काठमाडौं– पछिल्लो समय बलात्कार घटनाको 'ग्राफ' उकालो लाग्दो अवस्थामा रहेको नेपाल प्रहरीको तथ्यांकले देखाएको छ। प्रहरीको तथ्यांकअनुसार दैनिक कम्तीमा ७ जनासम्म महिला तथा बालिकाहरु बलात्कारपीडित बन्ने गरेका छन्। यो प्रहरीमा आएको मात्रै तथ्यांक हो। कतिपय घटनामा त प्रहरी कहाँ नआई सामसुम हुने गरेकाले यो तथ्यांक अझ बढ्न सक्ने आँकलन गर्न सकिन्छ।
प्रहरीको तथ्यांक अनुसार आर्थिक वर्ष २०७४/७५ देखि आर्थिक वर्ष २०७८/७९ को वैशाख मसान्त अर्थात् ५८ महिनाको अवधिमा देशभर १० हजार ३३२ बलात्कारका उजुरी परेका छन्। यो तथ्यांकले पनि देशभर बलात्कार घटानहरु बढिरहेको देखाएको नेपाल प्रहरीका प्रवक्ता तथा प्रहरी वरिष्ठ उपरीक्षक (एसएसपी) विष्णुकुमार केसीले जानकारी दिए।
पीडितहरुको भनाइ अनुसार ललाई फकाई, डरधाकधम्की दिई विभिन्न प्रलोभनमा पारेर बलात्कार हुने गरेको पाइएको प्रवक्ता केसीले बताए।
पछिल्लो पाँच आर्थिक वर्षको तथ्यांक अनुसार सबैभन्दा बढी आर्थिक वर्ष २०७७/७८ मा बलात्कारको घटना भएको देखिन्छ। यो आर्थिक वर्षमा २ हजार ५५४ वटा बलात्कारका उजुरी प्रहरीमा दर्ता भएका छन्। आर्थिक वर्ष २०७४/७५मा १ हजार ४६८, आर्थिक वर्ष २०७५/७६ मा २ हजार २५४, आर्थिक वर्ष २०७६/७७ मा २ हजार १६७ र आर्थिक वर्ष २०७८/७९ को वैशाख मसान्तसम्ममा १ हजार ८८९ वटा बलात्कार उजुरी प्रहरी कार्यालयमा दर्ता भएका छन्।
धेरै पीडित १६ वर्ष मुनिका
नेपाल प्रहरीको तथ्यांक अनुसार बलात्कारबाट सबैभन्दा पीडित उमेर समूह ११ वर्षदेखि १६ वर्षसम्मको छ। आर्थिक वर्ष २०७४/७५ देखि आर्थिक वर्ष २०७८/७९ को वैशाख मसान्तसम्ममा मात्रै यो उमेर समूहका ४ हजार ५८ जना बालिका बलात्कृत भएका छन्।
आर्थिक वर्ष २०७४/७५ मा ५९० जना, आर्थिक वर्ष २०७५/७६ मा ८८९ जना, आर्थिक वर्ष २०७६/७७ मा ८०१ जना, आर्थिक वर्ष २०७७/७८ मा सबैभन्दा बढी १०१६ जना र आर्थिक वर्ष २०७८/७९ को वैशाख मसान्तसम्म ७६२ जना गरी ४ हजार ५८ जना बालिका बलात्कृत भएका छन्।
आर्थिक वर्ष २०७८/७९ को दुई महिनाको तथ्यांक आउन बाँकी नै रहेकाले यो आर्थिक वर्षको तथ्यांक समेत बढ्ने देखिन्छ।
आर्थिक वर्ष २०७८/७९ को वैशाखसम्म भएका १८८९ बलात्कारका घटना मध्ये ७६२ वटा घटना ११ वर्षदेखि १६ वर्ष उमेर समूहका छन्। जसबाट पनि बलात्कार घटनाको ४० प्रतिशत भन्दा बढी पीडित उमेर समूह ११ वर्षदेखि १६ वर्षसम्मको देखिन्छ। १८ वर्षभन्दा मुनिकाको हिसाब गर्ने हो भने ५० प्रतिशत भन्दा बढी बलात्कार पीडित १८ वर्ष मुनिका किशोरी तथा बालिकाहरु भएको देखिन्छ।
१० वर्ष मुनिका बालकसमेत तानिए बलात्कार घटनामा
नेपाल प्रहरीको तथ्यांकअनुसार १० वर्ष भन्दा मुनिको उमेरका बालकसमेत बलात्कारको कसुरका आरोपी देखिएका छन्। १० वर्ष मुनिका बालकलाई समेत विपक्षी बनाएर प्रहरीमा बलात्कारको जाहेरी दर्ता भएको पाइएको छ।
पछिल्लो पाँच आर्थिक वर्षको अवधिमा २३ वटा बलात्कार घटनामा १० वर्ष भन्दा मुनिका बालक कसुरदार रहेको दाबी गर्दै उजुरी दर्ता भएको पाइको हो।
आर्थिक वर्ष २०७४/७५ मा १० वर्ष भन्दा मुनिका एक बालकलाई विपक्षी बनाउँदै प्रहरीमा बलात्कारको उजुरी दर्ता भएको थियो। बागमती प्रदेशमा १० वर्ष मुनिका एक बालकबाट बलात्कृत भएको भन्दै प्रहरीमा उजुरी दर्ता भएको थियो।
