काठमाडौं– १७ वर्षीया किशोरीलाई बलात्कार गरेको आरोपमा पक्राउ परेका क्रिकेटर सन्दीप लामिछानेविरुद्धको मुद्दा जिल्ला अदालत काठमाडौंमा सोमबार दर्ता भएको छ। अनुसन्धान सकेर १० देखि १२ वर्षसम्म कैद हुनुपर्ने माग राख्दै प्रहरीले बुझाएको अनुसन्धान प्रतिवेदन सरकारी वकिल कार्यालयले सोमबार अदालतमा दर्ता गरेको थियो।
यस प्रकरणबारे मंगलबारबाट थुनछेक बहस हुने बताइएको छ। हिरासतमा रहेका सन्दीपले भने आफूविरुद्ध लागेको बलात्कार आरोप अस्वीकार गरेका छन्। तर प्रहरीले भने सन्दीपले बलात्कार गरेको भन्ने प्रमाण पर्याप्त भएको दाबी गर्दै बलात्कारमा मुद्दा चलाउन भनेर रायसहितको प्रतिवेदन पेश गरेको थियो।
प्रहरीले हिरासतमा राखेर उनीविरुद्ध अनुसन्धान गरेको थियो। सो क्रममा सन्दीपविरुद्ध प्रहरीले जुटाएका प्रमाणहरू के–के छन् भन्नेबारे नेपाल लाइभले खोतल्ने प्रयास गरेको छ ।
यो प्रकरणमा मुख्य प्रमाणको रुपमा प्रहरीले आरोपी, पीडित भनिएकी किशोरीलगायत अन्य व्यक्तिहरूको बयानलाई प्रमाणको रुपमा लिएको छ।
जाहेरी दरखास्त साथ पेश गरेका कागजातहरू, पीडितको नागरिकताबाट उनी नाबालिका रहेको पुष्टि, घटनास्थल मुचुल्का, उनीहरू बसेको होटलका सञ्चालक, वेटर, गार्डहरूको बयान, घटना विवरण कागजहरूका आधारमा सन्दीपले बलात्कार गरेको दाबी गरिएको छ।
होटल काठमाडौं इनको सुरक्षा गार्ड राजन राणा र बाबुकाजी थापामगर, वेटर सबिन श्रेष्ठ र रिसेप्सनिष्ट अनिश श्रेष्ठले गरिदिएको घटना विवरण कागज, बोजिनी रिसोर्टका नगरकोटका सुपरभाइजर समीर पुरीले गरिदिएको घटना विवरण कागज, पीडितको स्वास्थ्य परीक्षण प्रतिवेदन, प्रतिवादी सन्दीप तथा होटलको ल्याण्ड लाइन नम्बरको कल रेकर्ड विवरणहरू, प्रतिवादी सन्दीपको बयान व्यहोरा, होटल काठमाडौं इनका सञ्चालक सन्तोषप्रसाद अधिकारी र लालबहादुर बानियाँ, क्यासियर इन्द्रविक्रम थापा, आँगन होस्टेलका सञ्चालक नारायणबहादुर बलामी, क्रिकेट खेलाडी साहब आलम तथा देव खनाल, प्रकृति गिरी र पवन ढुंगानासम्मको बयान प्रहरीले लिएको थियो।
घटना विवरण कागज, घटनास्थल वरपर रहेका सिसिटिभी फुटेजहरू तथा कल डिटेललगायतका विश्लेषण गर्दा सन्दीपले बलात्कार गरेको दाबी गरिएको छ।
सन्दीपले पीडित भनिएकी बालिकालाई स्न्याप च्याटको माध्यमबाट चिनजान गरी ललाइ–फकाइ गत भदौ ५ गते बेलुका भक्तपुरको नगरकोट घुमाउन लगेको र त्यहाँबाट राति फर्केर सिनामंगलको होटल काठमाडौं इनको कोठा नम्बर ३०५ मा बसेको विषय पुष्टि भएको अभियोगपत्रमा उल्लेख गरिएको छ।
उक्त होटलमा सोही राति १२ बजेर २५ मिनेटमा र १ बजेर ३० मिनेटमा गरी दुई पटक किशोरीलाई सन्दीपले बलात्कार गरेको स्थापित हुन आएको अभियोगपत्रमा उल्लेख गरिएको छ।
सन्दीप रातभर उक्त होटलमा सँगै बसेको भन्ने विषय सिसी टिभी फुटेजबाट देखिएको, फुटेजमा देखिएको फोटो पीडित र म नै हो भनी लामिछानेले सनाखत गरेको, लामिछानेले बयान गर्दा, पीडितसँग नगरकोट गएको र सोही दिन बेलुका फर्की होटल काठमाडौं इनको कोठा नम्बर ३०५ मा रातभर सँगै बसेको हो भनी स्वीकार गरेको विषयलाई पनि प्रमाणमा उल्लेख गरिएको छ।
सन्दीपले आफूले जबरजस्ती करणी गरेको विषय अस्वीकार गरे पनि पीडित व्यक्तिले ‘आफूलाई फकाइ फुल्याइ तीलगंगास्थित होटल काठमाडौं इनमा लगी जोरजुलुम गरी डर त्रासमा पारी मेरो इच्छाविपरीत दुईपटक जबरजस्ती करणी गरेको हो’ भनेकाले सन्दीपको बयानमा विश्वास गर्ने ठाउँ नभएको अभियोगपत्रमा उल्लेख गरिएको छ।
स्वाथ्य परीक्षक रिपोर्टलाई पनि प्रमाणको रुपमा पेश गरिएको छ। स्वाथ्य परीक्षण रिपोर्टमा हाइमेन्ट: वल्र्ड टिअर एट ६ क्लक पोजिसन उल्लेख गरिएको, नागरिकताबाट नाबालिक गरेको पुष्टि भएकोले बलात्कार भएको दाबी गरिएको छ।
‘होटलको एउटै कोठामा पीडितसँग प्रतिवादी रातभर बसेको, सो कोठामा एउटा मात्र बेड रहेको, प्रतिवादीले आफू कुर्सीमा बसेर रात बिताएको भनिए पनि अपरिचित पीडितलाई होटलमा लिएर जानु, स्नाप च्याटमा गरिएका कुराहरू, पीडितको कागज र स्वास्थ्य परीक्षण प्रतिवेदन व्यहोराबाट प्रतिवादीको बयान विश्वसनीय देखिँदैन,’ अभियोगपत्रमा उल्लेख गरिएको छ।
‘अर्कोतर्फ पीडित किशोरीले सन्दीपलाई बलात्कार गर्यो भनी विनाआधार भन्नु वा फसाउनुपर्ने अन्य कारणसमेत नदेखिनु, जुन दिन, जुन समय, जहाँ र जसले बलात्कार गर्यो भन्ने पीडितको भनाइ छ, त्यही दिन, त्यही ठाउँ र त्यही समयमा यी प्रतिवादी साथमा छन्। पीडितलाई लिएर आफूमात्र गएका छन्’ आरोप पुष्टि गर्नेक्रममा अभियोगपत्रमा विश्लेषण गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
