहस गरेका थिए । सापकोटाले अभियोग पुष्टि हुने कुनै प्रमाणहरु पेस नभएको र मिथ्या आरोप लगाइएकाले सन्दीपले सफाइ पाउनुपर्ने दाबी गरेका थिए ।
गत मंगलबार सन्दीपले जिल्ला न्यायाधीश माधव घिमिरेको इजलासमा बयान दिएका थिए। बयानका क्रममा सन्दीपले पीडित भनिएकी किशोरीले कसैको उक्साहटमा आफूविरुद्ध उजुरी दिएको बताएका थिए। प्रहरीलाई पनि इन्कारी बयान दिएका सन्दीपले अदालतमा पनि उस्तै विषयलाई दोहोर्याएका छन्।
१७ वर्षीया किशोरीलाई बलात्कार गरेको आरोपमा पक्राउ परेका सन्दीपविरुद्ध अनुसन्धान सकिएपछि जिल्ला सरकारी वकिल कार्यालय, काठमाडौंले सोमबार अदालतमा मुद्दा दायर गरेको थियो।
सन्दीपविरुद्ध मुलुकी अपराध संहिता, ०७४ को परिच्छेद १८ को करणीसम्बन्धी कसुरको दफा २१९ को उपदफा (३) को (घ) अन्तर्गतको कसुर गरेको अभियोग लगाइएको छ। जसमा १६ वर्षभन्दा बढी १८ वर्षभन्दा कम उमेरकी महिलालाई करणी गरेमा १० देखि १२ वर्षसम्म कैद सजाय हुने व्यवस्था छ। सोहीअनुसार सन्दीपविरुद्ध अधिकतम १२ वर्ष जेल सजायको मागदावी गरिएको छ।
पीडित किशोरीले प्रहरीसँगको बयानका क्रममा सन्दीपले आफूलाई काठमाडौं र भक्तपुरको नगरकोटसमेत पुर्याएको र फेरि फर्काएर काठमाडौं ल्याई एक होटलमा राखेर बलात्कार गरेको दाबी गरेकी छिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