त्यस्तै आर्थिक वर्ष २०७५/७६ मा ८ जना १० वर्ष मुनिका बालकविरुद्ध बलात्कार आरोपमा उजुरी दर्ता भयो। आर्थिक वर्ष २०७६/७७ मा ५, आर्थिक वर्ष २०७७/७८ मा ४ र आर्थिक वर्ष २०७८/७९ मा ५ जना १० वर्ष मुनिका बालकविरुद्ध बलात्कार आरोपमा उजुरी दर्ता भएको प्रहरीको तथ्यांक छ।
सामूहिक बलात्कारको अवस्था पनि डरलाग्दो
सिन्धुपाल्चोकको चौतारा साँगाचोकगढी नगरपालिका–९ सुकुटेस्थित सुकुटे बिच एडभेन्चर क्याम्प रिसोर्टमा रमाइलो गर्न गएकी युवती बलात्कृत भइन्। उक्त रिसोर्टको टेन्टमा सुतिरहेको बेला उनीमाथि सामूहिक बलातकार भएको थियो। यो घटना असार दोस्रो साताको हो।
२६ वर्षीया युवतीलाई सामूहिक बलात्कार गरेको आरोपमा असार १९ गते राति साढे ९ बजे काठमाडौंको कलंकीबाट तीन जना पक्राउ परे।
पक्राउ परेका कलंकी १४ बस्ने १८ वर्षीय प्रिन्स थपलिया, सोही ठाउँ बस्ने १८ वर्षीय रुस कार्की र २६ वर्षीय सुलभ क्षेत्रीलाई बलात्कारको कसुरमा ७ दिनको म्याद लिएर अनुसन्धान अघि बढाइएको सिन्धुपाल्चोकका डीएसपी दक्षकुमार बस्नेतले बताए।
यो हालै सार्वजकि भएको सामूहिक बलात्कारको प्रतिनिधि घटना मात्रै हो। संघीय राजधानी काठमाडौंमै केही समय अघि ९ जना युवाहरुले एक युवतीमाथि सामूहिक बलात्कार गरेको घटना सार्वजनिक भएको थियो।
गोंगबुस्थित नयाँ बसपार्क क्षेत्रको होटल लगेर एक महिलालाई ९ जनाले बलात्कार गरेका थिए। यो घटना गत पुस १२ र १३ गतेको हो। त्यतिबेला बलात्कार आरोपमा पक्राउ गरेकाहरु अधिकांश मुगुका थिए। ९ जनाको समूहले एक महिलालाई दुई दिनस्म्म होटलमा राखेर बलात्कार गरेका थिए। पक्राउ परेका ९ जनालाई नै पछि जिल्ला अदालत काठमाडौंले पुर्पक्षका लागि थुनामा पठाएको थियो। यो समूहले सुर्खेतबाट काम खोज्न भनेर काठमाडौं आएकी महिलालाई काम लगाइदिने भन्दै फकाएर गेष्टहाउस लगेर बलात्कार गरेको थियो।
प्रहरी अधिकारहरु पनि पहिलाको तुलनामा अहिले सामूहिक बलात्कारको घटनाहरुको बढ्न थालेको बताउँछन्। यस्ता घटनाहरु प्राय: नसा (मदिरा/लागु औषध सेवन) को बेलामा हुने गरेको पाइएको जिल्ला प्रहरी परिसर काठमाडौंका एसपी दिनेशराज मैनालीले बताउँछन्।
गोंगबु घटनामा पनि मदिरा सेवन गरेर सामूहिक बलात्कार भएको पाइएको थियो। सुकेटेमा भएको सामूहिक बलात्कार घटना पनि मदिरापछि परिणामा भएको प्रहरीको प्रारम्भिक निष्कर्ष छ।
दरबारमार्गमा मदिरा पिएर रमाइलो गरेपछि घर पुर्याइदिने भन्दै बौद्ध पुर्याएर एक युवतीलाई गत जेठ २९ गते सामूहिक बलात्कार गरिएको थियो। बलात्कार आरोपमा तीन जना पक्राउ परेका थिए।
१९–२५ उमेर समूहबाट महिला असुरक्षित
सबैभन्दा बढी बलात्कारका कसुरदार १९ देखि २५ वर्ष उमेर समूहको रहेको पाइएको छ। बलात्कार घटनामा तानिएका युवाहरु यही उमेर समूहका रहेको प्रहरीले तथ्यांकले देखाउँछ। पाँच आर्थिक वर्षको अवधिमा यो उमेर समूहका सबैभन्दा बढी ४ हजार ४९८ जनामाथि बलात्कारको आरोप लागेको छ।
आर्थिक वर्ष २०७४/७५ मा ५८६ जना, आर्थिक वर्ष २०७५/७६ मा ९९६ जना, आर्थिक वर्ष २०७६/७७ मा १ हजार १ जना, आर्थिक वर्ष २०७७/७८ मा १ हजार ९४ जना र आर्थिक वर्ष २०७८/७९ को वैशाख मसान्तसम्म ८ सय २१ जना गरी ४ हजार ४९८ जना युवाहरुमाथि बलात्कारको आरोप लागेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821304.jpg)
-1786602170.png)
-1786513116.png)
