काठमाडौं– क्वीन्स पार्क ओभलमा घरेलु टोली वेस्ट इन्डिजले ३०८ रनको कीर्तिमानी लक्ष्य पछ्याउने मौका पाएको थियो। यस मैदानमा अहिलेसम्म सर्वाधिक २७२ रनको लक्ष्य पछ्याइएको छ। तर, शुक्रबार यो लक्ष्य पछ्याउँदा वेस्ट इन्डिज केही रनले मात्र पछाडि परेको थियो।
वेस्ट इन्डिजलाई अन्तिम बलमा ५ रन चाहिएको थियो। तर, मोहम्मद सिराजको शानदार योर्करले वेस्ट इन्डिजलाई जितबाट बञ्चित गरायो।
शुक्रबार भारतसँग वेस्ट इन्डिजले जसरी लडेको थियो, त्यसबाट वेस्ट इन्डिजका कप्तान र स्टेडियममा उपस्थित दर्शक निकै खुसी थिए। कप्तान निकोलस पूरनले यो खेलमा आफ्नो टोलीको जित भएको महसुस गरे। खासगरी बंगलादेशसँगको सिरिजमा हार बेहोरेपछि।
त्यसपछि यस्तो संघर्ष जित बराबर हुन्छ। खेलपछि पूरनले होस्ट ब्रोडकास्टरलाई भने,‘यो पक्कै पनि हाम्रो लागि जित थियो। समग्रमा नतिजा एकै समयमा तितो र मीठो दुवै थियो। हामीले ५० ओभर ब्याटिङ गर्नुपर्छ। यसबारे केही समय लियौं र ५० ओभर ब्याटिङ गरेर ३०० प्लस रन बनायौं।’
उनले थपे,‘ एक समूहको रूपमा हामी हाम्रो टोलीलाई पुनर्निर्माण गर्दै एकदिवसीय क्रिकेटमा सफलताको बाटो खोज्ने प्रयास गरिरहेका छौं। आज हामीले हाम्रो प्रतिभालाई न्याय गरेका छौं।’
टस जितेर पूरनले भारतीय टोलीलाई ब्याटिङको निम्तो दिएका थिए। जवाफमा ओपनरद्वय शिखर धवन र शुभमन गिलले ११९ रनको शतकीय साझेदारी गर्दै राम्रो सुरुआत गरेका थिए। धवन शतक प्रहार गर्नबाट चुके।
उनी ९९ बलमा १० चौका र ३ छक्कासहित ९७ रनमा आउट भए। अर्का युवा ओपनर शुभमन गिल ५३ बलमा ६ चौका र २ छक्कासहित ६४ रनमा आउट भए।
एक बिन्दुमा यस्तो देखिन्थ्यो कि भारतीय टोलीले ३५० भन्दा बढी स्कोर गर्नेछ। तर, पछिल्ला ओभरमा वेस्ट इन्डिजको टोलीले राम्रो कमब्याक गर्दै भारतीय टोलीलाई ३०८ रनमा सीमित गर्यो।
‘मैले बलरहरूलाई यसको श्रेय दिनुपर्छ। हामीले यी अवस्थाहरूमा राम्रो सुरुआत गर्न सकेनौं। यो एक ब्याटिङ ट्र्याक थियो। तर, हामीले वाटर ब्रेकमा एक अर्कासँग कुरा गर्यौं र भारतलाई ३१५ रनमा मा समेट्ने लक्ष्य लियौं,’ पूरनले भने,‘गुडाकेश मोती, अकील हुसेन र अल्जारी जोशेफ सबै आएर आज आफ्नो सीप देखाए। बंगलादेशको सिरिजपछि आज हामीले जसरी लड्यौं त्यसमा गर्व छ।’
वेस्ट इन्डिजलाई भारतले दिएको ३०९ रनको लक्ष्य कहिलेकाहीँ पहुँच बाहिर देखिन्थ्यो। तर, काइल मेयर्स र ब्रेन्डन किङको अर्धशतकका कारण वेस्ट इन्डिजले भारतलाई हम्मेहम्मे बनाएको थियो।
यससँगै पूरन र रोमारिया शेफर्डले पनि छोटो तर प्रभावकारी इनिङ्स खेले। ओपनर मेयर्सले सर्वाधिक ७५ रन बनाए। उनले ६८ बलमा १० चौका र १ छक्का प्रहार गरे।
दोस्रो विकेटका लागि मेयर्स र शमराह ब्रुकले ११७ रनको शतकीय साझेदारी गर्दै खेललाई अघि बढाएका थिए। ब्रुक ६१ बलमा ४ चौका र १ छक्कासहित ४६ रनमा आउट भए।
ब्रेन्डन किङ ६६ बलमा २ चौका र २ छक्कासहित ५४ रनमा आउट भए। रोमारियो शेफर्ड २५ बलमा ३ चौका र २ छक्कासहित ३९ रनमा अविजित रहे। कप्तान पूरन २५ रनमा आउट भए।
‘हामीले एक अर्कामा विश्वास गर्न आवश्यक छ। हामी एक एकाइको रूपमा नजिक आउन कोशिस गर्दैछौं। यो हाम्रो कथा हो, यात्रा हो र त्यहाँ जाँदैछौं। यसमा धेरै चुनौतिहरू छन्। तर, हामी सही दिशामा अघि बढिरहेका छौं, म खुसी छु,’ पूरनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766928868.png)
-1764146706.png)
-1766648928.png)
