काठमाडौं– भारतले पहिलो ओडीआई खेलमा घरेलु टोली वेस्ट इन्डिजमाथि रोमान्चक जित हात पारेको छ। शुक्रबार राति सम्पन्न खेलमा भारतले वेस्ट इन्डिजमाथि ३ रनको जित निकालेको हो। योसँगै ३ ओडीआई खेलको सिरिजमा भारतले १–० को अग्रता बनाएको छ।
जितको लागि ३०९ रनको विजयी लक्ष्य पछ्याएको वेस्ट इन्डिजले निर्धारित ५० ओभरमा ६ विकेट गुमाउँदै ३०५ रन बनायो। वेस्ट इन्डिजलाई जितको लागि अन्तिम ओभरमा १४ रन चाहिँएको थियो। तर, मोहम्मद शिराजाले १ चौकासहित ११ रन खर्चेपछि भारतको जित पक्का भएको हो।
वेस्टइन्डिजका ओपनर काईल मेयर्सले सर्वाधिक ७५ रन बनाए। उनले ६८ बलमा १० चौका र १ छक्का प्रहार गरे।
दोस्रो विकेटका लागि मेयर्स र शमराह ब्रुकले ११७ रनको शतकीय साझेदारी गर्दै खेललाई अघि बढाएका थिए। ब्रुक ६१ बलमा ४ चौका र १ छक्कासहित ४६ रनमा आउट भए।
ब्रेन्डम किंग ६६ बलमा २ चौका र २ छक्कासहित ५४ रनमा आउट भए। रोमारियो शेफर्ड २५ बलमा ३ चौका र २ छक्कासहित ३९ रनमा अविजित रहे।
अकिल हुसैन ३२ बलमा २ चौका सहित ३२ रनमा अविजित रहे। कप्तान निकोलस पुरन २५ र रोभम्यान पावेल ६ रनमा आउट भए।
भारतका मोहम्मद शिराज, शार्दुल ठाकुर र युजभेन्द्र चहलले २/२ विकेट लिए।
त्यसअघि क्विन पार्क ओभलमा टस हारेर ब्याटिङ गरेको भारतले निर्धारित ५० ओभरमा ७ विकेट गुमाउँदै ३०८ रन बनायो। भारतका कप्तान शिखर धवन शतक प्रहार गर्नबाट चुकेका थिए।
उनी ९९ बलमा १० चौका र ३ छक्कासहित ९७ रनमा आउट भए। अर्का युवा ओपनर शुभमन गिल ५३ बलमा ६ चौका र २ छक्कासहित ६४ रनमा आउट भए।
ओपनर गिल र धवनले पहिलो विकेटका लागि ११९ रनको शतकीय साझेदारी गर्दै उत्कृष्ट सुरुआत दिलाएका थिए। श्रेयस ऐर ५७ बलमा ५ चौका र २ छक्कासहित ५४ रनमा आउट भए।
दीपक हुड्डा २७ र अक्षर पटेल २१ रनमा आउट भए। वेस्टइन्डिजका अल्जारी जोशेफ र गुडाकेश मोटीले २/२ विकेट लिए। दोस्रो खेल आइतबार हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
